Read Sie II. Korint 9 Bible Online

II. Korint 9 - Sie bible

II. Korint 9

¹Im ya ctū anūwi ra netiyi pugkūm ugi itemas paū enugkimi mori nisekonda ōveteme tavniri:

²popōwo ya umagkili nakiugi ūnōwami, mori ya onūwi ugi horog punora ōveteme Masedonia, meinokū ōveteme Akea dūmūsemsimugi ĭtemas nesitū enirora mūkumpeli sū etūwī sugkū sī nevi; ĭm natekisah enugkimi yemoiokonda ōveteme sikat ra irora.

³Kō ya otamūl, pugkūm nugkon ravūgsīeme, ma nam horog sorūg ugi kĭmi otū anti nam wokon ugi imo siame; ma, sugkū ya onūwi pe, kwontavesves sū kimi:

⁴kū nagkū pe tawi, nagkū wonūri yaū nugkon ra irora Masedonia nigoi irora wagesi kūmūtū tavesves, yaū (ma ya otū magkū kĭmi) ya ampi narumprum ugi nam narigi enyaū mori ugi kĭmi.

⁵Popōwo pe sugkū yaū mokū ya osenĭgora ovragi ravūgsīeme mori, ma irora wampūm mesemsimugi nelĭntugi mori kĭm ūnūwi, ma imo ante sugkū nelintugi itnesog enugkimi, ĭm tawi sugkū ugi niyevi masiugi.

⁶Kō ya magkū, Iyi mori onōwi virok siame onesem-simugi virok sugku; ĭm iyi mori onasĭviugi horog onesemsimugi horog sugkū.

⁷Aremī ōveteme omwisū wonumpi ĭtemas ugi tarū ūnōwanda; tawi ugi asiugi ĭm tawi ugi nugkugko: umante nelĭntugi eni Nōbū iran iyi mori umnumpi ĭtemas ugi itnesog ūnōwan.

⁸It Nōbū faneteme worumpi worenug pugkūm ōvun itemas omwisū; ma kĭmi faneteme ra siame sū, ĭm worenug ra ōvun numpūrakves enugkĭmi omwisū; sugkū dūmūtiyi,

⁹Iyi naseviugi siame sū, iyi umnelĭnto konda ōvun norumkor; Umantindowi tanepoves isen ūnam indowi.

¹⁰Im iyi mori umentalug pugi neteme naseviugi novsin ĭm nevag nisekonda ōveteme, onumpi woralam novsin nisekomi worowi, ĭm onumpi woralam fan ra ōvun numpūrak tanepo enugkimi:

¹¹ĭt kĭmi kūmūvī nōēte tamas ra siame sū woretalug, ĭm imo umnumpi iramam worumpalugi pugi Nōbū.

¹²Popōwo ime talug ra imo numpūrak otūm numpi wokon woresitū iranda ōvun norumkor, ōveteme aremī, kō umnumpi horog sikat umpalugi pugi Nōbū;

¹³popōwo ugi numpūvsok irami ugi imo numpūrakeves enugkĭmi irora ūmnumpi nilasilaswi iran Nōbū popōwo ugi sendiokives tavnirigi ugi navosavos eni Krĭsto, ĭm popōwo ugi itemas paū horog enugkimi punora, ĭm punora ōveteme omwisū;

¹⁴pol sugkū irora pe irora sugkū, ugi nesenigi nisekomi, ūmnelintugkūm tamas popōwo ugi itemas paū eni Nōbū ūnōwami.

¹⁵Kompalugi iran Nōbū popōwo ugi ĭtemas paū nusian tamas isen.