Read Sie I. Piter 4 Bible Online

I. Piter 4 - Sie bible

I. Piter 4

¹Im popōwo Krĭstō yivi nesorū ra nokolisiran nisekont, ūte horog kĭmi ūnōwami sugkū iyi: popōwo iyi mori yimpī nesorū ra nokolisiran yimowi sat;

²ma kĭmi ūtūwanti ra nugkon nomūrep enugkimi umante tovūni nilasivian isenda ōveteme, kō ugi tavniri pugi Nōbū.

³Popōwo kos kĭm lete tantop worumpi numpūrak enirora ōvun nelevokevat, ĭm woravan ra nilasivian, ĭm nakiugi sat, ĭm namoneki ugi win, ĭm neyōimpeli, ĭm nemlū ugi namoneki, ĭm tevita tevita satindi iranda ōvun natmas:

⁴ĭm popōwo irora ūmavlugi, mūtavūntan irami popōwo kūmūtū alo ra ōvun sat horog wokon dal irora:

⁵kō irora wampi nūrian marugi mori umnūrian iranda ōvun nomūrep mōvun nemás.

⁶Im popōwo pe sugkū dūmūtorenūwi nam navosavos punora ōvun nemas wokon, ma irora wampi nūrian sugkū ra nokolisiran neteme, kō ūmkūmēyōwara ugi Nōbū.

⁷Kō umumbotibot aveni siame sū marima; Im popōwo pe sugkū ūtarū ves ūnōwami, wumpi netevani aremī mūmūfwaki:

⁸ĭm mōmū ra siame sū omwisū ute ugi nelintugi tamas pugkūm kĭmi; popōwo nelintugi umatiumpeni sat sū sikat:

⁹wavūgonekūm kĭmi sī ĭm sī ugi nevag mūtū asiugi:

¹⁰sugkū nagkū kūmūvī sie itemas sī ĭm sī, ūtalokugi sugkū pugkūm, sugkū ōvun livsaū tanepo ugi ōvun ĭtemaspaū tamas eni Nōbū:

¹¹nagku sī anūwi nam, aremī iyi anūwi sugkū nam eni Nōbū; nagkū sī ontalokugi ĭtemas aremī iyi ontalokugi sugkū faneteme isen marugi Nōbū: ma sugkū Nōbū ampi nilasilaswi ra siame sū omwisū ugi Iesū Krĭstō, iyi mori ĭt isen nilasilaswi ĭm horog ūvūm nevisū ĭndowi ĭndowi. Amen.

¹²Utūwaylugi, ravūgsĭerne, popōwo ugi nesesaū nugkugko tamas ampelum irami, mori ampelum woretapmi kĭmi, sugkū nagkū sie sī ĭtevaū okovelum irami; kō wavos,

¹³popōwo kĭmi kūm mavremūgi ōvun nesorū eni Krĭstō, ma sugkū ra nempugon antūratumpeni nilasilaswi isen kĭmi kwampi sugkū navosavos nūsian tamas.

¹⁴Nagkū wontavūntan irami popōwo ugi nin eni Krĭstō, ah, kĭmi ōvun nevieves ōopōwo ugi pe, popōwo Naviat nilasilaswi ugi ĭm Naviat eni Nōbū umantindowi irami.

¹⁵Kō ufinte kĭmi ma tawi sī irami ampi nesorū sugkū neteme talugi, kū neteme numprok, kū neteme tampalaū, kū neteme emesumpelūleye ugi nam isen ra siame enirora ōveteme, tawi isen:

¹⁶kō nagkū sī ampi nesorū popōwo iyi neteme eni Krĭstō, aremī iyi otū onarumprum ugi; kō aremī iyi onumpalugi iran Nōbū tamas ugi pe.

¹⁷Popōwo tanepugon okovelum sū worūrian iranda ra nimo tumpora eni Nōbū: ĭm nagkū atipotni irant mampūm, wamsokonda mori ūtūmontavniri nam navosavos eni Nōbū?

¹⁸Im nagkū mōmū nugkugkugko worumkorēyōwara ōvun tanepo, wonalo iyi ōvun netūtavniri ĭm ōvun nareki sat?

¹⁹Im popōwo pe aremī irora sugkū mori ūmumpī nesorū ugi nesepen tarū isen Nōbū wantinepe naviat isenda ra netevarū aremī pugi iyi, sugkū pugi tanepo mori yemumpi tiame sū.