Read Silacayoapan Mixtec San Juan 8 Bible Online

San Juan 8 - Silacayoapan Mixtec bible

San Juan 8

¹Ta ndaja coo na̱quee Jesús cua̱ha̱n chí yúcu̱ yitó olivo.

²Ta tá na̱ti̱vi inga qui̱ví ita̱a̱n já na̱ndicó co̱o tucu a veñu̱hu cáhnu cán. Ta tá na̱cayati ña̱yivi nu̱ á já na̱saco̱o a ta na̱casáhá jána̱ha̱ nu̱ ná.

³Ta ndaja coo na̱ jána̱ha̱ ley Moisés xi̱hín na̱ fariseo ñéhe na in ñáñáha̱ na̱sa̱a̱ na̱ nu̱ á. Mé ñáñáha̱ cán na̱nditahan na ña̱ mé hora cándúhu̱ ñá xi̱hín in da̱ta̱a, da̱ co̱ cúú yíi̱ ña̱. Ta já ñéhe na ñá na̱sacu ndichi na ña̱ nu̱ú na̱ ndúu cán.

⁴Já na̱cachi na já xi̱hín Jesús: —Cande̱hé ndo̱ Maestro. Na̱nditahan nde̱ ñáñáha̱ yóho cándúhu̱ ñá xi̱hín in da̱ta̱a, da̱ co̱ cúú yíi̱ ña̱.

⁵Ta nu̱ ley na̱jándacoo Moisés nu̱ú nde̱ táhnda̱ chuun ña̱ ná cuun nde̱ yu̱u̱ na̱ji̱hí cája já. Ta mé ndó ndía̱ cachi ndó —na̱cachi na.

⁶Na̱cachi na̱ cán já xi̱hín Jesús jáchi̱ cúni̱ na̱ coto ndojó cuití ñahá na̱ ta cúni̱ na̱ ñe̱he̱ íní na̱ jácojo na cua̱chi ja̱tá Jesús. Tá na̱ndihi já na̱saco̱o Jesús já na̱casáhá cáhyí a̱ nu̱ ñúhu̱ cán xi̱hín nducu ndáha̱ á.

⁷Ta sa̱há ña̱ ndúcú ndéé na̱ cán ndáca̱ tu̱hún ñahá na̱ na̱nda̱ca̱ ndichi Jesús já na̱cachi a já xi̱hi̱n ná: —Ndá ndó, na̱ co̱ó na̱caja cua̱chi jácana jihna ñúhú ndó yu̱ú ja̱ta̱ ña̱ —na̱cachi a xi̱hi̱n ná.

⁸Já na̱saco̱o tucu a cáhyí a̱ nu̱ ñúhu̱ cán xi̱hín nducu ndáha̱ á.

⁹Ta tá na̱xini jo̱ho tócó ndihi na̱ cán ña̱ na̱cachi Jesús já na̱casáhá na̱ cácahan nu̱u̱ ná ta tá in tá in na na̱casáhá quée na cua̱ha̱n na̱. Ta jihna ñúhú ga̱ na̱ yatá na̱casáhá quée cua̱ha̱n já ndíco̱ na̱ yúta̱ chága̱ cua̱ha̱n na̱. Ta tá sa̱ na̱quee ndihi na cua̱ha̱n na̱ já na̱cando̱o mé Jesús xi̱hi̱n ñá cán.

¹⁰A̱nda̱ já na̱nda̱ca̱ ndichi a ta na̱nda̱ca̱ tu̱hún a̱ ña̱ já na̱cachi a já xi̱hi̱n ñá: —Ndáchí cua̱ha̱n na̱ jácojo cua̱chi ja̱tu̱n. Á co̱ó ga̱ na̱ jácojo cua̱chi ja̱tu̱n viti —na̱cachi Jesús xi̱hi̱n ña̱.

¹¹A̱nda̱ já na̱cachi ñá cán já xi̱hín Jesús: —Mé a̱ nda̱a̱ co̱ó ga̱ na̱. A̱nda̱ já na̱cachi Jesús já: —Ta ni ye̱he̱ a̱ chíca̱a̱n i̱ cua̱chi ja̱tu̱n. Cuánúhu̱ vehún ta a̱ cája ga̱ún cua̱chi —na̱cachi a. Jesús cúú á tátu̱hun ñúhu̱ ña̱ jándiyéhe̱ ínima̱ ña̱yivi

¹²Já na̱casáhá tucu Jesús cáha̱n xi̱hín ña̱yivi já cáchí a̱ já xi̱hi̱n ná: —Ye̱he̱ cúú u̱ tátu̱hun ñúhu̱ ña̱ jándiyéhe̱ ínima̱ ña̱yivi ta ndá na̱ cándeé ini ye̱he̱ cúú á tátu̱hun a̱ cáca ga̱ na̱ nu̱ú naá. Jáchi̱ jándiyéhe̱ e̱ nu̱ ná ta cája i̱ ña̱ ná catacu na a̱nda̱ ama cáa qui̱vi̱.

¹³A̱nda̱ já na̱cachi na̱ fariseo já: —Sa̱ha̱ mé vún cáhu̱n ta xi̱hín ña̱ ja̱n náhún ña̱ cúnu̱n ndíñehe jícún mún. Ta xi̱hín ña̱ ja̱n náha̱ ña̱ co̱ cáhu̱n ña̱ nda̱a̱ —na̱cachi na.

¹⁴A̱nda̱ já na̱cachi Jesús já xi̱hi̱n ná: —Tócó ndihi ña̱ cáha̱n i̱ sa̱ha̱ mí i̱ cúú á ña̱ nda̱a̱ ta íin sa̱há va̱tí mí i̱ cáha̱n i̱ ña̱. Jáchi̱ xíni̱ va̱ha i̱ ndá na̱quixi i̱ ta xíni̱ va̱ha i̱ ndá cu̱hu̱n i̱. Joo ndóhó, co̱ xíni̱ toho ndó ndá na̱quixi i̱ ta co̱ xíni̱ toho ndó ndá cu̱hu̱n i̱.

¹⁵Mé ndó cátóó ndó cánde̱hé ndaa ndó ña̱yivi tá quia̱hva cája ña̱yivi ñuyíví. Joo ye̱he̱ co̱ cája toho i̱ já.

¹⁶Joo tá ná caja vií i̱ sa̱há ña̱yivi, caja i̱ ña̱ tá quia̱hva ndítahan caja i̱ jáchi̱ cája i̱ ña̱ nda̱a̱. Ta a̱ ju̱ú in túhún ye̱he̱ caja vií sa̱ha̱ ná jáchi̱ Ndióxi̱, tátá i̱, mé a̱ na̱chindahá ye̱he̱, mé á cán quéa̱ caja vií sa̱ha̱ ná xi̱hi̱n mí i̱.

¹⁷Nu̱ ley mé ndó cáchí a̱ ña̱ tá in nu̱ú cáha̱n i̱vi̱ ña̱yivi sa̱há ña̱ na̱ya̱ha já náha̱ ña̱ cúú á ña̱ nda̱a̱.

¹⁸Ta viti cuni jo̱ho ndó jáchi̱ quia̱hva já yáha ri xi̱hín ye̱he̱ va. Jáchi̱ ye̱he̱ cúú in testigo ta cáha̱n i̱ sa̱ha̱ mí i̱. Ta inga testigo cúú Ndióxi̱, tátá i̱, mé a̱ na̱chindahá ye̱he̱ —na̱cachi Jesús xi̱hi̱n ná.

¹⁹A̱nda̱ já na̱nda̱ca̱ tu̱hún na̱ Jesús já cáchí na̱ já xi̱hi̱n á: —Ndájá íin tátún ja̱n —na̱cachi na. A̱nda̱ já na̱cachi Jesús já: —Tá ná cuni ndó yo cúú ye̱he̱ já cuu canda̱a̱ ri ini ndó yo cúú tátá i̱. Joo co̱ xíni̱ ndo̱ yo cúú ye̱he̱ ta cáchí ga̱ ví tátá i̱ co̱ xíni̱ ndó a̱ —na̱cachi Jesús.

²⁰Tócó ndihi ña̱ yóho na̱cachi Jesús xi̱hi̱n ná nani jána̱ha̱ ini veñu̱hu cáhnu yati nu̱ú na̱sahi̱in sa̱to̱ ndée jiu̱hún jóco̱ na̱ cán. Joo ni in na̱ co̱ó na̱sa̱ha̱n ndeé ini tiin ñahá chica̱a̱n veca̱a jáchi̱ co̱ó na̱sa̱ha̱n Ndióxi̱ ña̱ma̱ni̱ sa̱há ña̱ cáma̱ní yi̱í ndindaa hora tiin na mé á. Cáha̱n Jesús xi̱hín ña̱yivi ña̱ a̱ cúu toho cu̱hu̱n na̱ nu̱ú cu̱hu̱n mé á

²¹A̱nda̱ já na̱casáhá tucu Jesús cáchí a̱ já xi̱hi̱n ná: —Va̱xi qui̱vi̱ quee ye̱he̱ cu̱hu̱n i̱. Ta caca nuu ndó ndinducú ndó ye̱he̱ joo a̱ ndíñehe ndó ye̱he̱ jáchi̱ cája tá cája ndó cua̱chi ja̱nda̱ quia̱hva xi̱nu̱ qui̱ví quivi ndó. Ta sa̱há ña̱ cán quéa̱ a̱ cúu cu̱hu̱n ndó nu̱ú cu̱hu̱n ye̱he̱ cán —na̱cachi Jesús.

²²A̱nda̱ já na̱casáhá na̱ Israel cán ndítúhún xi̱hi̱n táhan na já cáchí na̱ já: —Á cahní da̱ yóho mé dá cúni̱ da̱ ña̱ cán quéa̱ cáchí da̱ xi̱hi̱n yo̱ ña̱ a̱ cúu toho caja í co̱hó nu̱ú cu̱hu̱n da̱ —cáchí na̱.

²³Já na̱cachi tucu Jesús já: —Mé ndó cúú ndó ña̱yivi ndúu ñuyíví yóho joo ye̱he̱ cúú u̱ da̱ na̱quixi chí indiví. Mé ndó cúú ndó cuéntá ñuyíví yóho joo ye̱he̱ co̱ cúú toho i̱ cuéntá ñuyíví yóho.

²⁴Sa̱há ña̱ cán quéa̱ na̱cachi i̱ xi̱hi̱n ndó ña̱ caja ndó cua̱chi ja̱nda̱ quia̱hva xi̱nu̱ qui̱ví quivi ndó. Jáchi̱ tá co̱ cándúsa ndó ña̱ cúú ye̱he̱ da̱ cáchí i̱ cúú u̱, da̱ na̱chindahá Ndióxi̱, já quéa̱ quivi ndó sa̱há cua̱chi ndó —na̱cachi Jesús.

²⁵A̱nda̱ já na̱nda̱ca̱ tu̱hún na̱ cán Jesús já na̱cachi na já xi̱hi̱n á: —Ta ndá da̱ cúú yóhó, dá já —na̱cachi na. Já na̱cachi Jesús já: —Ja̱nda̱ sa̱há va na̱ca̱ha̱n i̱ xi̱hi̱n ndó yo cúú ye̱he̱.

²⁶Ta ña̱ xíni̱ jo̱ho i̱ cáha̱n mé á na̱chindahá ye̱he̱, ña̱ cán cúú ña̱ cáha̱n i̱ xi̱hín ña̱yivi ñuyíví. Ta ndinuhu ña̱ nda̱a̱ quéa̱ cáha̱n mé á. Ta mé a̱ nda̱a̱ íin cua̱há ndiva̱ha ña̱ núu cája ndó ta cuu tavá i̱ sa̱há nu̱ ndó tá ná caja vií i̱ sa̱ha̱ ndo̱ —na̱cachi Jesús.

²⁷Joo co̱ó na̱canda̱a̱ ini na ña̱ cáha̱n Jesús sa̱ha̱ Ndióxi̱, tátá a̱ tá na̱cachi a já xi̱hi̱n ná.

²⁸Sa̱há ña̱ cán quéa̱ na̱cachi tucu a já xi̱hi̱n ná: —Tá na̱ndihi ná cata caa ndó ye̱he̱, da̱ na̱chindahá Ndióxi̱ nduu ña̱yivi ndi̱ca crúxu̱ já quéa̱ canda̱a̱ ndusa ini ndó ña̱ ye̱he̱ cúú u̱ da̱ cáchí i̱ cúú u̱. Ta ni in túhún ña̱ha co̱ cája i̱ cuéntá mí i̱. Ta ña̱ jána̱ha̱ i̱ nu̱ ndo̱ cúú ña̱ na̱jána̱ha̱ Ndióxi̱, tátá i̱ nu̱ú i̱.

²⁹Ta mé á na̱chindahá ye̱he̱ co̱ na̱jándacoo ndáha̱ toho a̱ ye̱he̱ jáchi̱ íin tuun Ndióxi̱, tátá i̱ xi̱hín i̱. Ta níí tiempo ña̱ cája i̱ cúú ña̱ cáji̱i̱ ini Ndióxi̱ xi̱hi̱n —na̱cachi Jesús.

³⁰Ta chí cua̱há ña̱yivi na̱candúsa na Jesús tá na̱xini jo̱ho na tócó ndihi ña̱ yóho. Na̱ ndúu ndáha̱ rí quini xi̱hín na̱ ndúu ndáha̱ Ndióxi̱

³¹A̱nda̱ já na̱ca̱ha̱n Jesús xi̱hín java na̱ Israel, na̱ sa̱ na̱candúsa ñahá cán já na̱cachi a já xi̱hi̱n ná: —Tá ná caja ndó tá íin na̱ca̱ha̱n i̱ xi̱hi̱n ndo̱ já na̱ha̱ ndó ña̱ mé a̱ nda̱a̱ táhyí cúú ndó na̱ cuéntá mí i̱.

³²Ta já canda̱a̱ ini ndó ña̱ nda̱a̱ ta ña̱ cán caja ña̱ ná a̱ cácuu ga̱ ndó tátu̱hun in mozo, da̱ ndúu ndáha̱ rí quini —na̱cachi Jesús.

³³A̱nda̱ já na̱cachi na̱ cán já xi̱hi̱n á: —Na̱ na̱quixi chi̱chi Abraham cúú nde̱. Ta ja̱nda̱ ni in túhún tañu co̱ó na̱sa̱cuu nde̱ mozo. Joo yóhó cáchún xi̱hín nde̱ ña̱ a̱ cácuu ga̱ nde̱ mozo. Ndaja cáa ña̱ cáa ri a já —na̱cachi na.

³⁴Já na̱cachi Jesús já xi̱hi̱n ná: —Mé a̱ nda̱a̱ ná ca̱ha̱n i̱ xi̱hi̱n ndo̱. Tócó ndihi na̱ sá caja cua̱chi cúú tá cúú na̱ tátu̱hun mozo nu̱ú cua̱chi jáchi̱ cómí a̱ cuéntá sa̱ha̱ ná.

³⁵Ta da̱ cúú mozo nu̱ú in xitoho, co̱ó sa̱ha̱ dá coo nahá da̱ xi̱hín xitoho da jáchi̱ va̱xi qui̱vi̱ ndítahan quee da cu̱hu̱n da̱. Joo da̱ cúú ja̱hyi mé da̱ cúú xitoho cán íin sa̱ha̱ dá coo nahá da̱ xi̱hi̱n tátá da̱ jáchi̱ cúú dá da̱ vehe tátá da̱.

³⁶Ta quia̱hva já íin xi̱hín ye̱he̱, da̱ cúú ja̱hyi Ndióxi̱. Cája i̱ ña̱ ná a̱ cácomí ga̱ cua̱chi cuéntá sa̱ha̱ ndo̱ ta já a̱ cácuu ga̱ ndó tátu̱hun mozo nu̱ú cua̱chi cája ndó.

³⁷Ta sa̱ cánda̱a̱ va̱ha ini i̱ ña̱ cúú ndó ña̱yivi na̱quixi chi̱chi Abraham. Joo mé ndó cúni̱ ndó cahní ndó ye̱he̱ jáchi̱ co̱ cúni̱ ndó ndiquehe va̱ha ndó tu̱hun cáha̱n i̱.

³⁸Cáha̱n i̱ sa̱ha̱ tócó ndihi ña̱ na̱na̱ha̱ Ndióxi̱, tátá i̱ nu̱ú i̱. Joo ndóhó cája ndó ña̱ cáha̱n tátá ndo̱ xi̱hi̱n ndó —na̱cachi Jesús.

³⁹A̱nda̱ já na̱cachi na̱ cán já xi̱hi̱n á: —Abraham cúú tátá nde̱ jáchi̱ chi̱chi da̱ cán na̱quixi nde̱ —na̱cachi na. Já na̱cachi Jesús já xi̱hi̱n ná: —Tá jivi ndusa cúú ndó na̱ na̱quixi chi̱chi Abraham já quéa̱ caja ndó tá quia̱hva na̱caja da̱ cán, nduu.

⁴⁰Joo ndúcú ndó cahní ndó ye̱he̱ jáchi̱ cáha̱n i̱ ña̱ nda̱a̱ xi̱hi̱n ndo̱ tá cáchí i̱ ña̱ na̱jána̱ha̱ Ndióxi̱ nu̱ú i̱. Mé Abraham co̱ó na̱caja toho da já.

⁴¹Joo cája ndó ña̱ núu tá quia̱hva cája tátá ndo̱ —na̱cachi Jesús. Já na̱cachi na̱ cán já xi̱hi̱n á: —A̱ ju̱ú ja̱hyi ndáhví toho ña̱yivi cúú nde̱he̱. Ndióxi̱ cúú ndusa tátá nde̱ —na̱cachi na.

⁴²Já na̱cachi Jesús já: —Tá Ndióxi̱ ndusa ná cacuu tátá ndo̱ ta qui̱hvi̱ ini va ndó ye̱he̱, nduu. Jáchi̱ Ndióxi̱ na̱chindahá ye̱he̱ va̱xi i̱ ta íin i̱ yóho viti. Co̱ó va̱xi toho i̱ cuéntá mí i̱. Ndióxi̱ quéa̱ na̱chindahá ye̱he̱ va̱xi i̱.

⁴³Joo co̱ cánda̱a̱ ini ndó tócó ndihi ña̱ ndícani i̱ nu̱ ndo̱ ta cúú á sa̱há ña̱ co̱ cúni̱ ndó cuni jo̱ho ndó nu̱ cáha̱n i̱ xi̱hi̱n ndo̱.

⁴⁴Tátá ndo̱ cúú tiñáhá sa̱cua̱ha̱ ta cája ndó ña̱ cúni̱ rí cán jáchi̱ ñúhu ndó ndáha̱ ri̱. Ta rí sáhní ndi̱i cúú rí cán ja̱nda̱ mé sa̱ha̱. Ta ni in túhún tañu co̱ó na̱tiin rí ña̱ nda̱a̱ já ca̱ha̱n rí ña̱. Jáchi̱ cáha̱n rí ña̱ tu̱hún cuití va ta cuéntá mé rí quíxi ndihi ña̱ tu̱hún.

⁴⁵Cande̱hé ndo̱. Co̱ cúni̱ ndó candúsa ndó ye̱he̱ jáchi̱ cáha̱n i̱ ña̱ nda̱a̱ xi̱hi̱n ndó.

⁴⁶Ni in túhún toho ndó a̱ cúu na̱ha̱ nu̱ú ña̱yivi ña̱ íin cua̱chi i̱. Ta tá cáha̱n i̱ ña̱ nda̱a̱ cuití va xi̱hi̱n ndó ndá cuéntá quéa̱ co̱ cándúsa ndó ye̱he̱, dá já.

⁴⁷Jáchi̱ ndá na̱ cúú ndusa cuéntá Ndióxi̱ táa jo̱ho na ña̱ cúú tu̱hun Ndióxi̱. Joo náha̱ cáxí a̱ ña̱ co̱ cúú ndó cuéntá Ndióxi̱ jáchi̱ co̱ cúni̱ ndó cuni jo̱ho ndó nu̱ cáha̱n mé á xi̱hi̱n ndo̱ —na̱cachi Jesús. Ja̱nda̱ tá cáma̱ní cacu Abraham sa̱ íin va Jesús

⁴⁸A̱nda̱ já na̱cana̱há na̱ Israel xi̱hín Jesús já na̱cachi na já: —Mé a̱ nda̱a̱ cúún in da̱ Samaria ta ndáca̱a̱n rí quini inún —na̱cachi na.

⁴⁹A̱nda̱ já na̱cachi Jesús já xi̱hi̱n ná: —Co̱ó toho rí quini ndáca̱a̱n ínima̱ ye̱he̱. Ña̱ cája i̱ quéa̱ cája cáhnu i̱ Ndióxi̱, tátá i̱. Joo quéhe núu ndiva̱ha ndó ye̱he̱.

⁵⁰Co̱ cúni̱ toho i̱ ña̱ ná caja cáhnu ndó ye̱he̱ va̱tí mé a̱ nda̱a̱ cúni̱ Ndióxi̱ ña̱ ná caja cáhnu ndó ye̱he̱. Ta mé a̱ cán quéa̱ caja vií sa̱ha̱ ndo̱.

⁵¹Mé a̱ nda̱a̱ ná ca̱ha̱n i̱ xi̱hi̱n ndó. Ndá na̱ ná caja ña̱ cáha̱n i̱ yóho, na̱ cán catacu na a̱nda̱ ama cáa qui̱vi̱ —na̱cachi Jesús.

⁵²Já na̱nducú ñehe na̱ cán tu̱hun nu̱ á já na̱cachi na já xi̱hi̱n á: —Viti ndusa cánda̱a̱ ini nde̱ ña̱ ndáca̱a̱n rí quini inún jáchi̱ cáchún ña̱ tá ná caja nde̱ ña̱ cáhu̱n já quéa̱ catacu nde̱ a̱nda̱ ama cáa qui̱vi̱. Joo xíni̱ va̱ha nde̱ ña̱ na̱xi̱hi̱ tá na̱xi̱hi̱ Abraham, tásáhnu jícó nde̱ ta jári na̱ profeta na̱sanduu sa̱nahá na̱xi̱hi̱ na̱.

⁵³Á cáhnu chága̱ yóhó a̱ ju̱ú ga̱ Abraham, da̱ na̱sacuu tásáhnu jícó nde̱, dá já. Mé Abraham na̱xi̱hi̱ da̱ ta jári mé na̱ profeta na̱xi̱hi̱ ri na̱ cán va. Á cájún cuéntá ña̱ cúún da̱ cáhnu chága̱ a̱ ju̱ú ga̱ na̱ cán, dá já —na̱cachi na xi̱hín Jesús.

⁵⁴Já na̱cachi Jesús já xi̱hi̱n ná: —Tá ná caja cáhnu i̱ mí i̱, co̱ó sa̱ha̱ toho ña̱ cája i̱. Joo Ndióxi̱, tátá i̱ jándicáhnu a ye̱he̱. Ta jári mé ndó cáchí ndo̱ ña̱ jivi mé a̱ cán cúú Ndióxi̱ cája cáhnu ndó.

⁵⁵Joo co̱ xíni̱ toho ndó yo cúú mé á. Ye̱he̱ xíni̱ yo cúú mé á. Tá ná cachi i̱ ña̱ co̱ xíni̱ toho i̱ mé á, cúú u̱ in da̱ tu̱hún tátu̱hun mé ndó. Joo mé a̱ nda̱a̱ xíni̱ va̱ha i̱ yo cúú Ndióxi̱ ta cája i̱ ña̱ cáchí mé á.

⁵⁶Ta mé Abraham, da̱ na̱sa̱cuu tásáhnu jícó ndo̱ na̱caji̱i̱ íní da̱ jáchi̱ na̱ñe̱he̱ dá tu̱hun ña̱ quixi ye̱he̱ ñuyíví yóho. Ta a̱ ju̱ú quia̱hva na̱caji̱i̱ ini da tá na̱xini da ña̱ yóho —na̱cachi Jesús.

⁵⁷A̱nda̱ já cána̱há chága̱ na̱ Israel xi̱hi̱n á já na̱cachi na já xi̱hi̱n á: —Ni i̱vi̱ jícó u̱xu̱ cui̱a̱ co̱ ndáca̱a̱n yóhó viti. Ta ndaja cúú cáchún na̱xinún Abraham, da̱ cúú tásáhnu jícó nde̱ —na̱cachi na.

⁵⁸Já na̱nducú ñehe Jesús tu̱hun nu̱ ná já na̱cachi a já xi̱hi̱n ná: —Mé a̱ nda̱a̱ ná ca̱ha̱n i̱ xi̱hi̱n ndo̱. Ja̱nda̱ tá cáma̱ní cacu Abraham sa̱ íin va ye̱he̱ jáchi̱ cúú u̱ Ndióxi̱ —na̱cachi Jesús.

⁵⁹A̱nda̱ já na̱tiin na̱ Israel cán yu̱u̱ ña̱ janí na̱ ja̱tá. Joo na̱ndaco̱o je̱hé Jesús já na̱ya̱ha tañu na̱ cán ta na̱quee a veñu̱hu cáhnu cán cua̱ha̱n.