Read Sie Yoane 21 Bible Online

Yoane 21 - Sie bible

Yoane 21

¹Penuri imosū Iesū yōmsesi Iyi punora ōvun nūrie eni; irora ran tan tok Tīberius; iyi yemesepen sesi Iyi punora sugkū imo.

²Dūmūsoropūtah Sīmon Piter, ĭm Tomas nalĭg eni Dĭdĭmus, ĭm Nataneel, neteme ra Kana ra Kalĭli, mōvun netnime eni Sepedi, ĭm dūrū mōmū ra irora ōvun nurie eni. Sīmon Piter yemenūwi punora

³memokū, ya umampe memtī nomū. Irora dūmūnūwi pugi mūmōkū, Kos, kos kelampe, Marimago dūmūve ilat musuki bōt; ĭm pūmrok mori dūtūvĭ sī.

⁴Prūbokum Iesū yemetūrū ikeri, kō, ōvun nūrie mori dūtūkili ma Iyi Iesu.

⁵Popōwo imo sugkū Iesū yemtagkelora memokū, Ovūnyan, kūmantipe ĭm lawi nevag, kū? Irora dūmūnūwi pugi, mūmōkū, Tawi.

⁶Miyi yemenūwi punora memokū, Utipe nokopon ra nokoren meves ĭm kĭmi kwampi. Irora dūtipe sugkū, mūtūfaneteme worereveni popōwo ugi nomū sikat.

⁷Nūrie mori Iesū yemelintūgi, yemenūwi pugi Piter, memokū, Iyi Novsūromon. Im pol sugkū Sīmon Piter yemorigi ma Iyi Novsūromon, yemetōetĭgi netaūsep, ĭt iyi yetūvīugi némas, memesepen iraūsah ran tok.

⁸Mōvun nūrie mōmū dūmūvelum ra sī bōt virok, ĭt irora tawi isūt marugi ikeri, sugkū wosavera wun hunder, mūmūreveni nokopon ugi nomū.

⁹Im pol sugkū dūmūsah ikeri dūmōkesi nom ugi potmelevag, im sī nomū rantan, ĭm yōūp.

¹⁰Iesū yemenūwi punora, memokū, Uviĭmpelum nugkon ōvun nomū kūvĭ marima.

¹¹Sīmon Piter yōmesuki morevenisah nokopon ikeri, yemovūarugi ōvun nomū tamas, wun hunder ĭm fĭfti-tri; ĭm nokopon yetūumti. Iesū yemenūwi punora, memokū, Uvelum mūvag.

¹²Im tawi sī ra irora ōvun nūrie yemsemse woretagkeli magkū kĭk me? dūmūkili Iyi Novsūromon.

¹³Im Iesū yivelum mempĭ yōūp mori, memovunora, ĭm nomū sugkū.

¹⁴Imo nempugon desel Iesū yemsesi Iyi punora ōvun nūrie eni penūri Iyi yōĭmtūok marugi nemás.

¹⁵Penūri dūmoni Iesū yemenūwi pugi Sīmon Piter, memokū, Sīmon, netni eni Yōna kĭk emnelintokoyaū mōmū ra iroramo, kū? Iyi yemenūwi pugi, memokū, Monokowo, Novsūromon; kemagkili ma ya umnelintugkĭk tamas. Iyi yemenūwi pugi, memokū, Avugunora ōvun lam enyaū.

¹⁶Iyi yōimtagkeli, nempugon dūrū, memokū, Sīmon netni eni Yona, kem nelintokoyaū kū? Iyi yōmenūwi pugi memokū, Monokowo Novsūromon; kĭk emagkili ya umnelintugkĭk tamas. Iyi yemenūwi pugi memokū, Efĭnte ōvun pugipugi enyaū.

¹⁷Iyi yōimtagkeli nempugon desel, Sīmon netni eni Yōna, kemnelintokoyaū tamas, kū? Piter yemorigi sat popōwo yemtagkeli, nempugon desel, memokū, Kemnelintoko yaū tamas, kū? miyi yōmenūwi pugi, memokū, Novsūromon, kĭk emagkili siamesū; kemagkili ya umnelintugkĭk tamas. Iesū yōmenūwi pugi memokū, Avugunora ōvun pugipugi enyaū.

¹⁸Itnesog ĭtnesog, ya umanūwi pugkĭk memagkū, pol sugkū kĭk neviarep kemesepen netōetĭgi memavan ra nūrūsū kemakĭtigi; kō nempugon kĭk onumpūmetūo kĭk īevan gi ōvun nokopmū, ĭm sī mōmū amkīketōetĭgi, mandiugkĭk ra nūrū kĭk otūmnakiugi.

¹⁹Iyi yemenūwi imo memokū ugi nemas mori iyi unumpi nilasilaswi iran Nōbū. Penūri imo nam, Iyi yemenūwi pugi, memokū, Kampelesi irag.

²⁰Piter yemelagkaū memokesi nūrie mori Iesū yemelintugi, yemūri, mori yemtesūo ra mumpon nemindugon eni Iesū ra nempugon narigari, memtagkeli, memokū, Novsuromon, mē iyi umnempiriwugkĭk?

²¹Piter yemokesi iyi mori, memtagkeli Iesū, memokū, Novsūromon, Iyi mori, sie ugi?

²²Iesū yemenūwi pugi, memokū, Nagkū ya umagkū iyi antendōwi mafeli nempugon ya umampelum, Tie imo iram? Kampelesi irag.

²³Mirora ravensieme dūinūrĭgi nam, ma nūrie mori otūamas; kō Iesū yetūnūwi pugi memokū Iyi otūamas; yemokū, Nagkū ya umagkū iyi antendōwi mafeli nempugon ya ōmampelum, tie imo iram?

²⁴Iyi nūrie mori umnumpūvsok ugi imosū, memetīyi imosū; ĭm ka kĭmlagkili ma numpūvsok eni itnesog.

²⁵Kō ūmante sikat mōmū mori Iesū yemumpi; kō nagkū sī onetīyi magkū ugi omwisū, ya umagkū ōvun netiyi mori wampūarasah Nemap omwisū.