Read Sidama_Qullaawa _Maxaafa YOHAANNIS AJUUJA 21 Bible Online

YOHAANNIS AJUUJA 21 - Sidama_Qullaawa _Maxaafa bible

YOHAANNIS AJUUJA 21

¹Hakkunni gedensaanni haaro gordonna haaro baatto afummo. Umi gordinna umi baatto sa'ino. Kunni ka'a baaruno dihee'ranno.

²Qullaawu katami haaro Yerusaalame, adhannosehura seesse qixxaabbino seemo gede ikkite gordunni Maganuwiinni dirritanna afummo.

³Ayirradu barcimiwiinni, «Kune, Maganu hee'rannowi mannu mereero no! Maganu insa ledo hee'ranno; insano mannasi ikkitanno. Maganu umisi ledonsa hee'ranno; Maganonsano ikkanno.

⁴Hindiiddo baala illensanni feyanno; albi ikkito sa'ino daafira, reyo woy dadillu woy wi'la woy shetto kunni ka'a diheedhanno» yitannoti lowo huuro fultanna macciishshummo.

⁵Ayirradu barcimira ofollinohu, «Kune, ani baalanka coye haaro asseemmo» yii. Ledeno, «Kuni qaali hawaqi'nannihonna halaalehona borreessi!» yiie.

⁶Hakkunni gedensaanni, «Kune wo'mino! Umihunna goofimarchunnihu, albihunna gedensihu aneeti. Goo'rinohura heeshshote buichonni mittoreno baantikkinni mulla eemmosi.

⁷Qeelannohu konne baala ragi'ranno; ani Maganosi ikkeemmo; isino beetto'ya ikkanno.

⁸Ikkollana waajjaleeyye, amma'na noonsakkiri, battaabbinori, manna shitannori, foortannori, bittannori, kaphu maganna magansidhannorinna kaphaaleeyye baalate gawalo ruqanunnihura giirate baari giddooti; tinino layinkimeeshshu reyoti» yii.

⁹Lamala sokkaasine giddonni mittu, goofimarchunniri lamalu qoomami wo'mitinota lamala gabate anga haa're anewa daye, «Amo! Ge'rechu minaama ikkitino idayicho leellisheemmohena» yiie.

¹⁰Isi Ayyaanunni seeda lowo ilaala haa're masse"e, qullaawu katami Yerusaalame gordunni Maganuwiinni dirritanna leellishie.

¹¹Katama Maganu ayirrinyi xawisanni no; xawaabbisi hincilaallaamu dilqi gedeeho.

¹²Tonaalame waalcho afi'rinohu lowohunna seedu kinchu huxxi noosi; tonaa lamenka waalcho tonaa lamenti sokkaasine agarte no. Tonaalamunku waalchira tonaa lamente Israeelete ga're su'mi borreessame no.

¹³Soojjaati ragaanni sasu waalchi, aliyye ragaanni sasu waalchi, wodiidi ragaanni sasu waalchinna galchimi ragaanni sasu waalchi noosi.

¹⁴Kinchu huxxi tonaa lame safote kincho afi'rino. Tonaalamente safo aana tonaa lamenka Ge'rechu soqqamaasine su'ma borreessinoonni.

¹⁵Coyi'rie sokkaasinchi katama, katamu waalchuwanna kinchu huxxa bikkannota culku siqqicho anga adhe no.

¹⁶Katamu shoolenka raga godowanna hojja taaloho. Sokkaasinchu katama bikkinanni siqqonni bikke la"anno woyite, seendillisi 2,400 kiilo metire geeshsha ikki. Godowunna hojja hakkeeshsha ikkitu.

¹⁷Sokkaasinchu katamu huxxano bikki; egennamino bikkaasinchi garinni bikkanno woyite hojja[9] 144 cigile ikki.

¹⁸Huxxa huxxinoonnihu haanju dilqinniiti; katamuno hincilaallote gede xawannohunni filu culkinni minnoonniho.

¹⁹Katamunniti kinchu huxxi safo, addi addi dilqinni seesiinsoonnite. Umi safo haanju dilqinni, layinki safo bulu dilqinni, sayikki safo daamu xoxxorraamu kinchinni, shoolkita haanju xoxxorraamu dilqinni,

²⁰onti safo duumu dilqinni, leelki safo burcuqqaamu dilqinni, lamalki safo duumu burcuqqaamu dilqinni, settikki safo haanju dilqinni, honsi safo baqqalu dilqinni, tonnikki safo kooshimu dilqinni, tonaa mitikki safo kuulaamu dilqinninna tonaa layinki safo xiillichu dilqinni seesiinsoonni.

²¹Tonaalamunku waalchira tonaa lamu baaru giddonni haa'nanni dilqi no; mittu mittunku waalchi mittu baaru giddo dilqinni seekkinoonniho. Katamu doogo, hincilaallote gede xawaabba leellishannohunni filu culkinni seekkinoonnite.

²²Wo'manka Dandaanno Mootichi Maganunna Ge'rechu, Qullaawa Mine ikkitinohura, katamu giddo wole qullaawa mine diafoommo.

²³Maganu ayirrinyi xawanno daafiranna Ge'rechu caabbicho ikkino daafira, katamaho aganu woy arrishshote xawaabbi dihasiisanno.

²⁴Kalqe baalate gosa kunni xawaabbi giddo ha'rantanno; baattote mootoollano ayirrinyensa haadhe hakkiira abbitanno.

²⁵Hakkiicho hashshu nookki daafira, waalchuwa barra baala mitte higgeno dicufantanno.

²⁶Gosate jironna ayirrinyu hakkiira daanno.

²⁷Batte ikkino coyi horontanni hakkiira dieanno; batte loosannohunna kapho coyi'rannohu horontanni hakkiira dieanno. Hakkiira e'annori su'mansa heeshshonnihura Ge'rechu maxaafira borreessinoonnireetilla.