Read Sidama_Qullaawa _Maxaafa YOHAANNIS AJUUJA 14 Bible Online

YOHAANNIS AJUUJA 14 - Sidama_Qullaawa _Maxaafa bible

YOHAANNIS AJUUJA 14

¹Laeemmo woyite, Ge'rechu Tsiyooni Ilaali aana uurre nooha afummo. Isihanna Annisi su'ma albinsara borreessinoonniri 144,000 manni isi ledo no.

²Lowo wayi foonchihunna banqote beleqi luuli gordunni daanna macciishshummo. Macciishshummo luuli gingilaatu gede suunannoho.

³Ayirradu barciminna shoole saada hattono geerru albaanni 144,000 manni haaro faarso faarsi. Tenne faarso kuri baattote aaninni wondoonnire agurranna rosa dandiinohu wolu dino.

⁴Meyate ledo foorte battaabbinokki daafira lago diafidhinoreeti. Insa Ge'rechu ha'rannowa baala hoodesi hadhanno. Maganohonna Ge'rechoho umi laalcho ikkite shiqqanno gede mannu giddonni wonde gatinsoonnireeti.

⁵Insa kapho coyidhe diegentino; minshannireno diafidhino.

⁶Hakkunni gedensaanni baattote aana noo gosara, ga'retenna addi addi afiinni coyi'ranno manni baalaho lallawate hegereti Danchu Duduwi sokka noosiha wole sokkaasincho gordu mereero buuwanna afummo.

⁷Isi qoonqosi naggi asse, «Yoosi barri iillinona Magano waajje; ayirrinyeno uuyyesi. Gordonna baatto, baaranna wayi bu'a kalaqinoha magansidhe!» yii.

⁸Layinki sokkaasinchi, «Dimbissannota foorrennita woyinete xajjesi gosa baalate hayikkisinohu bati'ru Baabilooni uwi! Uwi!» yaanni umi sokkaasinchi hoode ha'ri.

⁹Sayikki sokkaasinchino qoonqosi naggi asse, «Hakkuri moyichonna misilesi magansidhannori, albinsara woy angansara malaate wodhitinori baalu,

¹⁰Maganunnihura hanqu finiinchira worroonnita kaajjado woyinete xajje agganno. Qullaawa sokkaasinenna Ge'rechu albaanni giiranna ruqanu itannonsa.

¹¹Insa shetissanno giira giddonni fultanno wiliile hegere geeshsha iima higge tunnuuqqanno. Moyichonna misilesi magansidhannori, moyichu su'mi malaate wodhitinori baalu, hashshanna barra fooliishsho diafidhanno» yaanni hoodensa ha'ri.

¹²Maganu hajajo agadhannohunna Yesuusa amma'ne hee'rannohu Maganu manni cinca hasiissannosi.

¹³Gordunni, «Kune borreessi: Kunni ka'a Mootichunnire ikkite heedhe reyitannori baraadhinoreeti» yitanno huuro macciishshummo. Ayyaanu qole, «Ee! Daafuro fooliishshidhanno gede loosinsa hoode ha'rannonsa» yii.

¹⁴Hakkunni gedensaanni laeemmo woyite, waajjo gomicho afummo. Gomichu aana manchi beetto lawannohu ofolle no; umoho culku worraaqa wodhino; iibbitino haanto haa're no.

¹⁵Wolu sokkaasinchi Maganu mininni fule gomichu aana ofolle noohura qoonqosi naggi asse, «Yanna iillitinona haantokkinni midi; baattote aana noo jajji midate iillino!» yii.

¹⁶Gomichu aana ofolle noohu baattote aana noo jajja haantotenni mide gamba assi.

¹⁷Wolu sokkaasinchino gordoho noohunni Maganu mininni fuli; isino iibbitino haanto haa're no.

¹⁸Giirate aana roorre noosihu wolu sokkaasinchi kakkalote darginni fule iibbitino haanto haa're noo sokkaasinchira qoonqosi naggi asse, «Laalo le'inona, iibbitinota haantokki haadhe baattote aana noota woyinete hunduruurro muri!» yee coyi'ri.

¹⁹Sokkaasinchuno haantosi baattote aana tugi; woyinete hunduruurrono muri; hakkunni gedensaanni Maganu hanqi woyine huuncinannihura lowo kooffichira tugi.

²⁰Woyinete laalono katamaho gobbaanni noo kooffichira huuncini; huuncinanni dargi giddo, farashsho egemmitanno geeshshiti, seendille 300,000 qaafo ikkitanno mundee lolakku.