Read Sidama_Qullaawa _Maxaafa YOHAANNIS AJUUJA 11 Bible Online

YOHAANNIS AJUUJA 11 - Sidama_Qullaawa _Maxaafa bible

YOHAANNIS AJUUJA 11

¹Hakkunni gedensaanni bikke laeemmo gede leemmiicho uyine, «Kai, Maganu Minenna kakkalote darga bikki! Hakko Magano magansi'ranno mannano kiiri.

²Maganu Minira gobbaanni nooha fano darga kayinni aguri. Hakku dargi dagate uyinoonniha ikkino daafira bikkitooti. Daga Qullaawa Katama 42 agani geeshsha kaddanno.

³Lamunku farci'raasine'ya xiddu uddano uddidhe, 1,260 barra sokka'ya[6] kultanno gede soyemmo» yinie.

⁴Insa, lame baattote Mootichi albaanni uurritanno ejedheetinna lame caabbicho worranni uduunneeti.

⁵Insa gawajjara hasi'rannohu hee'riro, giira afiinsanni fulte qahonsa ittanno. Gawajjansara hasi'rannohu baalu, hatto ikke reyanno.

⁶Insa Maganu sokka kultanno yannara, xeena ganannokki gede gordo cufa dandiitanno. Hasidhu yanna baalate waa mundeete soorranna baattote aana addi addi qoomama dirrisa dandiitanno.

⁷Farcidhe ka'uhu gedensaanni, qile bale giddonni fulanno moyichi insa ledo olame qeele shaannonsa.

⁸Reeshshinsa Mootichinsa sutaminowa masalsanni Soddooma, woy Gibitse yinannihura lowo katamira hala'lado doogo aana diriiranno.

⁹Gosa gosatenni, ga're ga'retenni, addi addi afiinni coyi'ranno manninna sirchu sirchunkunni gamba yiino manni sase barranna darate reeshshansa la"anno. Waammannikki gedeno hoolanno.

¹⁰Kuri lamenti himanaano baattote noo manni aana lowo qarra abbitino daafira, mannu insa reyora hagiidhanno. Hagiirru jila ji'lanno; mimmitohono afansha uyi'ranno.

¹¹Ikkollana sasu barrinna daratu gedensaanni, heeshshote fooli Maganuwiinni daye lamunku reeshshi giddora ei. Insano ka'e lekkansanni uurritu; lai mannino lowo geeshsha waajji.

¹²Hakkunni gedensaanni lamunku himanaano, «Kawa higgine fulle!» yitannota gordunni dagginota lowo huuro macciishshitu. Baarigaarransa la'anna gomichu aana ofolte gordo fultu.

¹³Hakko mereero baatto lowo geeshsha huxidhu. Katamunniti tonnikki anga diigantu. Baattote huxi'ranni kainohunni 7,000 manni reyi; reyotenni gatinohu lowo geeshsha waajje gordu Magano ayirrisi.

¹⁴Layinki aanne'e sa'u; kuneeti sayikki aanne'e rakke dagganno.

¹⁵Lamalki sokkaasinchino xurumba ufuufi. Gordunni, «Kalqe baalate gashshooti, Mootichunnihanna Buurinosihunniha ikki. Isi hegere hegerera moohanno» yitannota batinye huuro macciishshummo.

¹⁶Maganu albaanni ayirradu barcimira ofoltinori lemiina shoolunku geerri alba higge kumbuulte,

¹⁷«Hee'roottohunna noottohu, Wo'manka Dandaattohu, Mooticha Magano! Lowo roorre angara qo'loottonna, mooha hanafootto daafira galaxxineemmohe.

¹⁸Daga hanqitu; ate aarino dayi. Reyitinorira yoo yaatto yanna iillitu; soqqamaanokki himanaanote, qullaawootahonna su'makki ayirrissannorira, shiimmaaddahonna jajjabbaho, daafurinsa guma aatto yanna daggu. Baatto huntannore hunatto yanna iillitu» yitanni magansidhu.

¹⁹Gordoho noohu Qullaawu Mini fa'nami; isihu gondooru taabootino hakkiicho leelli. Hatte yanna giddo banqo, belequ, gugatto, baattote huxi'ranna jajjabba kaade no.