Read Sidama_Qullaawa _Maxaafa YOHAANNIS AJUUJA 20 Bible Online

YOHAANNIS AJUUJA 20 - Sidama_Qullaawa _Maxaafa bible

YOHAANNIS AJUUJA 20

¹Hakkunni gedensaanni diime fannanni qulfenna lowo cagaage anga haa're noo sokkaasinchi gordunni dirranna afummo.

²Dhudhuufano amade kume diro usuri. Kuni dhudhuufi Daawuloosi, woy Sheexaane yinannihu bi're albi hamashshooti.

³Kumu diri goofa geeshsha manna so'risiisannokki gede, sokkaasinchu dhudhuufa diimete giddo tuge, cufe malaate aanaho wori. Kumu diri gedensaanni shiima yannara tidhama hasiissannosi.

⁴Hakkunni gedensaanni yoote roorre uyinoonniri ofolte noota ayirrado barcimma afummo. Yesuusi xawisino halaale farcidhinohuranna Maganu qaali daafira goowansa gorrinoonni manni lubbuwa afummo. Insa moyicho woy misilesi dimagansidhinoreeti; moyichu malaateno albinsaranna angansara diwodhitinoreeti. Insa reyotenni ka'e Kiristoosi ledo kume diro mookku.

⁵(Wolu reyino manni kayinni, kumu diri goofa geeshsha reyotenni dikaino.) Tini umi kaooti.

⁶Umi kaora beeqqaasine ikkitannori ba'raadhinoreetinna qullaawootaho; layinki reyo insa aana wolqa diafidhino. Insa Maganunna Kiristoosi qeesoota ikkitanno; isi ledono kume diro mookkanno.

⁷Kume diro ikkihu gedensaanni, Sheexaanu usurunni tidhame,

⁸baatto baalate wo'minoha Googinna Maagoogi yinanni manna so'risiisara shoolunku raginni olaho gamba assate fulanno. Kiironsa baaru shaafi geeshshite.

⁹Insano baatto baalate aana fincante Maganu manni qachanna isi baxanno katama doyissitu. Ikkollana gordunni giira dirrite guddunsa.

¹⁰So'risiisinonsahu Daawuloosi, moyichunna kaphaanchu himanaanchi tugantinowa ruqanunnihura giirate baari giddo tugami. Hakkiicho hashshanna barra hegere geeshsha shettote heeshsho heedhanno.

¹¹Hakkunni gedensaanni lowoha waajjo ayirrado barcimanna barcimu aana ofolle nooha afummo. Hatte yannara baattonna gordu albisinni xooqqu; higguwano dianfoonni.

¹²Reyinohu shiimmaaddunna jajjabbu manni ayirradu barcimira albaanni uurre nooha afummo. Maxaaffano fa'nantu; heeshshonnihu wolu maxaafino fa'nami. Reyino mannirano maxaaffate giddo borreessinoonni garinni loosinsara yoo yini.

¹³Baaruno giddosi nooha reyino manna fushshe uyi; reyonna jennaatuno giddonsa nooha reyino manna uyi. Mittu mittunku manchira loosisi garinni yoo yini.

¹⁴Reyonna jennaate giirate baari giddo tungi; kuni giirate baari layinkimeeshshu reyoti.

¹⁵Su'mansa heeshshote maxaafira borreessinoonnikkire baala giirate baari giddo tungi.