Read Sidama_Qullaawa _Maxaafa YOHAANNIS AJUUJA 22 Bible Online

YOHAANNIS AJUUJA 22 - Sidama_Qullaawa _Maxaafa bible

YOHAANNIS AJUUJA 22

¹Hakkunni gedensaanni sokkaasinchu Maganunna Ge'rechu barcimi ayirraduwiinni fulannoha hincilaallote gede xawannoha heeshshote wayi xashsho leellishie.

²Kuni wayi katamunnita lowo doogo hige lolahanno. Waaho lamenka widoonni dirunni tonaa lame higge aganu aganunkunni laaltannoti heeshshote haqqicho no; haqqichote daro gosa hursitannote.

³Kunni ka'a mayi gari rumono diheedhanno. Maganunna Ge'rechunnihu ayirradu barcimi katamu giddo hee'ranno; soqqamaanosino magansidhannosi.

⁴Albasino la'anno; su'misino albinsa aana hee'ranno.

⁵Kunni ka'a hashshu dihee'ranno; Mootichu Maganu xawisannonsa daafira, caabbichu woy arrishshote xawaabbi dihasiisannonsa. Insano hegere geeshsha mookkanno.

⁶Hakkunni gedensaanni sokkaasinchu, «Kuni qaali hawaqi'nannihonna halaaleho. Ayyaanasi himanaanote aanno Magani Mootichu, shiima yanna gedensaanni ikkanno coye soqqamaanosira xawise leellishanno gede sokkaasinchosi soyi» yiie.

⁷Yesuusino, «Kuneeti, ani rahe dayemmo; kunni maxaafi giddo nooha himanu qaale agadhannohu ba'raa'rinoho» yii.

⁸Konne coye macciishshoommohunna laoommohu ani Yohaannisiiti. Konne coye macciishshummonna laummo yannara, leellishie sokkaasincho magansi'rate lekkasi hunda kumbuulummo.

⁹Sokkaanchu kayinni, «Qorophi! Togo ikkitooti! Anino atenna himanaano roduuwikki ledo, kunni maxaafi giddo noo qaale agadhitannori ledo soqqamaanchohona, Maganoho kumbuuli!» yiie.

¹⁰Ledeno, «Yanna mule noo daafira, kunni maxaafi giddo nooha himanu qaale dibbe cuffooti.

¹¹Bunshe assannohu bunshesi assolla; batte loosannohuno battaawolla; dancha loosannohuno loosolla; qullaawuno qullaawa ikke hee'rolla» yii.

¹²Xaano qole, «Kune ani rahe dayemmo. Mittu mittunkura loosisi garinni aammora, loosisi gumi anewa no.

¹³Umihunna Goofimarchunnihu, Albihunna Gedensihu, Hanafonnihunna Jeefonnihu aneeti» yii.

¹⁴Heeshshote haqqicho laalo itatenna waalchuwate widoonni hige katama ea dandiitanno gede, uddanonsa hayishshidhannori ba'raadhinoreeti.

¹⁵Woshshu suudiri, bittannori, foortannori, manna shitannori, kaphu maganna magansidhannori, kapho baxxannorinna kaphu looso loossannori baalu katamaho gobbaanni gattanno.

¹⁶Yesuusi, «Ani konne coye farci'ranno gede sokkaasincho'ya beetekiristaannate soommo. Ani Daawiti rumushshootinna isi sirchooti; soodimaroho xawanno bakkalchooti» yii.

¹⁷Qullaawu Ayyaaninna idayicho, «Amo!» yitanno. Macciishshannohu baaluno, «Amo!» yoo. Goo'rinohu baalu dayo; hasi'rihu baalu heeshshote waa mittoreno baatikkinni calla adho.

¹⁸Kunni maxaafi giddo borreessinoonniha himanu qaale macciishshannoha baala qorophisiiseemmo. Ayino kunni qaali aana mittoreno lediro, Maganu kunni maxaafi giddo borreessinoonni qoomama ledannosi.

¹⁹Ayino kunni himanu maxaafi giddo borreessinoonni qaali aaninni mittoreno xeisiro, Maganu kunni maxaafi giddo kulloonni laalo heeshshote haqqichotanna Qullaawu Kataminni iillitannosi kaayyo xeisannosi.

²⁰Konne coye farci'rannohu, «Ee, rahe dayemmo!» yaanno. Hamii'ni! Mooticha Yesuusa, amo!

²¹Mootichu Yesuusi elto baalunku ledo heedho! Hamii'ni!