Read Sie Luk 6 Bible Online

Luk 6 - Sie bible

Luk 6

¹Im ra danemindog dūrūgi iyi yemavango ra ovun denūok whit; movun nūrie isen dūmareki dugon whit mūmūsendokon mūmoni.

²Im nugkon ovun Faresi dūmōkesora, mūmūtagkelora, mūmōkū, Irasie kūmnumpi imo mori mūmnareki danemindog?

³Im Iesū yemtamsi memtagkelora memokū, Kūtūsepi nam ugi imo Dēvĭd yemumpi pol sugkū iyi yemtemas, iyi mirora dal, nokowo iyi yentorĭmpe ra nimo isen Nōbū,

⁴mempī yōūp tumpora, memoni, memovunora dal iyi, ĭm nam alam umanūwi, oveteme sakrefis wokon woneni imo, kū?

⁵Miyi yemenūwi punora memokū, Iyi netni isen neteme Novsūromon ra danemindog.

⁶Im danemindog sī iyi yĭntorĭmpe ra nimo tavsogi, memtavsokonda, ĭm sī neteme yūi, nokoven meves navsilni;

⁷movun Somūl, movun Faresi dūmūterareki nagkū iyi umpi horĭgives ra danemindog, mūmōkū wampievri iyi.

⁸Miyi yemesepen nokili tarūsū isenda memenūwi pugi neteme nokoven navsilni, Etūok metūrū ĭlebōteven.

⁹Miyi yemtūok metūrū. Im Iesū yōmenūwi punora memokū, Ya ontagkolokūm sī, Ra danemindog aremi worumpi aremi, kū worumpi sat? woreviēōwara, kū woretalugi?

¹⁰Miyi yemelagkaū iranda sū memenūwi pugi neteme, memokū, Eevan. Miyi yemumpi sugkū ĭm nokoven yēipoipo sugkū moor.

¹¹Mirora dūmarakī tamas, mūmūnūwi punora irora, mūmōkū wonumpi sie iran Iesū.

¹²Ra dansū mori iyi yive ra numpūo, memokū worufwaki; memufwaki iran Nōbū pūmrok omwisū.

¹³Im prūbokūm iyi yemovrokonda ovun nūrie isen, memtampolora twelv, mōmatovninda, memokū, ovun tandeko; Sīmon, mori iyi yatov nin, memokū,

¹⁴Piter, ĭm Anderū avensi isen, Yakobo ĭm Yōane, Fĭlĭp ĭm Bartolomū, Matĭyū ĭm Tomas,

¹⁵Yakōbō, netni isen Alfius, ĭm Sīmon, nalĭg isen Selōtes,

¹⁶Yūdas, avensi isen Yakobo, ĭm Yūdas Iskariot, mori yempirĭgi iyi.

¹⁷Miyi yemyep dal irora memetūrū rasĭnūrū nomolsep, ĭm dal irora sī semsimak ra ovun nurie isen, mov netevokū semsimak tamas mori dūmne ra Yūdia ĭm Yerūsalem, ĭm Tĭr ĭm Sīdon ra nokoren tok, mūmōkū wandĭgi iyi mampi horĭgives marugi ōv namarat isenda;

¹⁸miyi yemumkororĭgives irora mori ōv naviatindi dūmnelĭleki iranda.

¹⁹Mirora sū ra numpūn lō dūmōkū wosugkori iyi, popowo horog yemne ra iyi memumkororĭgives irora sū.

²⁰Miyi yemelasah memokū agesora ovun nūrie isen, memenūwi memokū,

²¹Nevĭeves kimi ovun narumkor, ĭt lō isen Nōbū soremi. Nevĭeves kimi mori kūmuntemas marima, ĭt wontali kūm. Nevĭeves kimi mori kūmnageri marima, It kimi kwaseragi.

²²Nevĭeves kimi pol sugkū oveteme wonakan pugkūm, mosatevugkūm, mamprēurokūm, muntafugi nin sotemi sugkū sat, popowo ugi Netni isen neteme.

²³Wavosavos ra dan mori, mūvotoat, ĭt nipmi soremi tamas unpokūp; ĭm ritemendeme isenda dūmumpi sugkū iranda ovun profet.

²⁴Owi irami oveteme noete, ĭt kĭmsi kūvĭsū aremi soremi.

²⁵Owĭ irami ūmuntalikūm, ĭt kimi kwontemas. Owi irami ūmuntufop marima, it kimi kwandĭgumpūnū, mūmnageri.

²⁶Owĭ irami pol sugkū oveteme sū wamkūmotevisep, ĭt ritemendeme isenda dūmumpi sugkū ugi ovun profet nempiri.

²⁷Kō, ya umanūwi pugkūm mori kūmandĭgi, memagkū, Wolintokonda ovun novsen nakan soremi.

²⁸Wumpeleves iranda mori ūmnakan pugkūm Utesukives nisekonda mori ūmasepam ugi kĭmi. Ufwaki nisekonda mori ūmūntavuntan sat irami.

²⁹Miyi sī ampi ateki waū nogūm, ovoli pugi nugkon. Miyi sī ampi parugkik nemas sorum worekafugi, etūsiugi semplaūon sorum.

³⁰Uvunora sū mori ūmnesenĭgi, ĭm pol sugkū sī umampi ovun se sorum, etūōmuntagkolugi.

³¹Sugkū kūmnakiwo-konda oveteme worumpi nisekomi, wumpi nisekonda.

³²It nagkū kūmnelintokonda wokon mori ūmnelintugkūm, mē onumpalugi irami? ĭt ovun nareki ūmnelintokonda mori ūmnelintokonda.

³³Im nagkū kūmumpeleves iranda mori ūmumpeleves irami, mē onumpalugi irami? ĭt ovun nareki ūmnumpi sugkū.

³⁴Im nagkū kūmampunora mori kūmagkū wōmampugkūm, mē, onumpalugi irami? ĭt ovun nareki umampunora ovun nareki, ma sugkū wōmampĭ.

³⁵Kō wolintokonda ōv novsen nakan soremi. Wumpelēves, mūvugi wokon, mūtūōmamtemetemetugi mōmū, im nipmi soremi wanti tamas, ĭm kimi kwanti ovun netnime isen Tantevakepe; ĭtiyi umnumpelēves iranda mori ūtūmumpalugi, mōvetemendi.

³⁶Kĭmi ūtogesoveli, sugkū Itemen soremi umentogesoveli.

³⁷Utūtarū sat ma otūontarū sat irami; mūtūnūwi mōkū, umnoworepatevi, ma otūanūwi magkū, kūmnowore-patevi.

³⁸Ufielintokonda ma afielintugkūm; ūvugi, mōmampugkūm; oveteme wampugkūm, mampūarugisū, moneraterugi monugkeri semsimugi, moselugilat. Wōmentalug pugkūm sugkū kūmūntalug punora.

³⁹Miyi yemenūwi sī parabel punora, memokū, Neteme nimtei faneteme mentōri sī neteme nĭmtēi kū? Dūrūsū wamol ra nokol, kū?

⁴⁰Sī nūrie tawi mōmū horog ra tavsogi isen; kō, omwisū mori ūmagkilisū fan nam wanti sugkū nagkū ovun tavsogi isenda.

⁴¹Im irasie kĭk emnelarkēi navivon nē ūnĭpmi apmisĭ, metūmagkū ugi nelumpoi nē ūnĭmtura?

⁴²Kū, nokowo kanūwi pugi apmisĭ, magkū, Avūgsĭ, aremi ya osemsi navivon nē marugi nimtum, im kĭk otūmagesi nelumpoi nē ūnĭmtum kĭk? Neteme nempiri mampum nevi nelumpoi nē marugi nimtum kĭk, im penuri komagesi nelampalam mesemsi navivon nē marugi nipmi isen apmisī.

⁴³Tawi sī nē aremi umampūo ugi novūan ūr; ĭm tawi sī nē ūr umampūo ugi novūan aremi.

⁴⁴Umagkilora nēsū ugi novūanda; oveteme ūtūmnesevi weve ra nē nemlowongo, kū novūan vin marugi topavū sat.

⁴⁵Sī neteme aremi umumpī siame aremi marugi woretavĭnapon ūnōwan; ĭm sī netemendi umumpĭ sieme sat marugi woretavinpon ūnōwan; ĭt iyi umanūwi sugkū siamesū sikat ūnōwan.

⁴⁶Im kimi kūmamperoko yaū, mūmagkū, Novsūromon, Novsūromon, irasie? ĭm kūtūmnumpi sugkū ya umanūwi pugkūm.

⁴⁷Iyi sī umampelum po yaū memandĭgi nam sorūg, memnumpi, ya umanūwi pugkūm meniagkū iyi sugkū mē,

⁴⁸iyi sugkū neteme mori yemumpi nimo, memokolugi ĭmpwap memetipe potnin ran tan vetūnam; ĭm pol sugkū yeti nōisap ĭm numpūn nesop yevelugi ra nimo mori, metūnēeliel, popowo yematipotnĭn ra vetūnam.

⁴⁹Miyi sī umandĭgi, metūmnumpi, iyi sugkū neteme yemumpi nimo ra nemap, ĭm tawi potnin, numpūn nesop yemevelugi, memumol itnum, ĭm talepasi nimo mori tamas.