Read Silimo Matius 10 Bible Online

Matius 10 - Silimo bible

Matius 10

¹Agauwa mesik erlige re, at Yesus en osi iak wogu legesa aʼge enebe 12 ebano odoktumagoluk worlentasuam wegesema re, is en aphwami logon muʼgat enebabut wiak aʼge onogola ʼgwigisarik oruakma henokho lebikpogulat, di ou yu ou enebam oruak aʼge obabonobogulat, enanni erlak maben aʼge holuk enanniabonobogulat, til louwagoluk, anni wogentesi.

²Ap enebe 12 eriano, ononuk e, yu: naduk e, Simon onuk mesik Petrus ogu legesa aʼge ano ot Andreas eʼbirek emin, Zebedeus omlogo Yakobus ano ot Yohanes eʼbirek emin,

³Filipus Bartolomeus eʼbirek emin, Tomas Matius pemerintah paget uang ʼgonu oluk wasu laga aʼge ano eʼbirek emin, Alfeus omlogo Yakub Tadeus eʼbirek emin,

⁴Simon, “O Kanaan yema nonowirak aʼge nak wolomok o,” oluk ese laga aʼge ano emin, Yudas Iskariot Yesus woruagoluk pobuk yoʼgo laga aʼge ano emin, is ononuk eriayat o.

⁵At Yesus en is osi enebe 12 en soʼbusogo peragenebaigoluk, enesaʼgo disogo weregei, “Is aphwami oʼborlma aʼge onowi pam e, lagup o. Ye, is aphwami o Samaria aʼge onowi pam laguptik e, ʼgwi lagup no yo.

⁶We, is aphwami Israel aʼge wam domba wam ebela nal lagai ʼgelaʼge ebela nal egesarik oruak aʼge ano eneʼbek ʼgwelagentil entil lu o.

⁷Lagalat e, disogo moʼgulentil lu, Nenaik Allah ʼbogorl pam aʼge en eragam nonobouwa ano re, yogodak arat nonobouwa o, oluk, moʼgulentil lu o.

⁸Is aphwami ou enebam oruak holuk obabonobogulat, waragai holuk enelalugabonobogulat, hwenaʼgo ʼgelaʼge onogorlok aʼge ebano enebam oruak holuk obabonobogulat, muʼgat ebabut wiak aʼge onogola ʼgwigisarik oruak holuk henokho lebikpogulat, til noʼgu lomup o. An en oʼgo erlak wokhentegis ai ʼgelaʼge re, his asogoat oʼgo erlak wogentil laga lomup o.

⁹Aphwami yabuk urontogwiam, onsoʼboru wogontogwi ai ʼgelaʼge, his en tagenebil lagaihwe re, is en wokhonto ʼgalatma re, uang lok aʼge emas emin, perak emin, wei aʼge tembaga emin, henauwak oʼgwe yagasogo woluk lagup o. Ye, sum soʼboru yagathorlo aʼge emin, honosum ʼbukhorlo aʼge ʼbiren emin, honoyuk olukhweʼgwe ʼbuktu aʼge emin, ʼbouwaʼgun emin, woluk lo erlakma en e, we, henebe nagat lu o.

¹⁰

¹¹His en o seli wei oʼgwe, lok oʼgwe, ʼgwi lagup ʼgal e, ap sa en hau wusogo henebe wokhonobogwi holuk, ebabut ʼbalholuk, at ap ano emin woloroguptik e, o momu louwogoluk holuk e, liplau woroguptik lu o.

¹²Ye, is logon onowi pam ʼgogup ʼgal e, is ap onowirak aʼge ebano hau warenebip o.

¹³Ye, is aphwami ebano enebabut op en wokhonobogwi holuk e, hau heniak lebeksogo waronobogup ano pam, Allah en ogo hau lebeksogoat waronobua o. Asogo aʼgeat de, enebabut wiak holuk e, hau waronobogup aʼge ano heniak uak wokho horlomup o.

¹⁴Ye, is eba en henebe wokhonobogwi erlak welat en de, heniak hologwi erlak ukhonobogwi holuk e, o eba ukpoluk togolik liplau wagalat, honoyuk ollong aʼge hosogo ʼbelakpoluk liplau manup o.

¹⁵Yogodak e, an niak demat moʼgulhentaik o. Pobuk nenaik Allah ʼbogorl pam aʼge en wene enebam pasulat, noʼgorliselat, tua ai erlige re, is aphwami o Sodom Gomora aʼge eba re, wene enebam poluk wiagabonobua aʼgeat de, se ʼgelaʼgeat o. Aʼgeat de, is aphwami o seli his wokhonobu erlakma en, ukhonobouwa aʼge ai nak e, wene eʼgin aʼge enebam poluk modok wiagabonobua o,” oluk moʼgulentesi.

¹⁶Asogo moʼgulentesirik e, mesik disogo moʼgulentesi, “An en, his yu re, henebabut wam domba wam ebabut aʼge ʼgelaʼge, is aphwami enebabut mene orlomene ebabut wiak aʼge ʼgelaʼge eneʼgerlak hialogo perakhenebaikmu ai re, henebabut ʼgosu ebabut hi-hebeksogo tago ai ʼgelaʼge tugulat, sue ʼberl ebabut op aʼge enago welago ai ʼgelaʼge welat, togu lomup o.

¹⁷Aphwami en is ap wene edip ʼbeloʼgogumu eneʼbek wokhonoboluk lagalat, o seʼban ogumu ebano en ʼgoʼbu wathonobogulat, tua ano re, henebabut heberlogo wolomup o.

¹⁸Asogo takhonobouwa ai, edip an nebe nebagerat, ap ononuk logo aʼge emin, ʼgain aʼge emin, eneʼbek wokhonoboluk lagaiam e, his en is ap ai enil an tagokhwe henil niogu legep aʼge ano ʼbaksogo is moʼgulontogulat, aphwami oʼborlma aʼge moʼgulontogulat, moʼgulontouwagoluk panoasuak henemdema wouwa ani o.

¹⁹Asogo henemdema wouwagoluk wokhonoboluk lagai holuk e, his en oʼgo moʼgulentagup aʼge ai erlige, at Allah enat honogola ʼgagalua. Holuk e, oʼgo ʼgesogo moʼgulontul oluk henede perogup o.

²⁰Wene oʼgo moʼgulentagup ai re, his honogola en ʼgagalogo ogup puk. We, henaik Allah Arogun honogola welat, Disogo ip o, oluk moʼgulhentasukhweat ogup ani o.

²¹Are mesik en e, at uʼgwarek are mesik woruagoluk woluk lasulat, aik en e, omlogo woruagoluk woluk lasulat, eneiyagai en e, enialak enaiklak enebirabonoboluk, waronobuagoluk onobok ʼbalugulat, tua ani o.

²²Ye, aphwami ʼberlegat en an nonuk oluk, His e, at osi o, oluk e, enebit modogat hontouwa ani o. Aʼgeat de, sa en epe mosogo welema holuk e, o ologun pam Allah en agap delua o.

²³O seli agaikhen en wiagaphonobuogoluk togwi holuk, hweiye o seli momu lu o. Is aphwami Israel aʼge onowi seli ado pema owan wene moʼgulonto erlak oruakhwe, an abat daklau wegi ano pobuk weik o, oluk, niak demat moʼgulhentegis o.

²⁴Is gurulak wene moʼgulontogwi aʼge sebelak ʼgelaʼge oruakhweat de, is eneiyagai moʼgulontogwi aʼge ai adia ʼgelaʼge logo welagai modok erlak o. Ai ʼgelaʼge re, is ap ʼgain sebelak ʼgelaʼge oruakhwe, eneragam aʼge ai re, adia ʼgelaʼge logo welagai modok erlak o.

²⁵Aʼgeat de, is malik ai enaiklak guru ebano enemin hegit agalat, ye, is eneragam aʼge ai enaiklak ebano enemin hegit agalat, tumu re, elirat o. Is aphwami onue o eiye aʼge ai wiak oluk onuk Beelzebul ogwi holuk, is at osi enemin mesikmu aʼge ai, asogoat ononuk wiak logat ogu lema o,” oluk moʼgulentesi.

²⁶Asogo moʼgulentesirik e, mesik disogo moʼgulentesi, “Pobuk Allah en, di aʼge yu aʼge sebelak aʼge ai enemak pasulat, hisogo aʼge ai ʼbageselat, asogo tua ai en e, his en, is aphwami aʼge ai re, honogorloksogo wolorogup o.

²⁷Ye, an en his o hiktakma moʼgulhentegis aʼge, his en o dakharakma ogu lomup. Ye, henesaʼgo loʼgwe niak ngorluksogo moʼgulhentegis aʼge ai, his en o dum pam ligoroguptik heniak ʼbaksogo moʼgulontogu lomup o.

²⁸Aphwami en henarogun wathonobu re, mia. We, henagap oʼborl petne nagat wathonobua ai paget e, honogorloksogo wolorogup o. Aʼgeat de, at Allah nak e, henarogun emin, henagap oʼborl petne emin, modok elirat wusogo odouk orloukmu perakhonobo ebelerak ai en e, at Allah at honogorloksogo wolomup o.

²⁹Sue wulue ai oʼgo re, meren ʼbalogwi no. Ebe ʼbiren aʼge re, oʼgo uang sen modok wei aʼge mesigat pam wogwi ani o. Asogo aʼgeat de, henaik Allah ʼbogorl pam aʼge en, Sue ai dung ʼbi louwak o, oluk owan u erlak oruakhwe, mesik ʼgwiangma dung ʼbi lasu erlak o.

³⁰His e, henasu henaʼgul pam ʼberlegat Allah en eʼgik modok wonogo welago yo.

³¹Allah en sue wulue ai ebe aʼbigat aʼgeat de, logo ʼgelaʼge epasu puk o. Ye, his henebe ai nak e, logo ʼgelaʼge epasu o. Ai en e, honogorlok erlaksogoat welemis o,” oluk moʼgulentesi.

³²Asogo moʼgulentesirik, mesik disogo moʼgulentesi, “Sa en, Yesus ai an nue o, oluk aphwami enilem iak ʼbaksogo oso holuk e, an ogo re, At ai an norat o, oluk naik ʼbogorl pam aʼge ilem, niak ʼbaksogo igat o.

³³Asogo aʼgeat de, sa en, Yesus ai an neperlak o, oluk aphwami enilem elabe tago holuk e, an ogo re, At ap ai an neperlak o, oluk naik ʼbogorl pam aʼge ilem ʼbaksogoat ik o,” oluk moʼgulentesi.

³⁴Asogo moʼgulentesirik e, mesik disogo moʼgulentesi, “His honogola en e, At waga ai re, ʼgwiangma yema weim lialigoluk waga oluk epagup o. An wegi ai re, aik omlogo eʼbirek il ʼbalogulat, ia emalik eʼbirek il ʼbalogulat, iemalhwe iemalhwe eʼbirek il ʼbalogulat, is-is enemin il ʼbalil louwagoluk wegi o.

³⁵

³⁶Aphwami enemin il ʼbelak wolom ʼgelaʼge re, onowi mesikmu aʼgeat enemin hwerli tua o. [19]

³⁷Ye, an e, henebit ʼgelaʼge taknobogulat e, henaiklak henialak henedesogo welegep holuk e, an nosi om erlak o. Ye, an henebit ʼgelaʼge welat heneiyagai emin, honogulani emin, henede welegep holuk e, an nosi om erlagat o.

³⁸E pam edikpoluk waronobogwi aʼge ano, henagan domok henemarlo pam woluk an neʼberlik woluk wagai erlak holuk, an nosi om erlagat o.

³⁹Ap sa en uʼgwarek ebe erlele hwerlasu holuk e, ebe warotluk nal ema o. Aʼgeat de, ap sa en an nebaget warema holuk e, ebe erlele horlouwa o,” oluk moʼgulentesi.

⁴⁰Asogo moʼgulentesirik e, mesik disogo moʼgulentesi, “Ap sa en henebe wokhonobua holuk e, an nebeat woknobua o. Ye, an nebe woknobua ai re, an naik peraknobou waga aʼge ano ebeat wouwa o.

⁴¹Ye, ap sa en, Ap yu Allah iak moʼgulentasu aʼge, oluk ebe wouwa holuk e, is ap Allah iak moʼgulontogwi aʼge oʼgo horlogwi hegitsogoat horlouwa o. Ye, Ap yu hegitsogo tago aʼge, oluk ebe wouwa holuk e, is hegitsogo togwi aʼge oʼgo horlogwi ʼgelaʼgeat, horlouwayat o.

⁴²Ye, sa en, Malik wei aʼge yema Yesus iak wogwi aʼge, oluk ik horl aʼge mesik naʼgogo wogema holuk e, Allah en oʼgo wogontouwa aʼge ano, horlo erlakma en, nal ema erlak o. Wogontouema re, horlouwayat o, oluk demat moʼgulhentegis o,” oluk moʼgulentesi.