Read Sidama_Qullaawa _Maxaafa UMI SAAMUEELI 16 Bible Online

UMI SAAMUEELI 16 - Sidama_Qullaawa _Maxaafa bible

UMI SAAMUEELI 16

¹Kaaliiqi Saamueeli, «Israeelete moohe hee'rannokki gede giwoommohura Saaoolira mamooti geeshsha wi'latto? Zayite buudaho wonshite Beeteliheme Isseyiwa mari; oososi giddonni mitto moote ikkanno gede layi'roommo» yiisi.

²Saamueeli kayinni, «Konne coye hiitto asseemmo? Saaooli afiro dishaannoe?» yii. Kaaliiqino, «Mitticho adde haadhe hadhe, ‹Kaaliiqira kakkalammora dayommo› yii.

³Isseyino kakkalote koyisi. Hakkunni gedensaanni assattore kuleemmohe. Ani kuleemmoheha buurte moohisiisattona» yiisi.

⁴Saamueelino Kaaliiqi yiino gede assi. Beeteliheme iillanni hee'reennanni katamu geerri waajjite qece yitanni haadhasira shiqqu. Insano, «Maaho, keerunkunni dayitto?» yite xa'mitusi.

⁵Saamueelino, «Ee, keerunkunnilla dayommona, Kaaliiqira kakkalo shiqishammoraati. Ki'neno umo'ne keereensidhine ane ledo kakkalonniwa amme» yiinsa. Hakkunni gedensaanni Isseyinna oososi keereense, kakkalonniwa dagganno gede koyisinsa.

⁶Isseyinna oososi hakkiira iillituta Saamueeli Eeliyaabi lae, «Addinta Kaaliiqi doorino manchi kune albasiinni uurre no!» yee hedi.

⁷Kaaliiqi kayinni Saamueeli, «Ani iso dihasi'roommona, danasinna uurrinshasi la'ooti. Ani mannu la"anno garinni dilaeemmo; mannu aaniido la"anno; ani kayinni wodana laeemmo» yiisi.

⁸Hakkunni gedensaanni Isseyi Aminaadaabi woshshe Saamueeli albaanni sa"anno gede assi. Saamueeli kayinni, «Kaaliiqi konneno didoorino» yii.

⁹Qoleno Isseyi Saama haa're abbi. Saamueeli qole, «Kaaliiqi isono didoorino» yii.

¹⁰Isseyi lamalanta ooso Saamueeli albaanni higge sa'anno gede assi. Saamueeli kayinni, «Kaaliiqi kuri giddonni doorinohu dino» yii.

¹¹Hakkiinni aanche, «Oosokki kageeshshaatillani?» yee xa'misi. Isseyino, «Maa'niidihulla gatino; isino ge'reewo allaalara ha're no» yee dawari. Saamueelino, «Isi dayikkinni kakkalo dishiqinsheemmona, rakke woshshiishi» yii.

¹²Kunnira, Isseyi manna soye abbisiisi. Isino mundee xawadohonna illuwa xu'mannoho. Kaaliiqi Saamueeli, «Dooroommohu konneetina ka'e buuri» yiisi.

¹³Saamueelino buudaho noo zayite haa're roduuwisi albaanni buurisi. Hakko barrinni kayise Kaaliiqi Ayyaani Daawiti aanira dirre wolqa wonshisi. Saamueelino kae Raama ha'ri.

¹⁴Kaaliiqi Ayyaani Saaooli aaninni ho'leenna, Kaaliiqino qarrisannosiha busha ayyaani soyi.

¹⁵Saaooli soqqamaano, «Kuneeti, Maganu soyinohu bushu ayyaani shetisanni noohena,

¹⁶bagana ganannoha hanseemmohe gede, ninke soqqamaanokki hajajinke. Maganu soyinohu bushu ayyaani qarrisannohe woyite bagana ganiro fayyannohe» yitusi.

¹⁷Saaoolino soqqamaanosi, «Bagana seekke ganannoha hassine abbe"e» yii.

¹⁸Soqqamaanosi giddonni mittichu, «Bagana seekke ganannoha Beetelihemete manchi Isseyi beetto afoommo; isino bareedahonna bagadaanchoho; biifadohonna coye egenninoho; Kaaliiqino ledo noosiho» yee dawari.

¹⁹Saaoolino, «Ge'reewo allaalannoha beettokki Daawiti soyie» yee Isseyiwa manna soqqi.

²⁰Isseyino harrichoho sagale hogowe, okolete wo'ma woyinete xajjenna aja meichu goco anga wore Daawiti Saaooliwa soyi.

²¹Daawitino Saaooliwa daye soqqanshosi hanafi. Saaoolino Daawiti lowo geeshsha baxe, bagadosi duhannoha assi'risi.

²²Hakkunni gedensaanni Saaooli, «Daawiti baxoommosina anewa hee're soqqamannoe gede agurie» yee Isseyiwa soqqi.

²³Bushu ayyaana Maganu soyenna Saaooliwa daanno yannara, Daawiti bagana haa're gananno. Hatte yannara, bushu ayyaani aanisinni ho'lanno daafira Saaooli fayyo ikkanno.