Read Sie Rom 12 Bible Online

Rom 12 - Sie bible

Rom 12

¹Im popōwo pe ya umneserugkūm, ravūgsīeme, ugi ōvun nelĭntugi eni Nōbū, memagkū utenimpe nokolisirami, sokowara amūrepwi tumpora, aremī ugi nisekon Nōbū, mori ĭtnesog umante irami worumpi.

²Utūte kĭmi ra netevarū sugkū lō ra nemap: kō ūte kĭmi sī ugi nōwami ĭtevaū, ma kĭmi wagkili tarū eni Nōbū, mori siame aremī ĭm nugko ĭm tanepoves ūnĭpmi eni.

³Im ya amagkū pugkūm kĭmi sū, ugi ĭtemas paū yemovoyaū, woretū tarugi iran iyi ma iyi sī horog momūgo; kō woretarū sugkū tarū nemolsep, sugkū Nōbū yemovunora oveteme sītevengo tavniri.

⁴Popōwo ĭt sikat nĭvlugkon nokolisiran ra sī irant ĭm irora tawi ugi numpūrak siteven:

⁵ĭm sugkū kos, kos sikat mori kos sugkū nokolisirant siteven ra Krĭstō, ĭm kos sikat, kō sugkū siteven nisekont kos.

⁶Im kos kel evī sī ĭm sī sugkū horog ĭm ĭtemas dūmōvugkos, nagkū anūatumpene nam, aremī kos kel anūatumpeni sugkū tavniri enugkos;

⁷kū torugat torenūwi aremī kos kel enelekavi torugat enugkos ugi natekisah ĭtnesog; kū mē mori tavsogi aremī iyi onatekisah woretavsogi, imo numpūrak isen;

⁸iyi mori umesuki ves pun ora woreti nowanda, aremi iyi ante mafinte aremī imo numpūrak isen: iyi umnumpi ĭtemas, aremī iyi unumpi ugi nowan ūnisog itnesog; iyi mori umafinte ōveteme sugkū numpūnda, aremī iyi onumpi imo ugi natekisah dan sū; iyi mori umentogesovolora, aremī iyi onumpi imo ugi nowan navosavos.

⁹Utū elintugi ugi nimpiri. Ukesi sat siame ūr kĭmi, Ute unam ra siame aremī.

¹⁰Ufielintugkūm kĭmi sū sugkū ravūgsĭeme;

¹¹mū sesieves irami: ūtūte netromoro ra numpūrak; watekisah ugi ūnowami; mōimtorugat iran Novsuromon;

¹²ūratevetūwi ugi navosavos; ūte ugi nemolsep ra nesorū norĭgumpūnū; wofwaki ĭndowi;

¹³ūvun ora ōvun tavniri norumkora; ūte horog kĭmi ugi navūgonora oveteme dan sū.

¹⁴Uvīeves iranda mori umnumpi nugkugko irami; ūvīeves, ūtūvīĭndi.

¹⁵Wavos dal irora ūmnavosē wageri dal irora ūmnageri.

¹⁶Ute ugi tarū siteven pugkūm kĭmi. Utūte neyompeli ugi siame horogsah, kō ūtarū kĭmi ugi siame nemolsep. Utoko kĭmi memagkū kĭmi ōvun nelekon.

¹⁷Utū umpi nampon ra sat eni sī neteme pugi. Wumpi mūtarūgi siame aremi ūnemĭnda ōveteme omwisū.

¹⁸Nagkū kĭmi faneteme ugi, ūte ugi ninparata dal oveteme omwisū.

¹⁹Ravūgsīeme, ūtū umpi nampon ra sat irami, kō ūtaseveōa narakī: popōwo Iehōva yemenūwi memokū, Enyaū naraki; Yaū, ya onūrian.

²⁰Kō nagkū mentemas novsin nakan enugkĭk, avūguni; nagkū umampiumnū, avugi nū woromoneki: popōwo nagkū kwonumpi sugkū kĭmi kwumpi nelintugi tamas aremī iran.

²¹Utū wantantevakepe sat, kō ūtantevakepe kĭmi ra sat ugi ōvun numpi aremī enugkimi.