Read Sidama_Qullaawa _Maxaafa UMI SAAMUEELI 3 Bible Online

UMI SAAMUEELI 3 - Sidama_Qullaawa _Maxaafa bible

UMI SAAMUEELI 3

¹Saamueeli Eeli anga hee're Kaaliiqira soqqamannoha ikki. Hatte yannara Kaaliiqi qaalenna ajuuja wo'ma woyite dianfanni.

²Illesi daafurte la"a gibbinohu Eeli mitto hashsha ma'nasira goxe no.

³Saamueeli kayinni caabbichu xawanni hee'reenna Gondooru Taabooti noowa Qullaawa Mine goxe no.

⁴Kaaliiqi Saamueeli woshshisi. Saamueelino, «Yee» yii.

⁵Eeliwano dode mare, «Woshshittoeni? Kune dayummowe!» yii. Eeli kayinni, «Ani diwoshshoommohena marte goxi» yiisi. Isino ha're goxi.

⁶Xaano Kaaliiqi, «Saamueeli» yee woshshi. Saamueelino kae Eeliwa mare, «Woshshittoeni? Kune dayummowe» yii. Eelino daware, «Beetto'ya, ani diwoshshoommohena hadhe goxi» yiisi.

⁷Hakkunnira albaanni Kaaliiqi woshshe egenninosikki daafira, Saamueeli Kaaliiqi qaale bade diegennino.

⁸Kaaliiqi Saamueeli sayikkimeeshsho woshshisi. Xaano Saamueeli kae Eeliwa mare, «Woshshittoni? Kune dayummowe» yii. Hatte yannara Eeli, beetto woshshanni noohu Kaaliiqa ikkinota afi.

⁹Eelino Saamueeli, «Hadhe goxi; kunni ka'a woshshinihero kayinni, ‹Kaaliiqa, ani borojjichikki macciishsheemmona coyi'ri› yii» yiisi. Saamueelino basesira ha're goxi.

¹⁰Kaaliiqi daye hakkiicho uurre albinte gede, «Saamueeli! Saamueeli!» yee woshshisi. Saamueelino, «Ani borojjichikki macciishsheemmona coyi'ri» yii.

¹¹Kaaliiqino Saamueelira, «Kune Israeelete gobbara macciishshihu baalu macca cu'mi'ranno coye assammoraati.

¹²Hakko barra, hundinni kayise goofimarchu geeshsha coyi'roommore baala Eelinna minisi manni aana dirriseemmo.

¹³Oososi assitino bunshera hegere geeshsha minesi qorichisheemmota Eelira balaxe kuloommosi. Isi kayinni ane shollishshinota afanni hee'renninni assitino bunshera oososi diseejjino.

¹⁴Kunni daafira, Eeli mini sao kakkalleenna woy fushshaate uyineenna nafa hegere geeshsha diagurantanno yee xaaroommo» yii.

¹⁵Saamueeli sooda geeshsha goxe keeshshi. Goxinowiinni kae Kaaliiqi mini cufanna fani. Waajjino daafira afino ajuuja Eelira dikulino.

¹⁶Eeli kayinni Saamueeli woshshe, «Hanni kawa amo!» yiisi. Saamueelino, «Kune dayommo» yii.

¹⁷Eelino, «Kaaliiqi kulinoheri maati? Kulinohere mittoreno maaxxootie; maaxittoero kayinni Maganu afohe» yiisi.

¹⁸Saamueeli mitto coyeno maaxikkinni gudise kulisi. Eelino, «Isi Kaaliiqaatina, baxinore asso» yii.

¹⁹Saamueeli lophe lowoha ikki. Kaaliiqino ledosi noo daafira, coyi'ranno qaali mittuno uulla diuwanno.

²⁰Daanira soojjaatoonni Bersaabehira aliyyeenni noo Israeele baala Saamueeli halaalaancho Kaaliiqi himanaancho ikkinota affu.

²¹Kaaliiqi albinte gede Seelora daye Saamueelira qaalisi widoonni isonoo egensiisa diagurino. Saamueeli coyi'rino qaalino Israeele baala iilli.