Read Sidama_Qullaawa _Maxaafa UMI SAAMUEELI 6 Bible Online

UMI SAAMUEELI 6 - Sidama_Qullaawa _Maxaafa bible

UMI SAAMUEELI 6

¹Kaaliiqi Taabooti Filisxeemete gobbara 7 agana keeshshihu gedensaanni,

²Filisxeemete manni qeesootansanna kiilaanonsa woshshe, «Kaaliiqi Taaboota hiissino? Dargasi hiitto assine qolleemmoro kullenke» yiinsa.

³Insano, «Israeelete Magani Taaboota qoltinanniha ikkiro, sao'ne agursiisate ikkanno afansha ledo sokke ikkinnina calla sokkinoonte. Hatto assitiniro dhibbi'nenni hurtinanni; mayira hanqino'nerono affinanni» yitunsa.

⁴Filisxeemootuno, «Saote kakkalora ikkannori maati?» yite xa'mitu. Insano dawarte, «Manninkenna sooreeyyenke aana uwino qoomami mitto ikkino daafira, gashshaanonke kiiro bikkinni onte culka darshete suudinninna onte culka yemahu suudinni seekkitine sokke.

⁵Gobba guddara sonkoonni darshenna yemahi suudinni seekkitine, Israeelete Maganira ayirrinye uuyye. Hatto assitiniro, hanqosi aani'nenni, maganna'nenna baatto'ne aaninni hoolannoha ikkanno.

⁶Gibitsootunna Feriooni gede wodana'ne mayira dilleessitinanni? Insa Israeele agurtinohu, Kaaliiqi lowo geeshsha godo'linsahu gedensaanniitiwe.

⁷Kunnira, haaro gaarenna qambara worroonnikkire 2 xuurranni lalo qixxeesse. Konne lalono gaaretenni waaxxe; siittansa kayinni mine gatisse.

⁸Kaaliiqi Taaboota massitine gaarete aana worre. Taabootu mule noo saaxine giddo saote kakkalora sokkinannita culku misilla wortine, doogosi hige ha'rona agurre.

⁹Ikkollana hiikka hige ha'rannoro la'e. Beetesaamisa umisi gobba hige ha'rannoha ikkiro, konne lowo qarra abbinonkehu Kaaliiqaati yaate. Hakka hige ha'ra hoogiro kayinni, qarru hedeweelcho iillinonkeho ikkinnina Kaaliiqi soyinonkeha di"ikkanno» yite dawartunsa.

¹⁰Konne coye macciishshituri ku'uri yitunte gede lamenta saa haa're gaarete waaxi; siittansa kayinni mine gatissu.

¹¹Kaaliiqi Taaboota, culku yemahenna darshete misilla worroonni saaxine gaarete aana hogobbu.

¹²Hakkunni gedensaanni lalu doogonsa amade humbaa yaanni ka'a kawa higikkinni suwe Beetesaamisa hige ha'ri. Filisxeemete gashshaanono Beetesaamisa danni geeshsha lalu hoode hadhu.

¹³Hattenne yannara Beetesaamisa manni lagichaho qamade mixxanni no. Gotti yee daanni nooha Taaboota lae lowo geeshsha hagiidhi.

¹⁴Gaare Beetesaamisa Iyyaasu yinanni manchi gate mittu lowo kinchi mule marte uurritu. Mannuno hattenne gaareha haqqa boce, lamenta saa shilqote kakkalo asse Kaaliiqira shiqishi.

¹⁵Leewaawootuno Kaaliiqi Taabootanna culku uduunne giddo worroonni saaxine ledo dirrisse lowo kinchi aana wortu. Hakko barranni Beetesaamisa manni Kaaliiqira shilqote kakkalo shiqishi; wole kakkalono kakkali.

¹⁶Ontunku Filisxeemete gashshaano konne duuchanka coye la'uhu gedensaanni, hakko barranni galagalte Eqirooni higgu.

¹⁷Filisxeeme saote kakkalora Kaaliiqira sokkinoti ontenti culku darshe misile mitte Ashidoodi, mitte Gaaza, mitte Asiqeloona, mitte Gaatinna mitte Eqirooni katamma daafiraati.

¹⁸Culku yemahi misile, ontu Filisxeemete gashshaano gashshitino katamma qiishonnitenna huxxa afidhinokki qachuwa kiironni sonkoonnite. Kaaliiqi Taaboota worroonnihu Beetesaamisichu Iyyaasu gate noohu lowo kinchi techo geeshsha malaate ikke hee'ranno.

¹⁹Kaaliiqi Taaboota fante la'ino daafira Maganu Beetesaamisaha 70 manna[5] shiino. Kaaliiqi tenne bao aanansa abbino daafira mannu lowo geeshsha dadille wi'li.

²⁰Beetesaamisa manni, «Kunni Qullaawu Magani Kaaliiqi albaanni uurre dandaannohu ayetiyya? Taabootano kawiinni fushshine hiikkiira massinanni?» yii.

²¹Hakkunni gedensaanni, Qiriyaati-Yiariimi manniwa manna fushshite sokke, «Filisxeemootu Kaaliiqi Taaboota qoltinonkena, daggine haadhine ki'newa masse» yitu.