Read Sidama_Qullaawa _Maxaafa UMI SAAMUEELI 12 Bible Online

UMI SAAMUEELI 12 - Sidama_Qullaawa _Maxaafa bible

UMI SAAMUEELI 12

¹Saamueeli Israeele baalantera, «Kuneeti, yitinoonnita macciishshe moote moohisoommo'ne.

²Moote ikke gashshanno'ne mancho kune afidhinoonni. Ani geedhoommo; wolqa'yano gooffino; ooso'yano jajjabba ikkitino; anje'yanni kayise xaa geeshsha gashshoommo'ne.

³Kuneeti alba'neenni noommona, Kaaliiqinna isi buurino moote albaanni hanni affinoonnire coyidhe. Bootosi adhoommohu nooni? Harrichosi adhoommohu nooni? Dogoommohu nooni? Miicoommohu nooni? Halaale beeshshe gubbo itoommohu nooni? Kunni yuummo coyi giddo assoommori mitturi nafa hee'riro qoleemmo'ne» yiinsa.

⁴Insano, «Didogoottonke; miicoottohuno dino; aye angannino adhoottori dino» yite dawartusi.

⁵Saamueelino, «Anga'ya mittoreno affinoonnikki gede techo Kaaliiqinna isi buurino moote naqaashshete» yiinsa. Insano, «Ee, Kaaliiqi naqaashshete» yitu.

⁶Saamueeli mannaho, «Ee, Musenna Aarooni doorinohunna Akaakka'ne Gibitsetenni fushshinohu Kaaliiqi isooti.

⁷Xa Kaaliiqi ki'nenna annuwa'ne gatisate assino dhagge daafira Kaaliiqi albaanni xa'meemmo'nena konniicho uurre.

⁸«Yaiqoobinna maatesi Gibitse hadhuhu gedensaanni gadadisseennansa annuwa'ne kaa'lannonsa gede Kaaliiqa huuccidhino. Kaaliiqino Gibitsete gobbanni fushshite konniicho heedhanno gede assitinonsare Musenna Aarooni soyinonsa.

⁹«Insa kayinni Maganonsa Kaaliiqa habbino daafira, Hatsoori Katamira olu hajajaancho ikkinohura Sisaarara, Filisxeemetenna Moaabi mootera sayise hirinonsa. Insano qasse qeeltinonsa.

¹⁰Hakkunni gedensaanni, ‹Cubbo loonsoommo; Kaaliiqa agurre Ba"aalinna Astaarooti magansi'noommo. Xa kayinni soqqammeemmohena diininke anganni gatisinke› yite Kaaliiqiwa higge raartino.

¹¹Kaaliiqi Yirubaeeli, Baaraaqi, Yofitahenna ane Saamueeli soye keere heedhinanni gede gaanagaawi'nera noo diini anganni gatisino'ne.

¹²«Amoonootu Moote Naoosi qasa'nera dayita kayinni, Magani'ne Kaaliiqi moote'ne ikke hee'reennanni, ‹Dee'ni, ninke moote hasi'neemmo› yitinoonni.

¹³«Xa doodhitinoonni moote kuneeti; xa'midhinoonni garinni Kaaliiqi iso uyino'ne.

¹⁴Kaaliiqa waajjitinironna magansidhiniro, yiinota macciishshitinironna hajajosi agadhitiniro, ki'nenna moote'ne Magani'ne Kaaliiqi hoode hadhiniro baalunku coyi seyanno'ne.

¹⁵Kaaliiqira hajajantinannikkihanna yiinota gibbinanniha ikkiro kayinni, hanqisi annuwa'ne aana dirrinte gede ki'ne aanano dirranno.

¹⁶«Kunnira, Kaaliiqi assanno dhaggeno la'inannina, heedhinoonni darginni ka'inoonte.

¹⁷Xa tini hee'noommo yanna birrate. Kayinnilla beleqonna xeena soyanno gede Kaaliiqa huucceemmo. Ki'ne moote moohisanno'ne gede xa'mi'ratenni Kaaliiqa mageeshshi geeshsha dadillissinoonniro kunninni affinanni» yiinsa.

¹⁸Hakkunni gedensaanni Saamueeli Kaaliiqa huucci; hakko barranni Kaaliiqi beleqonna xeena dirrisi. Kunnira mannu baalunku Kaaliiqanna Saamueeli lowo geeshsha waajji.

¹⁹Mannu baalunku Saamueeli, «Wolu loonsoommo cubbi ajikkinni, moote moohisannonke gede xa'mankenni lende cubbo loonsoommona, mootichanke ballo reyineemmokki gede Maganokki Kaaliiqa huuccinke» yiisi.

²⁰Saamueelino, «Waajjitinoonte; tenne baala bunshe assa'ne noote. Ikkollana Kaaliiqa wo'mu wodani'nenni magansidhesi ikkinnina isiwiinni faffinoonte.

²¹Kaphu maganna hoode hadhinoonte; insa tidhitinokkire ikkitino daafira kaa'lita'neranna gatissa'nera didandiitanno.

²²Kaaliiqi umisi manna assira'nera hede, bayiru su'misi daafira yee mannasi diaguranno.

²³Anino ki'ne daafira huucca agure Kaaliiqi aana sao asseemmokki gede isinni agaroe. Qoleno danchanna suwashsho doogo rosiiseemmo'ne.

²⁴Ki'ne Kaaliiqalla waajje; co'o yiino wodaninni ammanamatenni soqqammesi. Assino'ne dhagge baala habbinoonte.

²⁵Busha looso'ne agura hoogginiro kayinni, ki'neno moote'neno ba'inanni» yiinsa.