Read Sidama_Qullaawa _Maxaafa YOHAANNIS AJUUJA 15 Bible Online

YOHAANNIS AJUUJA 15 - Sidama_Qullaawa _Maxaafa bible

YOHAANNIS AJUUJA 15

¹Wole dhaggennihanna maalalete malaate gordoho afummo. Maganu hanqira goofimarcho ikkitinore, lamala goofimarchu qoomama haadhe noore lamala sokkaasine afummo.

²Hakkunni gedensaanni giirate ledo karsaminoha hincilaallotenni seekkinoonni baara lawannoricho afummo. Insano moyicho, moyichu misilenna su'misi kiiro qeeltinoreeti. Insa, Maganu uyinonsa gingilaate anga adhite hincilaallotenni seekkinoonni baara lawannorichi mule uurrite no.

³Insa Maganu soqqamaanchita Muse faarsonna Ge'rechu faarso: «Wo'manka Dandaattohu, Mooticha Magano! Loosikki dhaggetenna maalalete! Gosa baalate moote, dooggakki taalotenna halaaleho!

⁴Mooticha'ya, ate waajjannokkihunna su'makki ayirrisannokkihu ayeti? Qullaawu ate callaati. Halaalunniti yookki xawo fultino daafira, gosa baala dagge albakkiinni magansidhannohe» yite faarsitu.

⁵Hakkunni gedensaanni kune Farci'rote Dukkana ikkinohu Qullaawu Mini gordoho fa'name nooha afummo.

⁶Lamalanka qoomama haadhe noori, lamalanti sokkaasine Qullaawu Mininni fultu; insa bilicci yitannota waajjo seesu uddano uddidhe no; culkunni seekkinoonni uduunnicho gagasoho usudhite no.

⁷Shoolu kalaqami giddonni mittu hegere geeshsha hee'rannohu Maganu hanqi wo'minore lamala culkunni seekkinoonni gabatta lamalante sokkaasinera uyi.

⁸Hakkunni gedensaanni, Maganu ayirrinyinninna wolqasinni Qullaawa Mine wiliile wo'mitu. Lamalunku sokkaasinchi haadhe nooti lamalanku qoomami goofa geeshsha, ayino Qullaawu Minira ea didandiino.