Read Sie I. Yoane. 3 Bible Online

I. Yoane. 3 - Sie bible

I. Yoane. 3

¹Ukosi nelintugi nūsian eni Itement pugkos, ĭt iyi umnatovninekos magkū ōvun netni eni Nōbū: ĭm ĭtnesog kos sugkū. Im popōwo pe sugkū ōveteme ra nemap ūtūmagkilekos popōwo irora ūtūmagkili iyi.

²Ravūgsieme paū, marima kos ōvun netnĭ eni Nōbū, ĭm ūtūmagkili lap memagkū kos kelanti sugkū mē. Kō koskemagkili ma nagkū anūatumpene iyi kos kelante sugkū iyi; popōwo koskelagesi iyi pe iyi.

³Im irora sū mori ūmūntevetūwi iyi ūmūsendomsi irora, sugkū iyi sentevives ĭndowi.

⁴Irora sū ūmnumpi sat ūmnareki nam alam: popōwo sat umnareki nam alam.

⁵Im kĭmi kūmagkili yemetūratumpeni worevaipelah satsū; ĭm tawi sai sat iran iyi.

⁶Irorasū mori ūmante ra iyi ūtūmnumpi sat: irorasū ūmnumpi sat dūtokesi iyi, ĭm ūtūkili iyi.

⁷Ravūgsaieme paū, ūfinte ma ūtūontorokūm nagkaū sai neteme: iyi mori umnumpi tanepo oti tanepo, sugkū iyi tanepo;

⁸iyi mori umnumpi ūr itnesog iyi isen sētan; popōwo setan yemumpi sat mafeli natipotnin. Im popōwo ugi imo yemetūratumpeni Netni eni Nōbū ma iyi ontavtiti ōvun numpūrak eni setan.

⁹Iyi mori umumprokomol ugi Nōbū otum numpi sat, popōwo novsin umante ūnisog iyi,

¹⁰tawi faneteme worumpi sat popōwo yemumprokomol ugi Nōbū. Umagkilora ōvun netni eni Nōbū, ĭm ōvun netni setan sugkū: iyi mori otū umpi aremai tawi iyi isen Nōbū, ĭm iyi sugkū mori otum nelintugi avinsai eni.

¹¹Popōwo imo oti nam mori koskem lorigi marugi natipotnin, ma aremai koskem afielentugkos;

¹²ĭm tawi sugkū Kēn mori yemne ra iyi, mori nareki sat, yemtalugi avinsai isen. Im irasie yemtalugi iyi? Popōwo ōvun numpūrak isen ūr, kō ōvun numpūrak eni avinsai aremai.

¹³Utūavlugi, ravūgsaieme, nagkū lō ra nemap wonakan pugkūm.

¹⁴Kōskemagkili ma koskemūwi nemas nemtorīmpe ra nomūrep, popōwo koskemielentokonda raveveneme. Iyi mori otum nelintugi avinsai umantindowi ra nemas.

¹⁵Iyi neteme talugi mori umnakan pugi avinsai isen; ĭm kĭmi kumagkili ma tawi nomūrcp ūvrūi ūnisog neteme talugi.

¹⁶Im koskemagkili nelintugi, popōwo iyi yemtenimpe nomurep isen nisekont: ĭm aremai koskelentenimpe nomurep enugkos nisekonda raveveneme.

¹⁷Iyi mori neteme nōēte, ĭm nagkū iyi otūtarugi ĭm nelantugi avinsai norumkora eni, tawi sai netinlugi eni Nōbū ūnisog iyi.

¹⁸Ah, ravūgsaieme, aremai nelintugi enugkos tawi nam wokon ra nugont; kō ugi numpūrak ĭm tanepo itnesog.

¹⁹Im popōwo ugi imo koskem agkilekos ma kos ōvun ĭtnesog, ĭm kos kelenumpūvsok nowant ūnipmi eni,

²⁰ra siame sū mori nōwant ūmanūwi memūrian irant ugi popōwo Nōbū oti mōmū horog ra nowant, miyi umagkili tiamesū.

²¹Ravūgsaime paū, nagkū nowant otūonūrian irant; ĭtnesog kos mōmū faneteme woratekisah pugi Nōbū;

²²ĭm tiamesū omwisū, koskelampai marugi iyi, popōwo koskemalekoleki ōvun selenivi nam isen, ĭm popōwo koskemlenumpi imo mori aremai ūnipmi eni.

²³Im imo oti selenivi nam eni, ma koskelentavnirigi ra nin eni Netni Iesū Krĭstō, ĭm nelĭntugkos, sugkū iyi yempasiwogkos.

²⁴Im iyi mori umalekoleki ōvun selenivi nam eni umantindowi ūnisog iyi, ĭm iyi ūnisog iyi. Im popōwo ugi imo koskemlagkili ma iyi umantindowi ūnisog kos, popōwo yemovugkos Naviat Tumpora.