Read Sidama_Qullaawa _Maxaafa UMI SAAMUEELI 19 Bible Online

UMI SAAMUEELI 19 - Sidama_Qullaawa _Maxaafa bible

UMI SAAMUEELI 19

¹Saaooli Yoonaataaniranna ledosi gashshaanora Daawiti shinanni gede hedinota kulinsa. Yoonaataani kayinni Daawiti lowo geeshsha baxannosi daafira,

²«Anni'ya Saaooli shaahera injo hasi'ranni noona ga'a soodo umokki agadhate mittowa marte maaxami.

³Anino fule gate ati maaxante noottowa anni'ya ledo uurre, atere hasaaweemmosi; yaannoreno hakkunni gedensaanni kuleemmohe» yiisi.

⁴Yoonaataani annisi Saaoolira Daawiti danchumma hasaawanni, «Ati soqqamaanchikki Daawitira busha maltooti; isi atera lowo danchumma assinota ikkinnina huninoheri dino.

⁵Filisxeemicha shiinohu nafa umosita mitte assi'reeti. Kaaliiqi isi widoonni qole Israeele baalate bayira qeelle uyino. Atino konne coye affe hagiidhootto. Beebbatenni konne keeraancho shite mayira cubbamatto?» yiisi.

⁶Saaooli Yoonaataani yiinota macciishshihu gedensaanni, «Heeshshote Kaaliiqi halaaleeti! Daawiti dishinanni» yee xaari.

⁷Yoonaataanino Daawiti woshshe, hasaabbinore baala kulisi. Saaooliwano haa're abbisi; Daawitino albinte gede Saaoolira soqqami.

⁸Xaano wolu oli kaeenna, Daawiti fule Filisxeemoota qasi. Insano lowo geeshsha gawajjino daafira xooqqe gooffu.

⁹Mitto barra, Saaooli amaxxosi anga adhe mine ofolle hee'reenna, Kaaliiqi soyinohu bushu ayyaani daye amadisi. Daawitino bagana gananni hee'reenna,

¹⁰Saaooli xarrate ledo laddasira hede amaxxo oli. Daawiti kayinni miliqeenna amaxxo marte xarrate lixxi yitu. Daawitino fule xooqi.

¹¹Saaooli hakko hashsha Daawiti mine gaangeessite galte soodimaroho shitannore soyi. Daawiti galte Melkooli kayinni, «Lubbokki gatasi'rate kunni hashshinni ba"a hoogittoro, ga'a reyitanni nootto» yite kultusi.

¹²Melkooli Daawiti masikootete giddoonni qolte fushshiteennasi fule xooqi.

¹³Hakkunni gedensaanni, Melkooli magansi'nanni misile haadhe daallasu aana haawiissite umaalloonni meu orda worte uddano aanaho dibbu.

¹⁴Saaooli soyino manni Daawiti amadara dayita Melkooli, «Isi dhiwame goxe no» yitunsa.

¹⁵Saaoolino Daawiti la"anno gede manna galagalche soye, «Sheemmona daallasunkunni haadhine abbe» yii.

¹⁶Sonkoonniri minira e'anno woyite, misile daallasu aana haawiissine umaalloonni meu orda worreenna no.

¹⁷Saaoolino Melkooli, «Baarigaari'ya ba"anno gede assite togo mayira dogittae?» yee xa'mise. Melkoolino, « ‹Baeemmo gede kaa'lie; giwittaro kayinni sheemmohe› yeennaeeti» yite dawartusi.

¹⁸Daawiti xooqe Raama Saamueeliwa mare, Saaooli assinosire baala kulisi. Hakkunni gedensaanni lamunku marte Neyooti yinanni qachira heedhu.

¹⁹Saaoolirano, «Kune Daawiti Raama Neyooti qachira no» yine kullisi.

²⁰Saaoolino Daawiti amaddannore soyi. Martanno woyite kayinni, himanaano Saamueeli albisanna hagiirrunni kukkubbitanni himana coyidhanni noota affu. Maganu Ayyaani Saaooli manni aanano dirreenna, insano hakkunni garinni himana coyidhu.

²¹Saaooli konne coye macciishshe wole manna soyi. Hakkurino hagiirrunni kukkubbitanni himana coyidhu. Sayikkimeeshshono lede manna soyi. Hakkurino albiri gede ikkite himana coyidhu.

²²Hakkunni gedensaanni Saaooli umisi kae Raama ha'ri. Sekku yinanni darga nootewa jawa wayi balewa iille, «Saamueelinna Daawiti hiikko no?» yee xa'mi. Mittu manchi, «Raama Neyooti qachira no» yee kulisi.

²³Saaoolino Raama Neyooti qacha mare iilli. Maganu Ayyaani isi aanirano dirri. Neyooti iilla geeshsha hagiirrunni kukkubbanni himana coyi'ranni ha'ri.

²⁴Isino uddanosi mulqi're Saamueeli albaanni hagiirrunni kukkubbanni himana coyi'ri. Kunni garinni hashshanna barra wo'ma mullichu goxe keeshshi. «Saaoolino himanaanote ledohoni?» yine maammaankannihu kunniraati.