Read Sidama_Qullaawa _Maxaafa UMI SAAMUEELI 24 Bible Online

UMI SAAMUEELI 24 - Sidama_Qullaawa _Maxaafa bible

UMI SAAMUEELI 24

¹Saaooli Filisxeemoota shorre higihu gedensaanni, Daawiti Ayini-Gaadi Halalla noota macciishshi.

²Kunnira Saaooli Israeele baalante giddonni filloonnire 3,000 manna anga adhe Daawitinna ledosi manna hasara, «Dubbu Mei Kinna» yinanni dargi mulira ha'ri.

³Saaoolino doogote gama nootewa ge'reewu goo'raannawa iilliti, godu giddora shumate ei. Hatte yannara Daawiti mannisi ledo godaho giddoonni ofolle no.

⁴Ledosi manni Daawiti, «Kaaliiqi, ‹Hasi'rittota assattora diinakki angakkira sayise eemmohe› yee coyi'rinohe barri techooti» yiisi. Daawitino yaasanni mare ayino afikkinni Saaooli uddano handaara mure haa'ri.

⁵Ikkollana, Saaooli uddano murino daafira Daawiti lowo geeshsha gaabbi.

⁶Mannisirano, «Kaaliiqi buurinohu mootichi'ya aana togoo coye assa dihasiissinote; buuraminoha sheemmokki gede Kaaliiqi agaroe» yii.

⁷Daawiti kunni garinni mannisi Saaooli gawajjannokki gede hooli. Saaoolino godu giddonni fule ha'ri.

⁸Daawiti godu giddonni fule Saaooli, «Moote'ya!» yee woshshi. Saaoolino caaqqi yaanno woyite, Daawiti iso ayirrise umo heeshshi yee nooha afi.

⁹Daawitino Saaoolira, «Mannu, ani atera busha maloommohu gede asse kulannohere mayira macciishshatto?

¹⁰Techo godu giddo Kaaliiqi ate hiitto asse anga'yara sayise uyinohero kune illekkinni afootto; manni'ya giddonni mitu mitu sheemmohe gede xixxiibbinoe. Ani kayinni, ‹Kaaliiqi buurinoha digawajjeemmo› yee marare aguroommohe.

¹¹Anna'ya ballo, kune uddanokki aaninni muroommo hoccichi anga'ya noona lai! Uddanokki handaara muroommota ikkinnina ate dishoommohe. Xaano ikkiro ate aana assoommo sao nookkita seekkite afi. Mitte bunsheno assummohekkinni shaattoera hassanni noottoe.

¹²Kunni coyira bushu ayetiro Kaaliiqi yoo. Assoottoe bushara Kaaliiqi rabbiso ikkinnina, anga'yanni ate dikiseemmo.

¹³Albi yannara, ‹Bunshe bushu mannilla loosanno› yinanni daafira, xaano anga'yanni ate dikiseemmohe.

¹⁴«Hanni lai, ati Israeelete moote ayira gaaddanni nootto? Aye shorritanni nootto? Ani reyino woshichinna korchote gedeeho.

¹⁵Xaano atenna ane coye Kaaliiqi yoo; ane halaale isi fushshe, ate anganni gatisoe» yii.

¹⁶Daawiti coye gudita Saaooli, «Beetto'ya Daawiti, tini ate qoonqoonti?» yaanni raare wi'li.

¹⁷Qoleno, «Ani atera busha assanni hee'reenna anera dancha assoottoena, anenni roore ati halaalaanchoho.

¹⁸Assoottoe danchumma kune techo leellishoottoe. Kaaliiqi ane angakkira sayise ee hee'reennanni ati kayinni dishoottoe.

¹⁹Diinisi angasira e"eenna gawajjikkinni agurannohu nooni? Techo assittoe ellera Kaaliiqi maassi'rohe.

²⁰Kune, halaalinta ati moohattotanna Israeelete gashshooti angakki teesannota afoommo.

²¹Kunnira, ani reyummo gedensaanni sircho'ya gudattokki gede, anenna maate'ya su'mino hawamannokki gede xa Kaaliiqi su'minni xaarie» yiisi.

²²Daawitino yiinore assate xaarisi. Hakkunni gedensaanni Saaooli minisira ha'ri. Daawitinna mannisi kayinni galagalte maaxantannowa higgu.