Read Sidama_Qullaawa _Maxaafa UMI SAAMUEELI 18 Bible Online

UMI SAAMUEELI 18 - Sidama_Qullaawa _Maxaafa bible

UMI SAAMUEELI 18

¹Daawiti Saaoolira xa'minore qolihu gedensaanni, Yoonaataani ledo lamunku lubbote jaalla ikkitu; Yoonaataanino lowo geeshsha baxisi.

²Hakko barrinni kayise Saaooli Daawiti annisi minira ha'ra hoole, ledosi hee'ranno gede assi.

³Yoonaataani lubbimma baxinosi daafira, Daawiti ledo gondooro ei.

⁴Yoonaataani giddoyidi uddano, olu uddano, bise, digaananna qodhinanniha mitteenni Daawitira uyisi.

⁵Saaooli soyannosi sokka baala danchu garinni wonshanno daafira, Daawiti olantote albisa assisi. Konne coye roorrootunna olanto baala macciishshite baxxu.

⁶Daawiti Filisxeemicha shiihu gedensaanni, olantono mini mininsara higganni heedheenna, meentu dibbenna maasinqo haa're faarsanni, sirbanninna ilillisanni, Israeelete katamma baalantenni kae Saaoolira shiqi.

⁷Meentuno, «Saaooli kume shiino; Daawiti kayinni tonne kume shiino» yaanni sirbi.

⁸Saaooli yinoonnita baxinokki daafira lowo geeshsha hanqi. Kunnira, « ‹Daawiti tonne kume shiino!› ane kayinni, ‹Mitto kume calla shiino!› yiina, tenne ane darga dimoohisalla gattinonsa?» yii.

⁹Hatte yannanni kayise Saaooli Daawiti hinaasu illenni lai.

¹⁰Layinki soodo Maganu soyinohu bushu ayyaani Saaooli aana wolqatenni dirri. Daawitino albinte gede bagana gananni hee'reenna, Saaooli minesi hee're macharaarinohu gede ikke coyi'rami. Hatte yannara Saaooli anga amaxxo amade no.

¹¹Qoleno, «Xarrate ledo laddeemmo» yee hede Daawitira amaxxo 2 hige tuqqi. Daawiti kayinni lamentera miliqe gati.

¹²Kaaliiqi isiwiinni baxxe Daawiti ledo noo daafira, Saaooli Daawiti waajji.

¹³Kunnira Daawiti mulisinni fafisi'rara yee kumu roorricha asse soyisi. Daawitino olantosi hoodete adhe gaadoho fuli.

¹⁴Kaaliiqi ledosi noo daafira assannori baalu qiniisi.

¹⁵Saaoolino Daawitira coyi baalu qiniinosita afe waajjisi.

¹⁶Olaho ha'rannanna higanna qiniinosi albisa ikkino daafira, Israeele baalantinna Yihudu manni kayinni Daawiti baxisi.

¹⁷Saaooli Daawiti, «Bayira beetto Meroobi yinanniti nooe; ati bareendekkinni jawaatte Kaaliiqi ola olantanni soqqamittoero, ise eemmohe» yiisi. Hatto yiinohuno wodanisinni, «Filisxeemootu shitosi ikkinnina ani disheemmosi» yee hedino daafiraati.

¹⁸Daawiti kayinni Saaoolira, «Mootete beetto adheemmohu ani ayeti? Ayiddi'yano Israeelete giddo dianfiho?» yii.

¹⁹Ikkollana Meroobi Daawitira uyinanni yanna iillituta, Mehola yinanni kataminni dayinohura Adirieeli yinanni manchira uyini.

²⁰Hatte yannara Saaooli beetto Melkooli Daawiti baxxusi. Saaoolino konne coye macciishshe hagiidhi.

²¹Saaoolino wodanisinni, «Ise ee woshshaado ikkitannosi gede asseemmo. Hakkunni gedensaanni iso Filisxeemootu anga reyanno gede asseemmo» yee hedi. Kunnira Saaooli Daawiti layinkimeeshsho woshshe, «Xaano kune beetto'ya eennahe ballo'ya ikkatto» yiisi.

²²Hakkunni gedensaanni Saaooli ledosi gashshaano, «Daawitira, ‹Kuneeti moote ate baxino; gashshaano baalantino baxxannohe. Kunni daafira beettosi adhi› yitine maaxxine kullesi» yee hajajinsa.

²³Insa tenneno Daawitira ledde kultusi. Daawiti kayinni, «Isi afummona, mootete ballo ikka mullareetini? Ani hakkeeshshi geeshsha diegennamoommoho; qoleno buxichoho» yiinsa.

²⁴Saaoolira, ledosi gashshaano Daawiti yiinore kultusita,

²⁵Saaooli, « ‹Ani beettote miinera, diina'ya rabbisoottota egensiisate 100 Filisxeemoota qaarte qaaro haadhe daattoralla hasi'reemmo yiino› yitine kullesi» yiinsa. Saaooli tenne hedinohu Daawiti Filisxeemootu anga reyanno gede hasi'reeti.

²⁶Ledosi gashshaasine konne coye Daawitira kultusita, mootete ballo ikkara halchinoonnisi daafira hagiidhi. Kunnira, beetto uyinasira hendoonni barri dayikkinni,

²⁷Daawitinna olantosi gaadde 200 Filisxeemoota shitu. Daawitino mootete beetto adhara, haa're dayinoha Filisxeemootu shigga kiirotenni Saaooli albira shiqishi. Hakkunni gedensaanni Saaooli beettosi Melkooli Daawitira uyisi.

²⁸Saaooli, Kaaliiqi Daawiti ledo nootanna Melkoolino baxxinosita afe,

²⁹albinni roore waajjisi. Qoleno reya geeshsha diina ikkisi.

³⁰Hakka waro, Filisxeemete olanto wo'manka woyite olaho fultanno. Wolootu olu hajajaano Saaoolitenni roore Daawiti qeelle afi're maccaha ikki.