Read Sidama_Qullaawa _Maxaafa UMI SAAMUEELI 11 Bible Online

UMI SAAMUEELI 11 - Sidama_Qullaawa _Maxaafa bible

UMI SAAMUEELI 11

¹Amoonichu moote Naoosi fule Geleaadi nooha Yabiisi Katama gaangeessi. Yabiisi manni baalunku iso, «Ninke angakki galleemmona, ninke ledo gondooro ei» yitusi.

²Amoonichu Naoosi, «Ki'ne ledo gondooro e"eemmohu, mitti mitti'neta qiniiticho ille fushshe Israeele baala shollishummohu gedensaanniiti» yee dawari.

³Yabiisi geerri, «Israeele baalantewa manna soqqineemmona 7 barra uyinke; gatisankera daannohu hoogiro, ate anga galleemmo» yitusi.

⁴Sonkoonniri Saaooli noowa Gibia dagge konne coye mannaho kultuta, mannu baalunku qoonqosi naggi asse wi'li.

⁵Hatte yannara Saaooli hawuudhannowiinni handasi adhe minira higanni no. Isino, «Mannu maikkino? Mayira wi'lanno?» yee xa'mi. Mannuno Yabiisi manni yiinore kulisi.

⁶Saaooli konne coye macciishshita Maganu Ayyaani dirre wolqa wonshisi; isino lowo geeshsha hanqi.

⁷Mitte waaxa handa maala murmure, «Saaoolinna Saamueeli hoode fulannokkihu handa togo ikkite murmurantanno» yee maala tenne sokka ledo Israeele baalantera soyi. Kaaliiqino Israeelete manni baalunku lowo geeshsha waajjanno gede assi; mannuno gudisame Saaooli hoode fuli.

⁸Saaooli Bezeeqi yinanni darga Israeelete giddonni 300,000, Yihudunnino 30,000 olanto gamba assi.

⁹Yabiisi Kataminni daggino sokkaanora, «Hakko noo mannira, ‹Ga'a arrishsho gammuuttanno yannara gattine keere fultinanni› yitine kullensa» yii. Sokkaano hadhe konne coye kultunsata Yabiisi manni lowo geeshsha hagiidhi.

¹⁰Amoonootahono, «Ninke ga'a anga uyineemmo'ne; ki'neno hasidhini gede assitinankera dandiitinanni» yitunsa.

¹¹Hakko hashsha Saaooli olanto sasewa beehi. Olantono soodara rahita, Amoonootu qacha tayisse e'e arrishsho gammuutta geeshsha shakki assite guddu. Gattinorino mittu mittunkunni xooqqe ba'u.

¹²Mannu Saamueeli, « ‹Saaooli digashshannonke!› yituri ayeooti? Konne manna shineemmona abbi» yiisi.

¹³Saaooli kayinni, «Kuni barri Kaaliiqi Israeele gatisino barra ikkino daafira, techo ayino reyonke» yii.

¹⁴Hakkunni gedensaanni Saamueeli manna, «Amme Galgala marre, Saaooli mootenke ikkinota egensiinsona» yii.

¹⁵Mannu baalunku kae Galgala ha'ri; Saaooli mootimma Kaaliiqi albaanni egensiisi. Hakkiichonni mannu mittimmate kakkalo Kaaliiqira shiqishi. Saaoolinna Israeele baalanti hagiirru jila ji'litu.