Read Sidama_Qullaawa _Maxaafa EJJEETTO 8 Bible Online

EJJEETTO 8 - Sidama_Qullaawa _Maxaafa bible

EJJEETTO 8

¹Hatte yannara Efireemi manni, «Midiyaamoota qasattora ha'ritto woyite mayira woshsha giwittonke? Konne coye mayira assitto?» yee Gedewooni lowo geeshsha abbooshshi'ri.

²Gedewooni kayinni, «Ani assoommohunni ki'ne assitinoonnihu dirooranno? Ninke gamba assinoommo jajjinni ki'ne qarme xinqitinoonnihu dirooranno?

³Maganu Midiyaamootu sooreeyye Hereebinna Zeebi anga'nera sayise uyino. Hatto ikkina, ani hakkeeshshire asse afeemmo?» yii. Hatto yiita hanqinsa qiidi.

⁴Gedewooninna sasunku xibbi manni Yordaanoosi fultu. Daafurte heedhenninni diinansa shorra diagurtino.

⁵Gedewooni Sukooti manna, «Midiyaami mootoolla Zaabiheelinna Silmana shorranna hoode'ya noo manni daafurinona eeggate sagale uuyyensa» yii.

⁶Sukooti mannino, «Ledokki mannira sagale uyinammora Zaabiheelinna Silmana qeelante anga uyitinoheni?» yite xa'mitusi.

⁷Gedewoonino, «Kaaliiqi Zaabiheelinna Silmana anga'yara sayise aanno yannara halalli utunninna kokko'lunni biso'ne huduudeemmo» yiinsa.

⁸Hakkunni gedensaanni, Phiinieeli mannano mare hatto yee xa'mi. Insa dawarono Sukooti mannite ledo mittete.

⁹Isino Phiinieeli manna, «Qeele hobbaate higeemmo yannara katama'ne agadhitinannita kinchu shae diigeemmo» yiinsa.

¹⁰Hatte yannara Zaabiheelinna Silmana 15,000 ikkitanno olantonsa ledo Qeriqeri yinanni darga no. Kuri soojjaatinni fultino gosa giddonni 120,000 manni goofeenna gattinoreeti.

¹¹Hakkunni gedensaanni Gedewooni kae, Noobahinna Yogibihara soojjaatoonni halallitte gobba qacce amade diinu olanto aana hedeweelcho bala tugi.

¹²Lamunku Midiyaami mootoolla Zaabiheelinna Silmanano xooqqu. Gedewooni kayinni insa shorre amadi; olantonsa baalanta billaallisi.

¹³Hakkunni gedensaanni, Iyoaasi beetti Gedewooni Hereesi massitanno doogo amade oluwiinni higi.

¹⁴Hakkiichono Sukootiha mitto wedellicha amade qoreenna, isino 77 Sukooti katami roorrooti su'ma borreesse uyisi.

¹⁵Hakkunni gedensaanni Gedewooni Sukooti manniwa mare, «‹Daafurinohura mannikkira sagale uyinammora Zaabiheelinna Silmana qeelante anga uyitinoheni?› yitine qacifattinieri, Zaabiheelinna Silmana kuneeti» yiinsa.

¹⁶Gedewoonino katamu roorroota amade, halalli utinninna kokko'linni bisonsa huduudi.

¹⁷Phiinieeli noota katama agarrannita kinchu shaeno diigi; katamu mannano shii.

¹⁸Zaabiheelinna Silmana, «Taaboori Ilaali aana shitini manni hiittoohoro kulle"e?» yee xa'minsa. Insano, «Wo'munku atente gede mootete ooso labbannoreeti» yitusi.

¹⁹Gedewoonino, «Insa ama'ya oosooti; roduuwa'yaati; shaa hoogginoommensaro, anino sheemmo'nekki gede Heeshshote Kaaliiqi su'minni xaareemmo'nehu baino» yee dawarinsa.

²⁰Hakkunni gedensaanni bayira beettosi Yeteeri, «Konne manna shii» yee hajaji. Yeteeri kayinni shiima beetto ikkinohura waajje bise difushshi'rino.

²¹Zaabiheelinna Silmana, «Labbaaha labbaahulla shaannona, ati umikki shiinke» yitusi. Gedewoonino kae insa shee, gaalinsa goowira noo irrano adhi.

²²Israeelootu Gedewooni, «Midiyaamootu anganni gatisoottonkena ati, beettikkinna beettikki beetti gashshenke» yitusi.

²³Gedewooni kayinni daware, «Anino beetti'yano digashshineemmo'ne; gashshanno'nehu Kaaliiqaati» yiinsa.

²⁴Gedewooni qole, «Adhitine dagginoonni buticha uyitinaera hasi'roommo» yiinsa. (Ismaeelootu[4] culku buticha wodhitannoreeti).

²⁵Insano dawarte, «Hagiidhinanni uyineemmohe» yitusi. Hakkawoyintenni imaana karte, abbidhinoha maccate buticha aanaho tuttuggu.

²⁶Wole irra, goowu irrano rarraasaanchu ledo, Midiyaami mootoolla uddidhannoha xiillicha imaana woy gaalinsa aana noo irra agurranna, Gedewoonira uyitinohu culku butichi 20 kiilo ikkino.

²⁷Gedewooni culkunni misile seekke, ilamino katamira Ofira wori. Israeele baalanti tenne misile magansi'ratenni Maganoho ammanama hoogginohura, misile Gedewooniranna maatesira woshshaado ikkitu.

²⁸Kunni garinni Midiyaamoota Israeele qeeltu. Layinkimeeshshono Israeele diseyattino. Gedewooni lubbotenni noo geeshsha gobba 40 diro keere afidhu.

²⁹Iyoaasi beetti Gedewooni ha're qaesira ofolli.

³⁰Isi lowo meento adhe 70 ooso ilino.

³¹Sekeemi heedhannoti irkote galtesino labbaa beetto iltinosi. Su'mano Abemeleeki yee fushshinosi.

³²Iyoaasi beetti Gedewooni diro furme reyino. Abieezerootu baattora Ofira annisi Iyoaasi waammara madaarroonnisi.

³³Gedewooni ree lowo yanna keeshshikkinni Israeelootu Ba"aali magano magansi'ratenni Maganoho ammanantinokkire ikkitu. Ba"aali-Beriitino maganonsa assidhu.

³⁴Gaangaawinsara noo diinna baalatewiinni gatisinonsaha Kaaliiqa Maganonsa diqaaggino.

³⁵Yirubaeeli yinannihu Gedewooni assinonsareno qaagge maatesira galata diqoltino.