Read Sie Matiyu 9 Bible Online

Matiyu 9 - Sie bible

Matiyu 9

¹Miyi yōempe ra bōt mōemtorīleki ra nimōte eni.

²Miroradūmūtōri pugi sĭ neteme neturumurō, miyi yemalē ra nesūvlok eni; ĭm Iesū yemokesi tavniri enirora memenūwi pugi neteme neturumurō memokū, Avūg, avosūwi; ofielentug kĭk sat sū enugkĭk.

³Im nugkoneme ōvun Somūl dūmūsepen enūwi ūnōwanda mūmōkū, Iyi onūwi nam sat.

⁴Im Iesū yemelavenūri tarūsū enirora memenūwi memokū, Kūmontarū sat ūnōwami irantie?

⁵Itokowo tnoinū ĭtemelepon, worenūwi magkū, Ofilentugkĭk sat sū enugkĭk; kū, Etūok mavan?

⁶Kō ma kĭmi kwagkili Netni eni neteme horog ra nemap worefielentugi satsū, iyi yōmenūwi pugi neteme neturumūro memokū, Etūok empĭ nesūvlok enugkĭk ĭm peve ra nimo enugkĭk.

⁷Miyi yemtūok mempe ra nimo eni.

⁸Mov numpūn lō dūmōkesi mūmavlugi, mumūvietivesep Nōbū mori yemovunora ōveteme horog sugkū.

⁹Im Iesū yōmavango memokesi sĭ neteme yemetesep ra nūrū worevi muni, nin eni Matĭyū, memenūwi pugi memokū, Uri yaū; miyi yemtūok memūri.

¹⁰Im pol sugkū yemtesĭgi ūnisog nimo, sikat ōvun lĭvsaū nalekon mōvun nareki sat dūmūvelum mūmūtesĭgi dal Iesū mōvun nūrie eni.

¹¹Mōvun Faresi dūmōkesi mūmūnūwi punora ōvun nūrie eni mūmokū, Tavsogi enugkĭmi umneni dal ōvun lĭvsaū nalekon mōvun nareki sat irantie?

¹²Im Iesū yemorĭgi memenūwi punora memokū, Ōveteme horĭgives, ūtūmnakĭugi sĭ neteme tavū; irora wokon mori umnamarat.

¹³Kō ūve mūkili fan nam ugi imo, Ya umnakĭugi togesoveli memagkū mōmū aremī ra sakrifĭs; ĭt ya otūvelum worovrokonda ōvun tanepo mampīeves nōwanda, kō ōvun nareki sat.

¹⁴Mōvun nūrie eni Yōane dūmūvelum pugi mūmūtagkeli mūmōkū, ka kemlandūnesepen netevokom, mōvum Faresi sugkū, mōvun nūrie enugkĭk ūtūmuntovokom, irantie?

¹⁵Im Iesū yemenūwi punora memokū, Ravensīeme eni retepon wandĭgumpūnū pol sugkū asūon dal irora, kū? Kō nempugon ampelum mampĭ asūon mori marokonda, penūri irora wontovokom.

¹⁶Tawi sĭ umanteri nevlugkon ĭtevaū ran tan nemas ĭterōvot; nagkū sugkū imo yemeterigi woresumpat amti mōmentevaseri mōmū temas.

¹⁷Mōveteme ūtūmwosĭlĭgo wīn ĭtevaū ūnisog ōvun nokolistan numpūmetūo, kūentawi wampulet ĭm wosĭlĭgi wĭn ratilat, ĭm wonteavtĭti ōvun nokolĭstan; irora ūmwosĭlĭgi wĭn ĭtevaū ūnisog ōvun nokolĭstan ĭtevaū, mūmnafinte dūrū sū.

¹⁸Polekū iyi yemenūwi imosū punora, sĭ nivūo yivelum memtevita iran, memenūwi memokū, Okemas netūg ĭtnasiven; kō elum metipe nokopmū iran miyi amūrep.

¹⁹Im Iesū yemtūok memūri iyi, mōvun nūrie eni sugkū.

²⁰Im sĭ nasiven mori yamarat ugi nilūonde nevisū twelv, yivelum kitan memsugkori navlūtni semplaūon eni;

²¹ĭt iyi yemesepen enūw ūnōwan memokū, Nagkū ya osugkori wokon navlūtni semplaūon eni ampiēōwara yaū.

²²Im Iesū yemelagkaū memokesi iyi memenūwi pugi memokū, Nasiven, avosūwi; tavniri enugkĭk ovkĭkēō-wara; marimago yeviēōwara nasiven mori.

²³Im pol sugkū Iesū yive ūnisog nimo eni nivūo memokesora ōveteme dūmneli mōvun naviran dūmūtugi, iyi yemenūwi punora memokū, Uve ilat;

²⁴ĭt iyi ĭtnumpōkon otūmas, iyi umnalēepo.

²⁵Mirora dūmagipĭ iran. Im pol sugkū yemsatevokonda ilat iyi yive ūnisog memelekavi nokoven eni, mitnumpōkon yemtūok;

²⁶ĭm narĭgi imo yēmokumpelĭgi nūrū sū yūi.

²⁷Im Iesū yōmavango mōveteme endūrū nĭmtēi dūmūri iyi, mūmūvrugi mūmūnūwi mūmōkū, Netni eni Dēvĭd, togesovolokam.

²⁸Im pol sugkū iyi yive ūnisog nimo ōveteme nĭmtei mori dūmūlvelum pugi; ĭm Iesū yemtagkelora memokū; Kūmuntavnirĭgi yaū faneteme worumpi imo kū? Mirora dūmūnūwi mūmokū, Monokowo, Novsūromon.

²⁹Miyi vemsugkori nimĭnda mōmenūwi memokū, Eti irami sugkū tavniri enugkĭmi; ĭm nimĭnda dūtĭpelah.

³⁰Im Iesū yemwalivat ūnōwanda memenūwi memokū, Ufĭnte kimi ma tawi sī neteme agkili ugi.

³¹Kō irora dūmūve roflmūvietivesep iyi ra nūrūfū yūi.

³²Im polekū irora pūtūratumpeni ilat, dūmūtori pugi eĭ neteme nōwampat, im sĭ naviatĭndi yive iran.

³³Im pol sugkū yemteveleguni naviatĭndi yam neteme nōwampat: mov numpūn lō dūmavlugi mūmūnūwi mūmōkū, Dūpmūtōkesi sugkū imo ra Isrēel.

³⁴Kō ōvun Faresi dūraū-nūwi mūmōkū, Iyi umantevelegunora ōvun naviatĭndi ugi natemonōk enirora ōvun naviatĭndi.

³⁵Im Iesū yemnavan mempe ra sĭti sū ĭm nimōte sū memtavsokonda ōvun netevokontū ūnisog ōvun nimo tavsogi enirora, memtorenūwisah nam navosavos ugi lō, mumkororĭgives ōvun namarat mōvun netevūlūl omwisū dal ōvun netevokontū.

³⁶Miyi yemokesora ōvun numpūn lō memtogesovelora popōwo irora tawi faneteme ĭm dūmūremlemlū, irora sugkū ōvun pugipugi ĭm tawi nefĭnte enirora.

³⁷Miyi yemenūwi punora ōvun nūrie eni memokū, Novūan tamas kō ōveteme woralekon semsimugi tawi sikat; popōwo imo sugkū,

³⁸wosenĭgi Novsūromon eni novūan mori ma Iyi ontamūlora ōvun nasemnūok ran denūok eni.