Read Sidama_Qullaawa _Maxaafa UMI SAAMUEELI 21 Bible Online

UMI SAAMUEELI 21 - Sidama_Qullaawa _Maxaafa bible

UMI SAAMUEELI 21

¹Daawiti qeesichu Ahimeleeki hee'rannowa Noobi Katama ha'ri. Ahimeleeki huxi'ranni fule Daawitinni xaade, «Callikki mayira ha'ratto? Mannu ledokki mayira hoogino?» yee xa'misi.

²Daawitino daware, «Ani kawiira dayommohu mootete hajajo wonshammoraati. Isi soyinoe coyeno mannaho kuleemmokki gede hajajinoe. Manni'yarano xaandeemmowa kuloommonsa.

³Mitiri intanniri nooni? Ontu timi woy hee'ririno hee'riro uyie» yii.

⁴Qeesichuno, «Mannu itanno timi dinoe. Muli yanna giddo meyatenni xaade egenninokki manna ikkiro qullaawu timi konne no» yiisi.

⁵Daawitino, «Anfoonninte gede fullummonkunni meyatenni xaande diegenninoommo; shiima hajara fulleemmo woyite nafa manninatenke keereensi'neemmo. Tenne ayirrado sokkara fullanni hiitto roorsine agadha hoongeemmo!» yee dawari.

⁶Qeesichuno qullaawa tima haa're Daawitira uyisi. Hatto assinohu, Kaaliiqi albinni kayinse haa'ne dargaho wole haaro tima riqiwateeti.

⁷Hakko barra Saaooli soqqamaano giddonni mittichu allaalaasinete sooreessi Edoomichu Doyiqi amma'note seera wonshate hakkiichira mare no.

⁸Daawiti Ahimeleeki, «Mootete hajajo mudditinoe daafira, biseno ikkito wole olu uduunne adhe didayommona, konne atewa noori nooni?» yee xa'mi.

⁹Qeesichuno, «Ella Lagichira shiittohu Filisxeemichu Gooliyaadi bise no. Kune gagasu uddanora badheenni hoccunni xaaxante noona hasi'rittoro adhi. Ise agurranna woliri dino» yee dawarisi. Daawitino, «Ise gedeeta dianfannina isella uyie» yii.

¹⁰Hakko barra Daawiti Saaooliwiinni xooqe Gaati mootewa Akiishiwa ha'ri.

¹¹Akiishi ledo gashshaasineno, «Kuni gobbasira moohiha Daawiti di"ikkino? Qoleno, ‹Saaooli kume shiino; Daawiti kayinni tonne kume shiino› yaanni meentu guwisihu di"isooti?» yitu.

¹²Daawiti konne coye macciishshihu gedensaanni yaadi. Gaati moote Akiishino lowo geeshsha waajji.

¹³Kunnira Daawiti insa albaanni wodana sainohu gede ikki. Mulinsara gamba yiiti, katamu huxxi waalcho caqamurrisanni, gororo gaccisi aana daashshanni makkalinohu gede ikki.

¹⁴Akiishi ledosi gashshaasinera, «Kuni manchu macharaaraamohowe! Anewa mayira abbitinanni?

¹⁵Ani bashsho macharaaraamo hiikko hoogeennaati konne wodana sainoha abbitine mootete mine huntinanniehu?» yiinsa.