Read Sidama_Qullaawa _Maxaafa RUUTI 3 Bible Online

RUUTI 3 - Sidama_Qullaawa _Maxaafa bible

RUUTI 3

¹Hakkunni gedensaanni ballose Naoomi Ruuti, «Beetto'ya, mine assidhe galte afi'ratta gede ayiddaanna hasummahero woyyannoha lawinoe.

²Duugge xinqidhanna ledokki noo seenni soqqamannosihu Boeezi, ninkera gamba yiino fiixa ikkinota kunni albaanni kuloommahe. Kuneeti, isi techo hawarro hayixe ga'nanno.

³Kunnira bisokki hayishshidhe, shitto buudhi; maareekote uddanokkino uddi'ri. Hakkunni gedensaanni hayixe ga'nanno ayiddummewa mari. Kayinnilla hashshi hurbaati shiqeenna itenna age ka"a geeshsha hakkiicho noottata afoonkehe.

⁴Goxannowa buuxittahu gedensaanni goxano amaddannosi woyite, isiwa gamba yite lekkaallosiinni uddano fa'nite goxi. Ma"assinanniro isinni kulannohena» yituse.

⁵Ruutino, «Maahoyye, yoottare baala asseemma» yitu.

⁶Kunnira, Ruuti ayiddummenniwa marte ballose kultusente gede assitu.

⁷Boeezi itinna agihu gedensaanni hisanyootunni hee're, hayixu ataacha mule mare goxi. Ruutino sununni isiwa gamba yite, uddano fante lekkaallosiinni goxxu.

⁸Hashshu taalootira Boeezi hedeweelcho baqqi yee midaado higanno woyite, mitte mancho lekkasi mule goxxe noota afe,

⁹«Ati ayeti?» yee xa'mise. Iseno, «Mooticha'ya, ani Ruutiiti. Ati gamba yoottoe fiixa ikkoottoehuranna raggete aanoottoeha ikkootto daafira uddanokki diwie» yitusi.

¹⁰Boeezino, «Beetto'ya, Kaaliiqi maassi'rohe! Xaa geeshsha dureessu woy buxichu qeedhichira assi'ra agurte, kune albinni roore ayiddimmate halaale wonshootta.

¹¹Ruuti, ati xaate mittore qarrantooti; katamaho noo manni baalu danchummakki afino daafira xa'mi'rittare baala wonsheemmohe.

¹²Ani gamba yoommohe fiixa ikka'ya halaaleho; ate towatano hasiissannoe. Ikkollana, anenni roore gamba yaannohu wolu fiixi no.

¹³Sooda geeshsha agari; soodanno woyite hakku manchi raggete maahoyye yaannoronna hoogannoro xa'me afeemmona. Isi ragi'rannoheha ikkiro danchaho; giwannoha ikkiro kayinni, ani ragi'reemmohe gede Heeshshote Kaaliiqi su'minni xaareemmo. Xa kayinni sooda geeshsha goxi» yiise.

¹⁴Ruutino sooda geeshsha Boeezi lekkaallo goxxu. Boeezi kayinni ise ledosi noota anfara hasi'rinokkihura mannu goxinowiinni kaikkinni gutte ka'u.

¹⁵Boeezino, «Uddanokki qo'li!» yiise. Iseno uddanose qo'liteenna 20 kiilo ikkanno hayixe ee bayisiisise. Iseno Hayixe bayidhe katama higgu.

¹⁶Minira iillituta ballose, «Beetto'ya, maaho hiittooti?» yite xa'mituse. Ruutino, Boeezi assinosere baala kultuse.

¹⁷Qolteno, «Atewa mulla anganni higeemmakki gede konne baala hayixe uyinoe» yituse.

¹⁸Naoomino, «Beetto'ya, xa kuni coyi mare fulannowa afatta geeshsha cincatenni agari. Boeezi techo konne coye darga iillishikkinni diaguranno» yituse.