Read Sidama_Qullaawa _Maxaafa UMI SAAMUEELI 25 Bible Online

UMI SAAMUEELI 25 - Sidama_Qullaawa _Maxaafa bible

UMI SAAMUEELI 25

¹Saamueeli reenna Israeelete manni baalunku gamba yee wi'lisi. Hakkunni gedensaanni Raama massite qaesira madaartusi. Daawiti noowiinni kae Maooni Halalla ha'ri.

²Hakkiicho Maooni Katamira mittu lowo geeshsha dureessu manchi no. Isira Qermeloosi Katami mule loosi'nanni baatto noosi; qoleno 1,000 me"enna 3,000 ge'reewo afi'rino. Manchu su'mi Naabaaliiti; ilaminohu Kaaleebi ga're giddooti; galtesi su'mi Abigiyaati. Ise xumatenna xiinxalla manchooti. Ayiddaannise kayinni busha kaajjadohonna do'nichaho. Isi mitto barra Qermeloosi ge'reewisi orda haxi'ranni hee'reenna,

⁴Daawitino halalla hee're Naabaali ge'reewu orda haxi'ranni noota macciishshe,

⁵tonne wedella, «Naabaaliwa Qermeloosi marre. Keere'yano iillishshinesi,

⁶‹Dirikki seedo! Ati, minikki manninna jajjikki baalu keere ikko.

⁷« ‹Ge'reewu orda haxidhanni noottota macciishshoommo. Allaalaasinekki ninke ledo noo yannara, digawajjinoommonsa. Qermeloosi noo yanna baalantera mitturino dibainonsa.

⁸Insa xa'mittoro nafa kultannohe. Kune ninke techo jilu aana dangoommona, mararte sagale aattonke gede beettikki Daawiti soyinonke› yitine kulle» yee soyi.

⁹Daawiti manni hakkiira iillite, Daawiti su'minni sokka iillishshuhu gedensaanni Naabaali qolannonsa dawaro agadhitu.

¹⁰Naabaalino Daawiti soyino mannira, «Isi afummona Daawiti ayeti? Isseyi beettino hiikkonneeti? Tenne yannara mootichinsawiinni fulte ba'ino borojji kiiro dihaammataho?

¹¹Sagale'yanna waa'ya, ge'reewo'ya haxxannoerira gorri'roommoha hiikkiinni dagginoro anfoonnikkirira mayira uyi'royya?» yii.

¹²Daawiti mannino galagalte dagginowa higge, Naabaali yiinonsata baala Daawitira kultusi.

¹³Daawitino mannasi, «Baalunku bagado'ne adhitine ka'e» yee hajaji. Mannisi baalunku yiino garinni qixxaawi; Daawitino umisi bagado adhe kai. Daawiti 200 manna uduunne agaranno gede gatise, 400 manna hoode adhe ha'ri.

¹⁴Naabaali soqqamaasine giddonni mittu Abigiyara, «Daawiti keere affara halallinni soyino manna mootichinke xonatenni amade qolita afitta?

¹⁵Hakku manni ninkera lowo geeshsha dancha mannaati; mittoreno diqarrisinonke; xawoho ledonsa keeshshinummo geeshshano bainonkeri dino.

¹⁶Ge'reewonke allaa'linanni ledonsa hee'nummo yanna baalantera, hashshano barrano huxximma gaangeessite agartinonke.

¹⁷Xa kayinni mootichankenna minesi baala qarru amadaraatina, hanni malte mitto coye assi. Isi woyite wodana shota ikkino daafira coyi'nannire dimacciishshanno» yitu.

¹⁸Abigiyano rakke 200 timma, 2 okole woyinete xajje, ontu ge'reewi maala, 5 saffe xoxxoo, 100 mooshshinoonnita woyinete laalonna 200 mooshshinoonniha balasete qeeqqa haadhe harrete hogobbu.

¹⁹Hakkunni gedensaanni soqqamaasinese, «Ani hoode'ne dayemmana, alba higgine hadhe» yitunsa. Ayiddaannisera kayinni mittoreno dikultino.

²⁰Iseno harrichosera ofolte gaaru laayyo amadde dirritanni heedhe, hedeweelcho eela higge dirritanni noorinni Daawitinna mannisinni xaaddu.

²¹Isenni xaadara albaanni Daawiti, «Mitturino ba"annosikki gede kunni manchiha jajjasi baala halalla towata'ya hada bunshete ikkitu? Assoommo galatira tenne qolie?

²²Ga'a soodo minesi nooha labbaaha baala mittuno gatikkinni guda hoogummoro Maganu afoe!» yiino.

²³Abigiyano Daawiti affanni heedhenni rakke harrichote aaninni dirrite, Daawiti albaanni kumbuultu.

²⁴Lekkasira ubbe, «Mooticha'ya, anera xissoena, ballo ani soqqamaanchokki coyi'reemmare macciishshie.

²⁵Mooticha'ya, hakkonne shotu wodaniha Naabaali la'ooti; isi su'misinte gede gowwaho. Ani soqqamaanchokki kayinni ati sootto manni dayita diafoomma.

²⁶«Mooticha'ya, Heeshshote Kaaliiqi su'minni xaareemmana, halaalikki afanna rabbisi'rate yite anga sa"attokki gede Kaaliiqi agarinohe. Xaano baarigaarrakkiranna ate gawajjitara hasidhannorira Naabaalira iillannori iillonsa;

²⁷ballo konne abboommahe afansha haadhe, ledokki noo mannira uyinsa.

²⁸Ati Kaaliiqi ola olantanni nootto daafira, Kaaliiqi gashshootekki geedonniha assannona, eeggatena ane soqqamaanchokkira konne coye saie. Lubbotenni nootto geeshsha busha coye assitooti.

²⁹Shaahera hasi'rannohu hee'riro nafa, Maganikki Kaaliiqi kikki'lasi giddo maaxannohe. Baarigaarrakki lubbo kayinni, corqaayyetenni ollanni kinchinni roore wigidiide tuganno.

³⁰Kaaliiqi dancha hexxo uyinohe garinni danchare assannohe woyitenna Israeelete aana moohisannohe yannara,

³¹beebbatenni shoottohunna rabbisi'roottohu nookki daafira, dadillisannoherinna gaabbisannoheri dihee'ranno. Kaaliiqi danchare assannohe yannara ane soqqamaanchokki habbootie» yitusi.

³²Daawitino Abigiya, «Ate techo anewa soyinohehu, Israeelete Magani Kaaliiqi galataminoha ikko.

³³Mannu mundee duneemmokki gedenna umi'ya rabbisi'reemmokki gede assattaera tenne hayyo uyinohe Magani galatamo; aterano Maganu ikkohe.

³⁴Gawajjeemmohekki gede agarinoehu Israeelete Magani Heeshshote Kaaliiqi afanna, togo anewa rakke daa hoogoottaro, ga'a soodo Naabaali mine noo labballi mittuno gatikkinni goofe hoogino» yiise.

³⁵Hakkunni gedensaanni Daawiti abbitinosire angasenni haa're, «Coyi'roottare macciishshoommo; yoottareno adhoommona, keerunni ha'ri» yiise.

³⁶Abigiya minira iillitu yannara, Naabaali moote jiltanno gedee jili aana no; lowo geeshsha dimbe noo daafira isonoo diafino. Kunnira sooda geeshsha mittoreno dicoyidhinosi.

³⁷Soodeenna dimbu higisihu gedensaanni, hadhe daggu gara kulteennasi mase qiide milli yaa hoogi.

³⁸Tonnu barri gedensaanni, Kaaliiqi Naabaali haa're hooli.

³⁹Daawitino Naabaali reyinota macciishshe, «Naabaali xoninoe daafira rabbisinoehu ane soqqamaanchosino busha assatenni agarinoehu Kaaliiqi galataminoha ikko. Naabaali loosinori amadannosi gede assino» yii. Daawitino Abigiya galte assi'rara hasi're sokka soyise.

⁴⁰Daawiti soqqamaasine Qermeloosi marte Abigiyara, «Daawiti galtesi ikkatta gede hasire soyennanke haa'ne ha'nammohera dangoommo» yituse.

⁴¹Iseno alba higge kumbuultuhu gedensaanni, «Ani soqqamaanchosiiti; soqqamaanosi lekka nafa hayishshate qixxaawate» yitu.

⁴²Abigiya rakke ka'e harricho guluffe 5 soqqamaanose hoodete adhite, Daawiti soqqamaano ledo hadhu; marte Daawitira galte ikkitusi.

⁴³Hakkunnira albaanni Daawiti Akinahoomi yinannita Iyiziraeelitte adhe no; lamenti meenti galte ikkisi.

⁴⁴Saaooli, alba Daawitira uyinota beettosi Melkooli, Galiimi Katamira ilaminohura Layishi beettira Felxieelira uyino.