Read Sidama_Qullaawa _Maxaafa UMI SAAMUEELI 15 Bible Online

UMI SAAMUEELI 15 - Sidama_Qullaawa _Maxaafa bible

UMI SAAMUEELI 15

¹Saamueeli Saaooli, «Ate buure Israeelete mannira moohisiiseemmohe gede Kaaliiqi soyinoehu aneeti. Kunnira, Kaaliiqi yaannore macciishshi.

²Olantote Mootichi Kaaliiqi, ‹Israeele Gibitsetenni fultu yannara doogote aana gawajjitinonsa daafira, Amaaleqoota qorichisheemmo.

³Xa marte, Amaaleqoota qasi. Noonsare baala: Labbaaha, meyata, oosonna qaaqquulle, lalonna ge'reewo, gaalanna harre mittono gatisittokkinni co'o assite gudi› yiinohe» yiisi.

⁴Kunnira, Saaooli manna Xeleemi yinanni basera gamba asse kiiri. Kiirroonni manni giddo Israeeletenni 200,000, Yihudunnino 10,000 manni no.

⁵Saaoolino Amaaleqi Katama mare mittu lagichira gaa'le agari.

⁶Isino Israeele Gibitsetenni fultu waro kaa'litinonsare Qenaawoota, «Mitteenni gudeemmo'nekki gede Amaaleqootuwiinni baxxitine ho'le» yee sokka soyinsa. Qenaawootuno Amaaleqootuwiinni baxxitu.

⁷Hakkunni gedensaanni, Saaooli Amaaleqoota Ewulaaxisinni kayise soojjaati Gibitse Shuuri geeshsha iille qasi.

⁸Amaaleqootu moote Agaagi lubbotenni hee'reennanni qafade haa're abbino. Wole manna kayinni shakki asse gudino.

⁹Saaoolinna olantosi Agaagi, illete biifino ge'reewonna lalo, hardino siittanna ge'reewu wilii'le, seyinoha baala shaate dihasidhino. Mishaminohanna kaa'lannokkiha baala kayinni shite guddino.

¹⁰Hakkunni gedensaanni Kaaliiqi Saamueelira,

¹¹«Saaooli moohisiisa'yara dadilloommo. Isi ane agurino; hajajo'yano diwonshino» yii. Saamueelino yaade, hashsha wo'ma Kaaliiqa huuccanni gali.

¹²Saamueelino soodo gute kae Saaooliwa mari. Maranno woyite, «Saaooli Qermeloosi ha'rino. Bareendesira qaaggote ikkanno sooddicha kaase galagale Galgala dirrino!» yine kullisi.

¹³Saamueeli mare Saaoolinni xaadi yannara Saaooli, «Kaaliiqi maassi'rohe; anino Kaaliiqi hajajo wonshoommo» yiisi.

¹⁴Saamueeli kayinni, «Kuni wodanna macciishsheemmo ge'reewinna lali mayinnihoyya?» yee xa'misi.

¹⁵Saaoolino, «Olanto Amaaleqootuwiinni horrite abbitinoreeti; illete biifino ge'reewonna bootta Kaaliiqi Maganikkira kakkalate yite gatissino. Hakkuyi ka'ire kayinni co'o assine gundoommo» yee dawari.

¹⁶Saamueeli Saaooli, «Hanni agari, ankarro Kaaliiqi yiinoere kuleemmohena macciishshi!» yiisi. Saaoolino, «Maahoyyena kulie» yii.

¹⁷Saamueelino, « ‹Tidhoommori dinooho› yiittoro nafa, Israeelete ga're baalantera umo ikkootto. Kaaliiqi Israeelete moote ikkatto gede buurinohe.

¹⁸Qoleno, ‹Marte hakkore cubbaataamma Amaaleqoota shakki assi; qasse co'o assite gudi› yee soyinohe.

¹⁹Mayiraatiyya Kaaliiqira hajajama giwittohu? Adhinannirira hagaagganni Kaaliiqi giwanno coye mayira assitto?» yiisi.

²⁰Saaoolino qole, «Kaaliiqira hajajamoommo; yiinoe garinni ha're, Amaaleqoota baalanka gude mootensa Agaagi haa're abboommo.

²¹Olanto kayinni shine gundannihu giddonni illete biifinore, ge'reewonna bootta Galgalaho Maganikki Kaaliiqira kakkaltara haadhe abbitino» yii.

²²Saamueeli, «Kaaliiqi, hajajamantenni roore fushshaatenna kakkalo baxannoha lawannoheni? Hajajama kakkalotenni, macciishsha ge'rechu goci coominni roortanno.

²³«Kaaliiqira maahoyye giwa kiilu ledo mittete; qoxxisamano kaphu magano magansi'rate gedeeti. Ati Kaaliiqi yiinore giwootto daafira, isino mootimmatenni keeshshattota giwino» yiisi.

²⁴Hakkunni gedensaanni Saaooli Saamueeli, «Cubbo loosoommo; Kaaliiqi hajajonna ati yoottore hunoommo. Olanto'ya waajje insa yitinore assoommo.

²⁵Xa kayinni sao'ya agurattoe gedenna, Kaaliiqa magansi'reemmo gede ledo'ya Galgala ha'rattora huucci'reemmohe» yii.

²⁶Saamueeli kayinni, «Ledokki diha'reemmo; ati Kaaliiqi yiinore giwootto. Kaaliiqino Israeelete moote ikkite keeshshattota giwino» yiisi.

²⁷Saamueeli ha'rara kaita, Saaooli agure ha'rannosikki gede uddanosi qacce amadita uddano dadhantu.

²⁸Saamueelino, «Kaaliiqi Israeelete gashshoote techo ate anganni darino; atewiinni woyyannohura sayise uyino.

²⁹Ayirradu Israeelete Magani dikaphanno; yiinoreno disoorranno. Yiinore soorrate isi mannu gedeeha di"ikkino» yiisi.

³⁰Saaoolino daware, «Cubbo loosa'ya halaaleho. Ikkirino ballo, manni'ya sooreeyyenna Israeelete manni baalu albaanni shollishshootie; Maganokki Kaaliiqa magansi'reemmona ledo'ya kai» yii.

³¹Saamueelino ledosi ha'ri; Saaoolino Kaaliiqa magansi'ri.

³²Hakkunni gedensaanni Saamueeli, «Amaaleqootu moote Agaagi haadhine anewa abbe» yii. Agaagino, «Hada reyo togo qaraartanno?» yee huxi'ranni dayi.

³³Saamueelino, «Bagadikkinni meento ilaweeloota asittonte gede, amakkino meentu giddo ilaweelo ikkitanno» yee Agaagi Galgalaho kakkalote dargira albaanni doddoli.

³⁴Hakkunni gedensaanni Saamueeli kae Raama ha'ri. Saaooli kayinni minisira Gibia ha'ri.

³⁵Hakko barrinni kayise reya geeshsha Saamueeli Saaooli illetenni diafino; ikkollana mararinosi daafira wi'lanni keeshshino. Kaaliiqino Saaooli Israeelete moohisasira dadilli.