Read Sidama_Qullaawa _Maxaafa UMI SAAMUEELI 22 Bible Online

UMI SAAMUEELI 22 - Sidama_Qullaawa _Maxaafa bible

UMI SAAMUEELI 22

¹Daawiti Gaatinni kae Adulaami Katami mule noo goda fule bai. Roduuwisinna wolu ayiddisi konne coye macciishshite isiwa martu.

²Kadantinori, asalu noonsarinna injo bushshinonsari mitteenni 400 ikkanno manni isiwa shiqi; isino sooreessansa ikki.

³Daawiti hakkiinni kae, Moaabi gobba Mitsipha yinanni katama fule ha'ri. Moaabi mooterano, «Maganu assaere afammo geeshsha, anni'yanna ama'ya atewa daye hee'roena» yee eegami.

⁴Hakkunni gedensaanni annasinna amasi Moaabi mootewa masse wodhi. Insano, Daawiti godu giddo maaxame hee'ri yanna baalantera hakkiicho keeshshino.

⁵Hakkunni gedensaanni himanaanchu Gaadi Daawiti, «Konniicho keeshshitootina, ka'e Yihudu gobba ha'ri» yiisi. Daawitino ha're Hereeti yinanni dubbo ei.

⁶Mitto barra Saaooli, Daawitinna ledosi noo manni leellinota macciishshe, amaxxo anga adhe ha're, Gibia Gaari aana tamaarisiki haqqicho hunda mare ofolli. Ledosi gashshaasine baalano mulesi uurrite no.

⁷Saaoolino, «Ki'ne Biiniyaami manni macciishshe. Halaalinta Isseyi beetti loosidhinanniwanna woyinete ho'richo aanno'neni? Ki'ne wo'manka kumunna xibbu roorroota assanno'neni?

⁸Anera gano gantinannihu iseraati? Beetti'ya Isseyi beetti ledo unuunaasincho ikki woyite kulinoehu dino. Techo assanni noonte gede beetti'ya Daawiti ledo elle amadinotanna isono duge shaannoe gede assinota ki'ne giddonni kulinoehu dino» yiinsa.

⁹Hakkawoyite Edoomichu Doyiqi Saaooli ledo gashshaano mule uurre no. Isino, «Isseyi beetti Noobira Akixoobi beettiwa Ahimeleekiwa daanna afoommo.

¹⁰Ahimeleekino assa hasiissannosire Kaaliiqa xa'mino. Sinqenna Filisxeemichu Gooliyaadi biseno uyinosi» yii.

¹¹Kunnira Saaooli, Akixoobi beetto qeesicha Ahimeleeki, Noobi qeesimmatenni noore ayiddesi baala soye woshsheenna baalunku isiwa daggu.

¹²Hakkunni gedensaanni, «Akixoobi beetto xaate macciishshi» yiisi. Ahimeleekino, «Maahoyye Mooticha'ya» yee dawari.

¹³Saaooli qole, «Atinna Daawiti anera gano mayira gantini? Kune xa assanni noo gede, atino duge shaaera sagalenna bise uyite, Magano xa'mittosihuno mayiraati?» yiisi.

¹⁴Ahimeleekino, «Baalunku giddonni Daawiti gede ammanaminohu wolu nooni? Isi atera balloho; agaraasinekki hajajannoho; gashshootikki giddono mannu baalu ayirrisannoho.

¹⁵Isi daafira Magano xa'mate techo umi barra di"ikkino. Atera gannoonni gano diafoommona, ane soqqamaanchokkinna ayidde'ya bushiishshootinke» yee dawari.

¹⁶Saaooli kayinni Ahimeleekira, «Atinna ayiddikki reyitinannita ikkinnina digattinanni» yiisi.

¹⁷Mulesi uurrite noo agaraasineno, «Kuri Kaaliiqi qeesooti Daawiti ledo kaa'lantino daafiranna Daawiti bainotano affanni heedhe kula gibbinoe daafira shiiyye» yee hajajinsa. Agaraasinesi kayinni angansanni Kaaliiqi qeesoota shitara dihasidhino.

¹⁸Kunnira Saaooli Doyiqi, «Gattoonkena qeesoota ati shii» yee hajaji. Hajanjoonnisi garinni, Edoomichu Doyiqi qeesoota shee gudi. Hakko barra shinoonniri qeesimmannita gagasu uddano uddidhannori 85 qeesootaati.

¹⁹Qeesootu heedhannoha Noobi Katamano bagadunni gawajji. Hakko heedhannore labballonna meento, oosonna qaaqquulle, qoleno lalo, harrenna ge'reewo baalanka bagadunni gudi.

²⁰Ahimeleeki beetti Abiyaataari kayinni gate fule Daawiti noowa xooqe bai.

²¹Saaooli Kaaliiqi qeesoota shiinotano Daawitira kulisi.

²²Daawitino Abiyaataari, «Hakko barra Edoomicha Doyiqi hakkiicho afanni hee'renni, Saaoolira coye kulikkinni agurannokkita afoommo. Ayiddikki baalu goofiro ani xa'mameemmo.

²³Ati kayinni anewa hee'ri; waajjitooti. Ate shaara hasannohu aneno shaara hasannoho yaate. Ati ane ledo keere hee'ratto» yiisi.