Read Sidama_Qullaawa _Maxaafa UMI SAAMUEELI 9 Bible Online

UMI SAAMUEELI 9 - Sidama_Qullaawa _Maxaafa bible

UMI SAAMUEELI 9

¹Biiniyaami ga're giddo Qiisi yinannihu mittu dureessu manchi no. Qiisi Abieeliho; Abieeli Tsirooriho; Tsiroori Bikoraatiho; Bikoraati Afeeqiho.

²Qiisira Israeele baalate giddo xummete ayeno ikkannosikkihu, gujjono wo'manka roorannohu Saaooli yinanni beetti noosi.

³Mitto barra Qiisira harre ba'inosi. Kunnira beettosi Saaooli, «Soqqamaanote giddonni mitto anga adhite hadhe harre hasi» yiisi.

⁴Insano gaaraame Efireemi gobbaranna Shaalisha yinanni basera ha'rante hassu. Harre kayinni diaffino. Shailiimi yinanni gobbano marte hasse hakkono hooggu. Galagalte Biiniyaami gobba giddoonni higge sa'u. Hakkiichono harre dileeltino.

⁵Tsuufi yinanni gobba iillitanno woyite Saaooli ledosi noo soqqamaancho, «Anni'ya kawoote harrennire agure ninke daafira yaadanni noona, amo hingona» yii.

⁶Soqqamaanchu kayinni, «Hanni agari! Kunni katamira mittu ayirradu Maganu manchi no; isi coyi'riri baalu wo'manno; harreno hiikko afi'neemmoro kulannonkena amo isiwa marrona» yii.

⁷Saaoolino soqqamaancho, «Ha'ra ha'neemmona, manchoho maricho uyineemmoyya? Ogorinkera noo sinqi goofino. Maganu manchira uyineemmo afanshi dinona mayi woyyanno?» yii.

⁸Soqqamaanchuno qole, «Anewa shiimu woxi no. Harre hiikko afi'neemmoro kulannonke gede ani konne woxe Maganu manchira eemmo» yii.

⁹Albaanni Israeelete gobbara mittu manchi Magano xa'mi'rara ha'ranno woyite, «Hanni amme masaalaanchunniwa marrona» yaanno. Xa himanaanchoho yinanniha, hakka waro masaalaanchoho yinanni.

¹⁰Saaoolino, «Maahoyye, amo ha'nona» yii. Lamunku ka'e Maganu manchi hee'ranno katama hadhu.

¹¹Katama iillate gaara fultanni heedhe, waa dirri'rara ha'ranni noo seenninni xaadde, «Konniicho go'linore afanno manchi nooni?» yite xa'mitu.

¹²Seennuno, «Ee; hakkuneeti alba'neenni noona rakkine iille. Mannu gaaru aana kakkalo shiqishi'ranno daafira, katamanke techolla dayino.

¹³Kakkalo isi, ‹Alla assi› yaa hasiissannosi daafira, isi mara geeshsha mannu di"itanno. Katama e'inanni woyite, koyinsoonni manni ledo itara kakkallanni gaara fulikkinni xaaddinannina rakkine marre» yiinsa.

¹⁴Insano marte katama e'u. Katama e'anni heedheenna, Saamueeli kakkallanni gaara fulara insa widira hige dayi.

¹⁵Saaooli daara mittu barrira albaanni Kaaliiqi Saamueelira,

¹⁶«Ga'a tenne yannara Biiniyaami ga'renni mitto beetto atewa soyemmona, manna'ya Israeele gashshanno gede buuri. Isi manna'ya Filisxeemete anganni gatisanno. Anino manni'ya qarra iima hee're laoommo; raarensano macciishshoommo» yiinosi.

¹⁷Saamueeli Saaooli afi yannara Kaaliiqi, «Kulummohe beetti konneeti; isino manna'ya gashshanno» yiisi.

¹⁸Tenne giddo Saaooli katamu huxxi waalchiwa Saamueeliwa shiqqi yee, «Masaalaanchu mini hiikkootiro ballo kulie» yii.

¹⁹Saamueelino, «Masaalaanchu aneeti. Xa ledo'ya sagale ittinanni gede, balaxxine kakkalote gaara fulle. Afate hasi'roottoreno kuleennahe ga'a soodo ha'rattona.

²⁰Sasu barrira albaanni ba'ino harre leeltinona yaaddooti. Israeelete manni atenna annikki mine halche noota diafootto?» yiisi.

²¹Saaoolino, «Ani Israeelete giddo maa'ne ga're Biiniyaamitera ilamoommoha di"ikkoommo? Ilama'ya Biiniyaami ga're giddo diworiidite? Tenne affanni heedhe togoo coye mayira kulattoe?» yee dawari.

²²Hakkunni gedensaanni, Saamueeli Saaoolinna soqqamaancho haru giddora haa're eesse, 30 manni ofollinowa woyyino darga ofoshshiishinsa.

²³Saamueelino qaamatto shiqishannoha, «Badde wori yuummohe maala haadhe abbi» yiisi.

²⁴ Qaamatto shiqishannohuno tafu maala noo gedeenni abbe Saaooli albaanni wori. Saamueelino, «Kuni atera bande worroonni maalaatina, kunni koyisoommo manni ledo iti» yiisi. Saaoolino Saamueeli ledo iti.

²⁵Kakkalote gaarinni ka'e katama martuhu gedensaanni, Saamueeli minisira iimaanni seekkinoonni darga goxannowa qixxeessisi. Saaoolino hakko goxe gali.

²⁶Layinki soodo gute Saamueeli Saaooli galinowiinni woshshe, «Geegiisseennahe xaate ha'rattona kai!» yiisi. Saaoolino kaeenna, Saamueeli ledo mimmito amadde gobbara fultu.

²⁷Katamunni fultara rakke heedheenna Saamueeli Saaooli, «Soqqamaanchikki alba hige qaafanno gede kulisi» yii. Soqqamaanchuno yinoonni gede ikki. Hakkunni gedensaanni Saamueeli, «Ati kayinni Maganuwiinni daggino sokka kuleemmohena shiima geeshsha konniicho agari» yiisi.