Read Sie II. Piter 2 Bible Online

II. Piter 2 - Sie bible

II. Piter 2

¹Kō dūmūte dal ōveteme ōvun profet nimpiri, ĭm wante sugkū dal kĭmi nugkon ōvun tavsogi nimpiri, ĭm irora wonatnipotni ugi nimpiri woretavsogi, tavsogi eniora umnumpi ūr ūnōwanda ōveteme, ĭm irora wanūaveni Narisah mori yimpasi irora, mirora wampī iranda irora pe irora nūrian tavtiti irora.

²Im sikat wonūri numpūrak nilasivian sat enirora; ĭm popōwo ugi irora wanūwi nagkaū ugi selat tanepo.

³Im popōwo ugi nilasivian nōēte irora, wanūwi nam nimpiri woresebetnam irami ma irora wonumpi kĭmi sugkū siame sēvasi wokon: kō nūrian nisekonda, wampelum iranda marima, ĭm nempugon wontavtiti irora omentauepugon marima.

⁴Popōwo nagkū Nōbū yetu semsempari ōvun nagelo pol sugkū irora dūmūmpi sat, kō yemtafugi irora ra niswate, memsompatamtokonda ra nokol nilevokevatwi, nimsin nūrian iranda;

⁵metū ēviyōwara nemap ĭtnempris, kō yemēviyōwan Nōa, neteme torenūwisah nam tanepo, dal ōveteme seven mōmū, polsugkū yivīĭmpelum nōisap ra nemap isenda ōvun narekisat;

⁶yemokeni ōvun siti Sodom ĭm Komora memumpi irora sugkū, pentop wokon, ma irora wanti safi nisekonda ōvun netūtavnirigi;

⁷yemsemsempari Lot, mori yemorigisat popōwo ugi nilasivian sat enirora ōvun narekisat dan sū

⁸(popōwo neteme tanepo mori yemete dal irora memokesi memorigi ōvun numpūrak satindi wokon enirora yemorigumpūnū dan sū ūnōwan aremī isen popōwo ugi irora):

⁹urigi ugi kĭmi pe, kō Novsuromon faneteme woresemsempari ōvun tanepo marugi tapmi ĭm woravsivsi ra mumpon nurian ōvun netūtanepo mafeli dan nurian;

¹⁰ĭm mōmūgo irora mori ūmnūri nakiugi nilasivian ūr ra nokolisiranda im nililūō, mūmakan pugi nam alam enirora ōvun narisah ūmūtipe irora nimsin. Ovun nugkugko, ōvun nareki nam, ūmūntavūntan iranda ōvun nivūō nam alam mūturigi sat ugi:

¹¹kō ōvun nagelo mori mōmū horog iranda im faneteme, ūtū manuwi nam nugkugko nurian iranda ōvun nivūō nam alam ūnipmi eni Novsūromon.

¹²Kō iroromo mori, sugkū ōvun nūrah tawi tarū isenda, dūmumprokomol ōvun nūrah wokon nimsin nemas, ūmūntavūntan ran tiame irora ūtūmagkili sie ugi, ra numpūrak enirora worokinora ōveteme itnesog wonokinora sugkū,

¹³mirora wampī nesorū nipmi numpurak nagkaū enirora; irora ūmneyōpeligi pūakaspaakas mūmnavos ugi, ōvun nililuō ōvun noveli, ōvun nimpiri polsugkū ūmneni nevag horog dal kimi ūmnavoswi;

¹⁴ĭm niminda ūvwarugi tampalaū, ĭm tawi faneteme worūwi sat; ūmūnlorora ōvun netromoro ra sat; irora ūmnūpūrak indowi ūnuwanda ra nilasivian nōēte;

¹⁵ōvunyan ra navoret; dūmūwi selat aremi dūmavan pelah, dūmūri netevani eni Bēlam netni eni Beor mori yemelintugi nūmpūrak nagkaū;

¹⁶kō dūmūsompat iyi mūyevi popōwo ugi nareki nam isen; sī as natepū yemam pugi ra navian neteme memsumpat neyompeli eni profet.

¹⁷Irora sugkū nū itokeli ĭm tawi nū, ōvun moap nemetagi umelimsi; umantipe nilevokevat ra nilevokevat wokon nisekonda.

¹⁸Popōwo ugi ōvun nam horog wokon kō tawi fan, irora ūmūntorora ra ōvun nakīugi nilasivian nokolisiran nililūō, irora mori ūmbotibot worale morokonda mori umantindowi ra nagkaū;

¹⁹ūmagkū wamponora nemolsep mūsūlora, ĭm irora pe irora ūmnagelaū wokon ugi nugkugko ra nililūō ovitav ugi; popōwo iyi mori sī neteme umentantevakepe iran umante ra mumpon nokoven worelivsaū wokon.

²⁰Popōwo nagkaū irora dūmalo marugi ōvun siame nililūō ra nemap ugi tavsogi nam ugi Iesū Krĭstō Novsūromon, mōĭmtorileki mūtūte ugi nugkugko ra imo tiame ūr, irora wante ranisah mōmū ūr ra nobūm.

²¹Popōwo mōmū aremī nisekonda woretūkili selat nomurep, ma, polsugkū dūmūkilisū, wontorileki marugi nam alam tumpora dūmūtinepe punora.

²²Kō umantepū iranda sugkū nam nagkaūintan ĭtnesog memokū, kūri umentorileki ra nelūō isen ĭm numpekasi mori dūmorwugi umnaiyokiugi ra nal.