Read Sidama_Qullaawa _Maxaafa UMI SAAMUEELI 13 Bible Online

UMI SAAMUEELI 13 - Sidama_Qullaawa _Maxaafa bible

UMI SAAMUEELI 13

¹Saaooli Israeele 2 diro gashshihu gedensaanni,

²Israeelete giddonni 3,000 manna doori. Mikimaasinna Beeteli gaaraame gobbara isi ledo 2,000, Biiniyaami gobbara Gibia beettisi Yoonaataani ledo 1,000 manni no. Hakkuyi ka'i manna kayinni qae qaensa ha'risino.

³Yoonaataani Geeba yinanniwa noota Filisxeemete bagadaano qasi. Filisxeemeno konne coye macciishshitu. Saaoolino, gobba baala manna soye Ibiraawoota olaho xurumbunni lassinanni gede assi.

⁴Kunni garinni Israeele baalanti, «Saaooli Filisxeemete bagadaano qasino; Filisxeemeno Israeelete koma amaddino?» yaanno duduwo macciishshitu. Mannano woshshineenna Saaooli hoode fulara Galgala gamba yii.

⁵Filisxeemootu 3,000 gaarete farado, 6,000 faradi gaare gantannorenna baaru shaafi gede batidhino olanto adhite Israeele qassara xaaddu. Fulte Beetiaweenira soojjaatoonni Mikimaasi yinanniwa kunseentu.

⁶Israeelootu noo gari lowo geeshsha yaachishannoha ikkinotanna olantonsa yaaddote giddo noota affe dubboho, goddatenna ballate, boonnatenna gaattaa'luwate maaxantu.

⁷Ibiraawootu giddonni mitu mitu Yordaanoosi Waa fulte Gaadinna Geleaadi baatto widira higge xooqqu. Saaooli kayinni Galgalaho keeshshi. Ledosi noo olanto baala waajjite huxidhu.

⁸Isino Saamueeli uyinosi dinye garinni 7 barra agari. Saamueeli kayinni Galgala dayikkinni keeshshi. Olantono mittu mittunni Saaooli agurte billaallitu.

⁹Hatte yannara Saaooli manna, «Gudinse shilqinshanni kakkalonna mittimmate kakkalo abbe"e» yii. Isino gudinse shilqinshanni kakkalo shiqishi.

¹⁰Kakkalo shiqishe ka"anni hee'reennanni Saamueeli dayi. Saaoolino iso daae yaara fuli.

¹¹Saamueelino, «Kuni assoottohu maati?» yee xa'misi. Saaoolino daware, «Olanto billaallitinota, atino dinye dayittokkinni gatittotanna Filisxeeme Mikimaasi gamba yitinota afe,

¹²Kaaliiqa huucci'rummokkinni hee'reenna Filisxeeme konne Galgalaho dagge bala tuggannoe yee waajjoommo daafira qarrame shilqote kakkalo ani umi'ya shiqishoommo» yii.

¹³Saamueelino, «Gowwimmate looso loosootto; Maganikki Kaaliiqi uyinohe hajajo diagadhootto. Agadhoottoha ikkoommero, gashshootikki Israeelete aana geedonniha ikkannohu baino.

¹⁴Xa kayinni gashshootikki digeedanno. Kune, Kaaliiqi isi hedinore wonshanno mancho afi'rino. Ati hajajosi agadha gibbeenna, Kaaliiqi mannasi Israeele gashshanno gede iso doodhino» yii.

¹⁵Hakkunni gedensaanni Saamueeli Galgalunni kae ha'ri. Saaooli ledosi noo olanto ledo Galgalunni kae Biiniyaami gashshooti giddora Gibia ha'ri. Saaooli ledosi noo manna kiiri woyite, 600 geeshsha ikkino.

¹⁶Saaooli, beettisi Yoonaataaninna olantonsa Geeba gamba yitu. Hatte yannara Filisxeemete olanto kayinni Mikimaasi kunseente no.

¹⁷Filisxeemete olanto sasewa beehante horroho fultu. Mitte gaamo Ofira doogo amadde Shuaali widira higge hadhu.

¹⁸Layinki gaamo Beetihorooni widira, sayikkiti qolte halalli ragaanni higge Tseboyimi Lagicha eela qolte la'anni hadhu.

¹⁹Hatte yannara Filisxeemootu, «Ibiraawootu bise woy urde tunsiisidhoonke» yitino daafira, Israeelete baatto baalantera siwiila tumannohu dino.

²⁰Kunnira Israeele baalanti, maarasha, qotto, meesanenna haanto qorqorsiisi'rate Filisxeeme hadhanno.

²¹Maarashanna bushshu qotto qorqorsiisi'rate 8 giraame keenannoha kinchu birra baantanni. Meesanenna gatima qorqorsiisi'rate 4 giraame keenannoha kinchu birra baantanni.

²²Kunni daafira, olu kai barra Saaoolinna beettosi Yoonaataani agurranna, ledonsa noo olanto giddo bise woy urde amaxxinohu wolu mittuno dino.

²³Filisxeemeno mitte olu gaamo Mikimaasi sa'nanni farora agartanno gede sokku.