Read Sidama_Qullaawa _Maxaafa UMI SAAMUEELI 28 Bible Online

UMI SAAMUEELI 28 - Sidama_Qullaawa _Maxaafa bible

UMI SAAMUEELI 28

¹Shiima yanna gedensaanni, Filisxeeme Israeele qassara olantonsa gamba assidhu. Akiishino Daawiti, «Atinna mannikki ledonke olaho fultinannita affe» yiisi.

²Daawitino, «Ani soqqamaanchikki asseemmota la"attona agari» yee dawarisi. Akiishino, «Maahoyye danchate; lubbo'ya noo geeshsha ate wo'manka woyite muli agaraancho'ya assi'reemmohe» yiisi.

³Hatte yannara albaanni Saamueeli reenna, Israeele baalanti gamba yite Raama Katamira wi'lite madaarte agurtino. Saaoolino ekera coyishshiishshannorenna qaalloole baattote aaninni gudino.

⁴Filisxeemootu Suneemi Katami mule kunseente heedheenna, Saaooli qole Israeele baala Gilboa Ilaalira gamba assi.

⁵Saaooli Filisxeemootu olanto bati'ra ikkitinota afe waajje huxi'ri.

⁶ Isino ma assa hasiissannoro Kaaliiqa xa'mi'ri. Kaaliiqi kayinni haaqeete woy Uriiminninna Tumiiminni woy himanaanotenni didawarinosi.

⁷Kunnira Saaooli soqqamaasinesi, «Mare mala xa'mi'reemmona, hanni ekera coyishshiishshanno mancho hasse"e» yiinsa. Insano, «Ekera coyishshiishshanno mancho Endoori Katamira no» yite kultusi.

⁸Saaoolino uddano soorri're wole lawe lamu manchi ledo hashsha manchonniwa ha'ri. Manchono, «Eeggakkiitina mala xa'mi'reemmo gede mittu manchi ekera kayisie» yiise.

⁹Mancho kayinni, «Saaooli ekera coyishshiishannorenna qaalloole baattote aaninni asse gudino gara afootto. Tenne affanni heedhenni woshshaadote giddora eessite reemma gede mayira assattoe?» yitusi.

¹⁰Saaoolino, «Heeshshote Kaaliiqi halaaleeti! Mittu coyino ate di"iillannohe» yee Kaaliiqi su'minni xaari.

¹¹Manchono, «Maahoyyena aye kayisohe?» yite xa'mitusi. Isino, «Saamueeli kayisie» yiise.

¹²Mancho Saamueeli affe, lowo geeshsha cancite Saaooli, «Ati hada moote Saaooliiti! Mayira dogittoe?» yitusi.

¹³Saaoolino, «Waajjitootina, la'anni noottahu maatiro kulie» yiisi. Manchono, «Mitte ekera baattote giddonni fultanna la"anni noomma» yite dawartusi.

¹⁴Isino, «Afitta ekera ayeta labbanno?» yee xa'mise. Iseno, «Kune kaabba uddi'rinohu mittu geerchu manchi fulanni no» yite kultusi. Saaoolino mancho la'inohu Saamueeli ikkinota afe, ayirrinye leellishate umo heeshshi yee kumbuuli.

¹⁵Saamueelino Saaooli, «Galagale dayemmo gede assite mayira qarrisittoe?» yiisi. Saaoolino, «Lowo geeshsha shetoommo; kune Filisxeemootu qassaeraati; Maganuno agurinoe; himanaanotenni woy haaqeete dawara giwinoe. Kunnira asseemmore kulattoera woshshoommohe» yiisi.

¹⁶Saamueelino, «Kaaliiqi ate agure baarigaara ikkihena, ane mayira xa'mattoeyya?

¹⁷Kaaliiqi ane widoonni qole kulinohere kune wonshanni no; gashshootekkino haa're olliichikkira Daawitira uyino.

¹⁸Kaaliiqira dihajajamootto; Amaaleqootanna insa lawannoha baala co'o assite digudootto. Kaaliiqi xa konne coye ate aana abbanni noohu kunni daafiraati.

¹⁹Kaaliiqi atenna Israeele Filisxeemete sayise aanno; atinna oosokki ga'a anenni xaaddinanni. Israeelete olantono Kaaliiqi Filisxeemete sayise aanno» yiisi.

²⁰Saamueeli coyi'rino coyinni kainohunni, Saaooli masillu amadeenna baattote aana uwe diriiri; hashshanna barra wo'ma sagale itinokki daafira shaqqe waa ikki.

²¹Manchono Saaooliwa shiqqi yite masinota affe, «Kune ani soqqamaanchokki aneta mitte assi're yoottoere assoomma.

²²Xaano eeggatena ani soqqamaanchokki yeemmata macciishshie. Wolqa assidhe ha'ratto gede shiima sagale itattona abboheni» yitusi.

²³Isi qole, «Dee'ni di"iteemmo» yee giwi. Ledosi noo manni manchote kaa'le coyi'rita maahoyye yiinsa; baattote aanannino kae daallasu aana ofolli.

²⁴Mancho mine misino siiti nooseha rakke gorrite, bulleeno liisse shiishinokki tima gantu.

²⁵Hakkunni gedensaanni Saaooliranna ledosi mannira sagale shiqishshunsa. Insano itte ka'uhu gedensaanni hakko hashshanni fulte hadhu.