Read Sidama_Qullaawa _Maxaafa UMI SAAMUEELI 2 Bible Online

UMI SAAMUEELI 2 - Sidama_Qullaawa _Maxaafa bible

UMI SAAMUEELI 2

¹Haanna huuccidhanni, «Kaa'lokkinni hagiirsiisoottoe daafira, wodani'ya ate Kaaliiqinni hagiidhi. Haxo'yano gotti yitu; baarigaarra'ya albaanni afii'ya fa'ni.

²Kaaliiqa, ate gedeehu qullaawu ayino? Ate gedeehu wolu dino; ate Maganinke gedeehu golu dino.

³«Manna'ya, naaxxate coyi afii'nenni fuloonke; afii-wo'mano coyidhinoonte. Kaaliiqi Maganu egennaamohona, mannu looso baala keene la"annohu isooti.

⁴«Wolqaataammu qari hiiqqamanno; wolqiweelootu kayinni wolqa lexxitanno.

⁵Duubbe heedhannori hudidhe mannaho soqqantanno; hudidhe heedhannori sagale duubbanno. Gaana lamala iltanno; lowo ooso ama ilaweeltanno.

⁶«Kaaliiqi shaanno; lubbotennino woranno; Jeennaate eessanno; hakkiinnino fushshanno.

⁷Kaaliiqi buxisanno; qoleno duroonsanno; shollishanno; qoleno gotti gotti assanno.

⁸Isi buxicho buluulu aaninni kayisanno; gadadaamo ishinu giddonni fushshanno. Ayirraddu ledo ofoshshiishannosi; ayirrinyu barcimano ragisiisannosi. Baattote safo Kaaliiqite; kalqeno kunni xinti aana worino.

⁹«Isi ammanantinosiri qaafo agaranno; bushuullu kayinni tunsote ba'anno; mannu umisi wolqanni qeelle diafi'ranno.

¹⁰Kaaliiqa gibbannori cancanantanno; isi gordoho hee're insara beleqanno; Kaaliiqi baatto baalate yoo yaanno; isi moohisinosihura wolqa aanno; buuramino mootera gaacheena aanno» yitu.

¹¹Hakkunni gedensaanni Hiliqaana Raama minisira ha'ri. Qaaqqu Saamueeli kayinni, qeesichu Eeli anga hee're Kaaliiqira soqqamanni hakko Seelo gati.

¹²Eeli ooso yawaawulootaho; Kaaliiqano diwaajjitannoreeti.

¹³Mittu manchi kakkalote saada shiqishanno woyite, ganfanni hee'noonni maali raikkinni qeesichu soqqamaanchi sasi-farqaamoricho haa're abbe,

¹⁴kashshote giddo wore sasi-farqaamu qase fushshanno maala haa're masse qeesichaho aanno. Kakka'litara Seelora dagganno Israeele baala kuni coyi qarrisinonsa.

¹⁵Eeli ooso soqqamaano kayinni maala ganfikkinni, coomano shilqinshikkinni kakkalo shiqishanno manchiwa dagge, «Qeesichu bu'ra maala ikkinnina ganfoonniha dihasi'rannona, du'rinsheemmosi maala uyi» yitanno.

¹⁶Manchuno, «Balanxe seeru garinni cooma shilqinshihu gedensaanni hasi'roottoha adhattona agari» yaannosi woyite, qeesichu soqqamaanchi, «Dee'nina xaanni uyie; giwittoro kayinni wolqatenni haa'reemmo» yaanno.

¹⁷Kaaliiqira shiqqanno kakkalo shotissino daafira, Eeli ooso cubbi Kaaliiqi albaanni lowo geeshsha bati'ri.

¹⁸Saamueeli kayinni shiimu hee'renni fila shalonni gannoonnita gagasu uddano uddi're Kaaliiqi albaanni soqqamanni hee'ri.

¹⁹Amasi annisi ledo kakkalo shiqishate diru dirunkunni hakkiira martanno yannara, aanaanni uddi'ranno uddano gante haadhe massitannosi.

²⁰Eelino, «Huuccattotenni afidhe Kaaliiqira uyitinohu beettise darga Kaaliiqi tenne mancho godowinni ila oohe» yaanni Hiliqaananna ayiddaamasi Haanna maassi'ranno. Hakkunni gedensaanni insano galagalte mininsara hadhanno.

²¹Kaaliiqi Haanna maassi'reennase godobbe 3 labballonna 2 seenne iltu. Saamueeli kayinni Seelo Kaaliiqi Mine lophi.

²²Hatte yannara Eeli lowo geeshsha geedhe no. Oososino Israeele baalate aana assitannoha busha coyenna Xaadu Dukkani nafara soqqamanno meenti ledo foortinota macciishshi.

²³Kunnira, «Assitinoonniha busha coye mannu baalunku kulinoe; togoo coye mayira assitinanni?

²⁴Ooso'ya, digaraho; Kaaliiqi manni mereero hasaawamanni noohu ki'ne assitinoonni coyi saalsiisannohona agurre.

²⁵Mittu manchi wolu aana sao assiro, Maganu tirara dandaanno. Mannu Kaaliiqi aana sao assiro kayinni ayi tirannoyya?» yiinsa. Ikkollana Kaaliiqi hunansara hasi'rino daafira, ooso anninsa yiinota dimacciishshitino.

²⁶Saamueeli kayinni Kaaliiqinna mannu albaanni ayirrinyenna gaacheena afi'ratenni lophi.

²⁷Hatte yannara mittu himanaanchi Eeliwa daye, «Kaaliiqi, ‹Awurikki Aarooninna minisi manni Gibitsete gobbara Feriooni anga heedheenna anenee leellishoommosi.

²⁸Qeesicha'ya ikke, kakkalote darga mare kakkalannoe gede, hixaana giirannoe gedenna alba'yaanni gagasu uddano uddi're soqqamannoe gede, Israeelete ga're baalante giddonni annakki Aarooni dooroommo. Qoleno Israeele shilqote shiqishshanno fushshaate baala isi minira oommo.

²⁹Dukkani'yawa shiqqanno gede hajajoommo kakkalonna fushshaate mayira mishshiniyya? Atinna oosokki manni'ya Israeele shiqishshino fushshaati giddonni seyi seyiha ite misate anenni roore oosokki mayira ayirrisitto?

³⁰« ‹Ani Israeelete Magani Kaaliiqi, minikkinna ilamakki hegerera soqqantannoe yee hexxoommo. Xa kayinni dihasi'reemmo'ne. Ani ayirrissannoere ayirriseemmo; mishshannoerino mishantanno.

³¹Qaekkira geerchu hee'rannokki gede, atenna minikki manna baala gudeemmo barri daanno.

³²Minekki qarru kalaqamanno. Ani Israeelete danchare asseemmo. Ate mine kayinni geerchu dihee'ranno.

³³« ‹Minikkinni qeesimmatenni soqqamara gatiseemmohu ille balle hexxo nookkiha ikkanno. Ate mini manni kayinni anje hee're reyanno; ilamakkino barrimale reyitanno.

³⁴« ‹Oosokki Afiininna Finihaasi aana daanno coyi atera malaate ikkannohe; lamunku mitto barra reyitanno.

³⁵Wodani'yanna hedo'ya gede soqqamannoeha ammanamino qeesicha kayisi'reemmo. Ilamasino wo'manka woyite doodhoommo moote albaanni qeesimmatenni soqqantanni heedhanno gede asseemmo.

³⁶Sirchikki giddonni gatinohu ayi manchino, mittu birriranna hiiqqinoonni timira yee hakko qeesichira uwe guluphanno. Hakko soqqame hurbaate afi'rara qeesimmate loosira worrannisi gede huucci'ranno› yiino» yiisi.