Read Sie Luk 5 Bible Online

Luk 5 - Sie bible

Luk 5

¹Mōv numpūn lō dūmantūramtugi iyi, mūmōkū wandĭgi nam isen Nōbū; miyi yemetūrū ra nokoren tok Kenesaret, memokesi bōt dūrū urin tok;

²kō ovun numpūn nevi nelat dūmūwi lap, mūmorowugi ōv nokopon isenda.

³Miyi yemesuki sī bōt, isen Sīmon, memenūwi pugi, memokū iyi osaveti maleompeni vilik; miyi yemetesep memtavsokonda ovnumpūn lō marugi bōt.

⁴Isūma nam isen iyi yemenūwi pugi Sīmon, memokū, Eve ĭlepalam meti ōv nokopon soremi mevĭ nomū.

⁵Im Sīmon yemtamsi memenūwi pugi memokū, Narisah, ka kelagelaū pūmrok omwisū ĭm letūvĭ sī; kō ya ōmantipe nokopon sugkū nam sorum.

⁶Mirora dūmumpi sugkū mūmūvī nomū sikat wokon, ĭm nokopon isenda yati-potni memumti.

⁷Mirora dwalep punora ravensīeme ra bōt sī mūmōkū wampelum menaverora. Mirora dūmūvelum mūmūvūarugi bōt dūrū, sugkū dūatipotni worumkon.

⁸Pol sugkū Sīmon Piter yemokesisū iyi yumol ra numpūneteren isen Iesū memenūwi memokū, Ah, Novsūromon, ete maroko yaū, ĭt yaū neteme nareki sat;

⁹popowo iyi yemōvkerĭtwi, mirora dal iyi sugkū, ugi nomū sikat dūmūvi;

¹⁰ĭm Yakobo ĭm Yōane, ov netnime isen Sepedi, mori dūmavori Sīmon, irora sugkū. Im Iesū yōmenūwi pugi Sīmon memokū, Etūmtetugi; kĭk andūnevi oveteme marugi nempugon marima.

¹¹Im pol sugkū dūmūiyevisah ikeri irora dūmūwisep omwisū mōmūri iyi.

¹²Im pol sugkū iyi ra sī sĭti sī neteme ĭm lepros tamas, yemokesi Iesū, memokolugi nipmi iran, memsenĭgi memenūwi memokū, Novsūromon, nagkū kemagkū, kĭk faneteme woresendumsi yaū.

¹³Miyi yemeevan memsugkori iyi, memenūwi, memokū, Ya umagkū, eti sentevives. Marimago lepros isen yevia.

¹⁴Miyi yemualivat ūnōwan, memokū otūanūwi pugi sī neteme; eve ĭm sesi kĭk pugi neteme sakrefis, movugi ōv itemas tovuni sentevives sorum, sugkū Moses yempasiwokondugi mokū numpūvsok punora.

¹⁵Kō narigi iyi yemorūnekompelĭgi nūrūsū, mov numpūn lō sikat wokon dūmorūn semsimokonda mūmōkū wandĭgi iyi, mampī horĭgives marugi ōv namarat isenda.

¹⁶Miyi yemesepen ive marokonda ra nūrū wokon, memufwaki.

¹⁷Im sī dan pol sugkū iyi yemtavsokonda, ovun Faresi, movun Nefĭnte nam dūmūtesep potipot, mori dūmne ra nimote sū Kalĭli, ĭm Yūdia, ĭm Yerūsalem, ĭm horog isen Nōbū iran worumkororĭgives.

¹⁸Mōveteme dūmūriuki gi nesūvlok sī neteme neturumurō, mūmosorugi woruriuki ūnisog, mūmōkū wantipe iyi ūnĭpmi isen.

¹⁹Mirora dūtōkesi nokowo wanduiki iyi ūnisog, popowo ugi ōv numpūn lō; mirora dūmūsuki mūmūtī pelah numpūn nimo, mūmovkisep iyi gi nesūvlok ileboteven irora, ūnĭpmi isen Iesū.

²⁰Miyi yemokesi tavniri isenda memenūwi, memokū, Woragi, umafielentug kĭk sat sū sorum.

²¹Movun Somūl, movun Faresi dūmatipotni woretovotarū, mūmūsepen tagkel ra, mūmōkū, Mē imo umanuwi nam sat? Mē horog worefielentugi sat sū? Nōbū wokon.

²²Im Iesū yemelavenūri tarūsū isenda, memtamsi memtagkelora, memokū, Irasie kūmasepen tovotarū sugkū?

²³Itokowo mōmū ĭtemelepon? worenūwi magkū, Umafielentug kĭk; kū, worenūwi magkū, Etūok mavan.

²⁴Kō ma sugkū kĭmi kwagkili. Netni isen neteme umasepi netipe ra nemap horog isen worefielentugi sat sū (iyi yōmenūwi pugi neteme neturumurō memokū), Ya umanūwi punok memagkū, Etūok, muriuki nanum sorum ĭmpe ra nimo sorum.

²⁵Marimago iyi yemtūok ūnimĭnda, memuriuki mori iyi yemalewi ran tan mōĭmpe ra nimo isen memarūfoves numplĭn Nōbū.

²⁶Momwisū dūmōvkirĭtwi, mūmarūfōves numplĭn Nōbū mūmūmtetugi tamas, mūmūnūwi, mūmōkū, Kos kelokesi ovun navlugi ire.

²⁷Penūri imosū iyi yemavan memokesi sī neteme nalekon, nin isen Livĭ, mori yemetesep ra nimo woralekon; miyi yemenūwi pugi me mokū, Uri yaū.

²⁸Miyi yemowi sep omwisū, memtūok memūri iyi.

²⁹Im Livĭ yemumpi narigari tamas nisekon ra nimo isen; mōveteme nalekon, mōveteme mōmū, irora sikat, dūmūtesĭgi dal irora.

³⁰Movun Faresi, mōvun Somūl isenda dūmworemi sat, mūmūvriurora ovun nūrie isen, mūmumtagkelora, mūmōkū, Irasie kūmneni memnamoneki dal ovun nalekon mōvetemĭndi?

³¹Im Iesū yemtamsi memenūwi punora memokū, Irora mori horĭgives ūtūmnakĭugi sī neteme tavū, irora wokon mori ūmnamarat.

³²Ya okovelum mokū amperokonda ōvetemendi wumpĭeves nowanda, ĭm tawi ovun tanepo.

³³Mirora dūmūtagkeli, mūmōkū, Irasie ovun nūrie isen Yōane ūmandūnetevokom, mūmnufwaki, misenda ovun Faresi sugkū, kō sorum ūmneni mūmnamoneki?

³⁴Miyi yemtagkelora, memokū, Kimi kwonumpi raven-sīeme isen retepon memtevokom polekū asūon umantendōwi dal irora, kū?

³⁵Ko wampelum dansū pol sugkū ampi marokonda neteme mori otōri retepon, mirora wontevokom ra dansū mori.

³⁶Miyi yōmenūwi punora sī parabel memokū, Tawi sī neteme umanteri nevlugkon nemas ĭtevaū ran tan némas ĭterōvot; nagku sugkū pe ĭtevaū amti, mōmentevaseri, popōwo nevlugkon ĭtevaū tawi sugkū ĭterovot.

³⁷Im tawi sī neteme umwosĭlĭgi win ĭtevaū ūnisog ōv nokolistan numpūmetūo; ĭm nagkū sugkū, win ĭtevaū wampulet ovun nokolistan mōwosĭlĭgi ilat, mōv nokolistan wagkini.

³⁸Aremi wosĭlĭgi win ĭtevaū ūnisog ovun botel ĭtevaū, ĭm kwafĭnte dūrūsū.

³⁹Im tawi sī neteme omoneki win nĭmperĭtwi, marimago onakīugi win ĭtevaū; iyi umagkū nĭmperĭtwi aremi mōmū.