Read Sie Luk 19 Bible Online

Luk 19 - Sie bible

Luk 19

¹Miyi yemtorĭmpe ra Yeriko, memavango; ĭm sī neteme,

²nin isen Sakius, nivūo ra ōvun lĭvsaū nalekon, neteme nōete yemesorugi memokū iyi agesi Iesū,

³mē iyi, miyi tawi faneteme popōwo ugi ōvun numpūn lōsū tamas, popōwo iyi potipot.

⁴Miyi yemalo, mepmōbūm, memesuki nē fĭk, memokū agesi iyi, ĭt iyi yemavango ra selat yūi.

⁵Im Iesū yivelum ra nūrū, memelasah memokesi, memenūwi pugi, memokū, Sakius, yep, moratevetvi; popōo ya andekote ra nimo sorum ire.

⁶Miyi yemoratevetvi, miyep memtōri ūnisog ugi navos.

⁷Im omwisū dūmōkesi, mūmūtavuntan, mūmunūwi, mūmōkū, Iyi okeve wororekote ūndū sī narekĭndi.

⁸Im Sakius yemetūrū memenūwi pugi Novsūromon, memokū, Narisah, origi, Ya umampunora ōvun narumkor naferug-aferug netevotesū sorūg, ĭm nagkū ya okevi parugi sī ugi sempiri ya umampitorileki ōvun nugkon devat.

⁹Im Iesū yemenūwi pugi, memokū, Ire nēōwara okovelum ra imo nimo, popowo iyi sugkū iyi sī netni isen Ebraham.

¹⁰It iyi Netni isen neteme yivelum memokū onesorokonda mamkorēōwara ōvun nesepen-neworepatevora.

¹¹Im pol sugkū dūmūrigi imosū, iyi yōmenūwi sī parabel popōwo iyi potipot Yerūsalem, mirora dūmokū lō isen Nōbū wantūratumpeni itnum, memokū,

¹²sī neteme horogesah yive ra nūrū itūga, memokū iyi ampi sī lō nisekon, mōmentorĭleki.

¹³Miyi yemovrokonda ōvun lĭvsaū isen narōlem, memafeokondugi ōvun paūnd, memenūwi punora, memokū, Usēevasĭgi afeli nempugon ya omampelum.

¹⁴Mōveteme ra sĭti isen dūmakan pugi, mūmūtamūloraōvun tandeko worelesi, mūmūnūwi mūmokū, Ka keletūmlenakīugi imo neteme worari iramam.

¹⁵Im penuri, pol sugku iyi yivi lōmori, yōĭmpelum, mempaswokonda, memokū, wamperokonda ōvun lĭvsaū mori iyi yemafeokondugi ōvun paūnd mori, wampelum pugi ma iyi onesorugi numpūrah enirora ugi sevasi mori.

¹⁶Miyi mampūm yivelum potipot, memenūwi, memokū. Narisah, paūnd sorum ya ōmempasĭgi ovun paūnd narōlem mōmū.

¹⁷Miyi yemenūwi pugi, memokū, Aremī, kĭk lĭvsaū aremī, popōwo kemnivūo tanepo ugi vilik wokon, ari iranda ōvun sĭti narōlem.

¹⁸Miyi dūrūgi yivelum, memokū, Narisah, paūnd sorum, yaū ĭmpĭ ugi ōvun paūnd sĭklem mōmū.

¹⁹Miyi yemenūwi pugi imo neteme sugkū, memokū, Kĭk ari iranda ōvun sīti sĭklem.

²⁰Im sī mōmū yivelum, memokū, Narisah, okesi, paūnd sorum mori yaū movūriugi ra mumpon nemas;

²¹popōwo yaū memtetugkīk, ĭt kĭk neteme nugkugko; kemumpi sieme kemetūtipe, ĭm kemnalekon sieme kemetūōwi.

²²Miyi yemenūwi pugi, memokū, Lĭvsaū sat, ya onūrian iram sugkū nam sorum: kemokili yaū neteme nugkugko mumumpī sieme yaū metūtipe, mumnalekon sieme yaū, metūōwi;

²³ĭm popōwo imo sugkū, irasie, kemetūtipe muni sorūg ra woretavenepon wōresēevasi ugi, ĭm pol sugkū yaū pivelum yaū pivĭ, im mōmū?

²⁴Miyi yemenūwi punora mori dūmūtūrū potipot, memokū, Uvī marugi paūnd mori mūvugi iyi mori umantipe ōvun paūnd narōlem;

²⁵mirora dūmūnūwi pugi, mūmōkū, Narisah, iyi umantipe ōvun paūnd narōlem;

²⁶ĭt ya umanūwi pugkūm memagkū, Iyi sī otipe, ampugi mōmū; miyi sī otūtipe, ampi parugi sieme mori yemetipe wokon.

²⁷Mirora ōvun novsen nakan sorūg, mori dūmūtūakīwokoyaū worari iranda, ūtōrōra ĭgko, mūtalokonda ūnĭmtūg.

²⁸Im pol sugkū iyi yemenūwi imosū, yemōbūm memsah ra Yerūsalem.

²⁹Miyi yemumpotipot Betfake ĭm Betani, ra numpūo Olivet, memtandekōwora dūrū ōvun nūrie isen, memenūwi memokū, Uve ra nimote ĭlampe,

³⁰ĭm pol sugkū kwonĭntorĭmpe kwagesi as ĭtevaū dūleki, tawi sī neteme itesep ran tan, tawi ra sī nempugon, ūsūli mūtōri.

³¹Im nagkū sī ontagkolokūm, magkū, Irasie kūmūsūli? ūnūwi pugi, mōkū, Iyi Novsūromon umnakīugi.

³²Mōvun tandeko mori dūmūve, mūmūkesi sugkū iyi yepmenūwi punora:

³³im pol sugkū dūmūsūli as mori, irora as isenda, dūmūtagkelora, mūmōkū, Irasie kūmūsūli as? Mirora dūniūnūwi, mūmōkū, Novsūromon umnakīugi.

³⁴Mirora dūmūtori pugi Iesū, mūmūvkisah ōvun nemas isenda ran tan as, mūmūtipesah Iesū.

³⁵

³⁶Im polekū iyi yemampe, irora dūmūive ōvun némas isenda ra selat.

³⁷Yive sugkū mefeli nūrū selat umeyep numpūo Olivet, ĭm semsimak omwisū ōvun nūrie isen, dūmatipotni woravos, mūmarūfoves numpĭlĭn Nōbū, ugi navianda tamas, popowo ugi ōvun numpūrahsū horog mori irora dūmōkesi;

³⁸mūmūnūwi, mūmōkū, Nevĭeves iyi mori umampelum, natemonok ra nūsian, ra nin isen Novsūromon; nĭnparata ūnpokōp, ĭm numpĭlĭn ra nūrūsū tantevakepe.

³⁹Im nugkon ōvun Faresi ra tentūrū dūmūnūwi, pugi mūmōkū, Tavsogi, enūali punora ōvun nūrie sorum

⁴⁰Miyi yemtamsi memenūwi punora, memokū, Ya umanūwi pugkūm memagkū, Nagkū imosū wanteteven, ovun nevat wamperugisah.

⁴¹Miyi yivelum potipot, memokesi sĭti, memageri ugi;

⁴²memenūwi memokū, Nagkū kĭk pokili, ah Yerūsalem, ra imo dan sorum, siemesū ugi ninparata sorum; kō, marima, umnelesakepūn.

⁴³Dansū wantepesora iram pol sugkū ōvun novsen nakan sorum wagkol nokol nagkaūugkĭk,

⁴⁴mosumpatamtugkĭk ūnisog nagkaūugisū, montalepasisep kĭk, movun netnime sorum ra mumpon kĭk; mūtūawi sī nevat ran tan nevat ra mumpon kĭk, popōwo kemetūkili nempugon netnemi sorum.

⁴⁵Miyi yive ūnisog nimo tumpora mematipotni woretelesora ratilat mori dūmusēevasi, mūmūvi sieme ūnisog,

⁴⁶menūwi punora, memokū, Yemetiyi memokū, Nimo sorūg, nimo nufwaki; im kĭmi kūmumpi veli ōvun torefora.

⁴⁷Im dansū iyi yemtavsokonda ūnisog nimo tumpora; mōvun potni sakrefīs, movun Somūl dūmnesorugi, mūmōkū nokowo wontalugi; mōvun nelepon netevokontū sugkū;

⁴⁸mūtōkesi sie wonūmpi iran, popōwo ōvun netevokontū omwisū dūmūvendegugi iyi.