Read Sidama_Qullaawa _Maxaafa UMI SAAMUEELI 27 Bible Online

UMI SAAMUEELI 27 - Sidama_Qullaawa _Maxaafa bible

UMI SAAMUEELI 27

¹Daawiti kayinni wodanisinni, «Mitto barra Saaooli anga reya'ya digattannona, Filisxeemete gobba ba"a woyyitannoe. Hakkunni gedensaanni Saaooli Israeelete gobbara ane shorra aguranno; anino keere hee'reemmo» yee hedi.

²Kunnira Daawitinna ledosi noori 600 manni ka'e Gaati mootewa Maooki beetti Akiishiwa hadhu.

³Gaati hadhe Akiishiwa heedhu. Mittu mittunku manchi minisi manni ledo no. Daawitino lamenta meentosi, Iyiziraeelitte Akinahoominna Qermeloositte Naabaali galte Abigiya adhe ha'rino.

⁴Saaoolino, Daawiti fule Gaati ha'rinota afe, shorra agurisi.

⁵Shiima yanna gedensaanni Daawiti Akiishi, «Baxattoeha ikkiro, gobbakkira noo katamma giddonni hee'reemmoha mitto shiima katama uyie; ani soqqamaanchikki konne ati hee'rattowa dannawu katamira hee'ra dihasiissannoe» yii.

⁶Akiishino hakko barranni Tsiqilaagi Katama uyisi. Kunnira hakkawarinni kayise Tsiqilaagi Yihudu mootoolla amado ikke hee'rino.

⁷Daawitino Filisxeemete gobbara 1 dironna 4 agana hee'ri.

⁸Hatte yanna giddo Daawitinna mannisi fulte, Geshuuroota, Gerizootanna Amaaleqoota horritu. Tini daga hundunni kayisse, Surinni Gibitsete geeshsha noo baattora heedhinoreeti.

⁹Daawiti tenne gobba qasanno yanna baalantera, meya labbaaha digatisanno. Kayinnilla ge'reewonna lalo, harrenna gaala hattono imaana gudhanno. Hakkunni gedensaanni galagale Akiishiwa higanno.

¹⁰Akiishi, «Techo mamira gaaddini?» yee xa'mannosi woyite Daawiti qole, «Wodiidi Yihudira nooha halallicha katama, qolleno Yirahime"eelootunna Qenaawootu heedhannota halallitte katamma gaandoommo» yee dawaranno.

¹¹Daawiti, «Hatto assinohu isooti» yine kullanni yee hedino daafira, shee gudannota ikkinnina meyata ikkito woy labbaaha mittono haa're Gaati diabbino. Filisxeemete gobbara hee'ri yanna baalantera, hatto assanni keeshshino.

¹²Akiishino wodanisinni, «Gosasi Israeele gibbannosi gede assi'rino daafira, geedote soqqamaancho'ya ikke hee'ranno» yee hede Daawiti ammanisi.