Read Sidama_Qullaawa _Maxaafa UMI SAAMUEELI 17 Bible Online

UMI SAAMUEELI 17 - Sidama_Qullaawa _Maxaafa bible

UMI SAAMUEELI 17

¹Filisxeemootu olantonsa Yihudaho Sokko yinanni katamira olaho gamba assidhe, Sookohinna Azeqa yinanni katamma mereero Efisidemiimi yinanni darga dukka'nitu.

²Saaoolinna Israeele kayinni gamba yite Ella yinanni lagichira dukka'nite, Filisxeemete ledo olantara base basensa amaddu.

³Lagichu mereeroho hee'reenna Filisxeeme mitto gaara, Israeele wole gaara amaddu.

⁴Gaati Kataminni dayinohu bagadaanchu Gooliyaadi yinanni manchi Filisxeemete qachinni fule Israeele uggi. Kuni manchi hojja 6 cigilenna taakko ikkanno.

⁵Umohono camotenni seekkinoonni gullee wodhe, 57 kiilo ikkitannota camotenni seekkinoonni uddano olunnita uddi'rinoho.

⁶Lekkasira camote gambaalle wodhe, camote bise qoteho suxxe no.

⁷Amaxxosi daabbi wenenchu geeshshiho; amaxxosi daabbiweelo 7 kiilo ikkitanno; wonqosi duhinohuno albasiinni ha'ranni no.

⁸Gooliyaadi kae uurre Israeelete olantora, «Olaho mayira fultini? Ani Filisxeemete bareedaati; ki'neno Saaooli borojjeeti. Ane ledo olamannoha mitto mancho doortine sokke.

⁹Ane ledo olama dandiironna ane shiiro, ninke borojje'ne ikkineemmo. Ani iso qeelummoronna shuummoro kayinni ki'ne ninke borojje ikkitinanni» yee coyi'ri.

¹⁰Qoleno, «Techo Israeelete olanto uggeemmo; ane ledo olamanno mancho sokke» yii.

¹¹Saaoolinna mannisi konne coye macciishshite lowo geeshsha waajjite huxidhu.

¹²Daawiti Yihudaho Beetelihemete hee'rannohu Efiraatichu Isseyi ilinoho. Isseyira 8 labballi ooso noosi. Saaooli moohi yannara Isseyi diro xiiwino manchooti.

¹³Sasu bayirraaddu Isseyi ooso Saaooli ledo olaho hadhe no. Bayiriidihu Eeliyaabiiti; layinkihu Aminaadaabiiti; sayikkihu Saamaati.

¹⁴Daawiti kayinni wo'munkura maa'neho. Sasunku bayirraaddu roduuwisi Saaooli hoode hadhe heedheenna,

¹⁵Daawiti kayinni annisi ge'reewo allaalara Saaooliwiinni kae Beeteliheme ha'ri.

¹⁶Filisxeemichu 40 barra wo'ma hawarronna soodo albansaanni fule leellami.

¹⁷Hatte yannara Isseyi Daawiti, «Ballo konne 10 kiilo xoxxoonna 10 timma haadhe olunniwa noorira roduuwikkira rakke massinsa.

¹⁸Tenne 10 burbuxxu loowono ledo gaamonsa gaadaannira haadhe massi. Roduuwikki hiitto nooro la'e, keere noo gedeenni dagge kulie.

¹⁹Insa Saaoolinna Israeelete manni baalunku ledo Ella Lagichira Filisxeemootu ledo olantanni no» yiisi.

²⁰Daawiti soodo gute kae, ge'reewono woleho wodhe, Isseyi yiinosi sagale haa're ha'ri. Israeelete olantono alaakkanni darga dargansa amaddanni heedheenna mare olu qacha iilli.

²¹Israeelenna Filisxeemeno darga dargansa amadde geeqantu.

²²Daawiti angasi noo sinqe agarannohuwa wore dodanni olunniwa mare, roduuwasi keere haa'ri.

²³Insa ledo hasaawanni hee'reenna hedeweelcho, bagadaanchu Filisxeemichi Gooliyaadi rosisinte gede alba hige daye boollaqi'ranni Israeele hasiisi. Daawitino konne coye macciishshi.

²⁴Israeeleno Gooliyaadi affe lowo geeshsha waajjite albisinni xooqqu.

²⁵Qolteno insa insanaawa, «Kuni manchi xaa xaanni daanni Israeele ugganno gara la'ini? Konne mancho shaannohura moote lowo jironna beettosi aannota coyi'rino. Annisi godowi geeshshi gabbarikkinni hee'rannotano kulino» yite hasaabbu.

²⁶Daawitino mulesi uurre noo manna, «Afummona, konne Filisxeemicha shee konne shollinye Israeelete aaninni hoolannohura ma"assinannisi? Qoleno, Heeshshote Magani olanto uggannohu isi kuni Magano afinokki Filisxeemichi ayeti?» yee xa'mi.

²⁷Insano, Gooliyaadi shaannohura moote assara hedinore kultusi.

²⁸Bayiriidi rodiisi Eeliyaabi, Daawiti mannu ledo hasaawanni noota afe lowo geeshsha hanqe, «Konniicho ma"assitanni nootto? Hakkonne ge'reewo halalla ayera agurte dayotto? Naaxxakkinna wodanikki bunshe afoommo; dayottohu ola la"attoraatillana» yiisi.

²⁹Daawitino, «Hanni ani ma hunummo? Xa'ma nafa didandeemmo?» yii.

³⁰Xaano wole manna hatte xa'monni xa'mi; mannuno albinte gede yee qolisi.

³¹Saaoolino Daawiti coyi'rino coye macciishshe, manna soye woshshiishisi.

³²Daawitino Saaoolira, «Konne Filisxeemicha waajje ayino masoonke; ani mare iso qaseemmona» yii.

³³Saaoolino daware, «Ati oosichoho; kuni manchi kayinni anjesinni kayise bagadu ledo keeshshinohona, isi ledo olama didandaatto?» yiisi.

³⁴Daawiti kayinni Saaoolira, «Ani anni'ya ge'reewo allaale hee'reenna, doobbiichu woy wolu moyichi ge'reewo amade adhe ha'ranno woyite,

³⁵faana gane mare afiinni kareemmo. Alba higiero kokkesi qalxe amade gane sheemmo.

³⁶Ani doobbiichonna wole gawajjanno moyicho shoommohu, Heeshshote Magani olanto ugginoha konne maganiweelo Filisxeemicha hiitto shaa hoogeemmo?

³⁷Doobbiichu kottenninna wolu moyichi keltinni gatisinoehu Kaaliiqi xaano kunni Filisxeemichi anganni gatisannoe» yiisi. Saaoolino, «Maahoyye, Kaaliiqi ledokki hee'rona marixa» yiisi.

³⁸Hakkunni gedensaanni Saaooli Daawitira giddoyidi uddano fushshe uyisi; siwiilunnita olu uddanono uddisiisisi; camote gulleeno umoho worisi.

³⁹Daawitino hattoo uddano uddi're egenninokki daafira, bise uddanote aanaanni suxxe ha'rara kai. Saaoolirano, «Rosoommokki daafira kore uddi're olame diafeemmoa» yee, baalankare fushshe hoo'li.

⁴⁰Hakkunni gedensaanni siqqo anga adhe, 5 qunqumadda kinna xashshu gaminni doore haa're ogorisira wodhi; corqaayyesino adhe Filisxeemichunniwa mari.

⁴¹Gooliyaadino wonqosi amadannoha albaanni qo'le, Daawitiwa shiqqi shiqqi yaanni dayi.

⁴²Isino Daawiti geeqe lae, mundee xawadonna shiima beetto ikkino daafira mishisi.

⁴³Filisxeemichu Daawiti, «Siqqo adhite daattoehu ani woshicho lawummohe?» yee magannasi su'minni rumisi.

⁴⁴Qoleno, «Hanni anewa shiqqi yii! Maalakki allaattetenna moyichoho eemmohena» yiisi.

⁴⁵Daawitino Filisxeemichaho, «Ati bise, urdenna habbarra adhite daattoena, ani kayinni ati qoxxisittohunni, Israeelete olanto Magano ikkinohunni, Wo'manka Dandaanno Kaaliiqi su'minni dayemmohe.

⁴⁶Kaaliiqi techo ate anga'yara sayise aannohe; anino gane kare goowakkino mure tayiseemmo. Techo barrinni Filisxeemete olanto reeshsha allaattetenna moyichoho eemmo. Daga baalano Maganu Israeelete ledo noota affanno.

⁴⁷Konne noori baalunkuno, Kaaliiqi bisetenni woy urdetenni gatisannoha ikkinokkita affanno. Olu Kaaliiqiha ikkino daafira baalanka angankera sayise aanno» yiisi.

⁴⁸Gooliyaadi qasasira shiqqi yiita, Daawiti Filisxeemete ledo olammanniwa olu xawo rahe mari.

⁴⁹Ogorisi giddonni mitto kincho haa're corqaayyesira wori. Filisxeemichaho ole alba gane umu dhoosi; manchuno alba hige gombisame uwi.

⁵⁰Kunni garinni Daawiti anga bise nookkiha corqaayyetenninna kinchu callunni Filisxeemicha gane kari.

⁵¹Dodanni mare kade aanaho uurre, Filisxeemichu bise kou giddonni fushshe, goowasi mure shii. Filisxeemootuno bareedinsa reyinota affe xooqqu.

⁵²Hakkunni gedensaanni Israeelennihunna Yihudu manni kae adawadhanni Filisxeemoota Gaatinna Eqirooni waalchi geeshsha shorritu. Reeshshinsano Shairayiminni kayise Gaatinna Eqirooni geeshsha dooggate aana waxaaxi.

⁵³Israeeleno Filisxeemoota shorra agurte higge, olunniha Filisxeemete qacha saantu.

⁵⁴Daawitino Filisxeemichu umo haa're Yerusaalame abbi. Filisxeemichu bagado kayinni dukkanisi giddo wodhi.

⁵⁵Daawiti Filisxeemichunni xaadara ha'ri yannara, Saaooli olantote hajajaancho Abeneeri woshshe, «Kuni beetti ayeho?» yee xa'mino. Abeneerino, «Halaalikki afoe; ani diegennoommo» yee dawarisi.

⁵⁶Mooteno, «Hanni kuni beetti ayehoro xa'misiisse afi» yiisi.

⁵⁷Daawiti Filisxeemicha shee higanni hee'reennanni, Abeneeri haa're mootenniwa massisi. Hakkawoyite Daawiti Gooliyaadi umo anga haa're no.

⁵⁸Saaoolino, «Koo beetto ati ayeho?» yee xa'misi. Daawitino, «Ani Beetelihemete manchi soqqamaanchikki Isseyi beettooti» yee dawari.