Read Silimo Matius 11 Bible Online

Matius 11 - Silimo bible

Matius 11

¹Is ap Yesus iak wogu legesa aʼge enebe 12 ebano enesaʼgo asogo wusogo onoboluk e, aphwami onowi seli loʼbok horogat aʼge wene op wene ano moʼgulontogulat, enesaʼgo worugulat, tiogoluk e, o eba enat laga.

²At Yohanes ik olomu ʼbelabenebise laga aʼge ano eʼgik herle werak oruakma, aphwami en e, “Kristus asogo tiso,” oluk ogukhwe esaʼgo hwelegeitik e, at osi iak wogu legesa aʼge Yesus ebam hin wouwagoluk peragonobou waga.

³Peragonobou wagama wegesarik e, “Ap agaikhen wema oluk ogu legesa ano re, harat a? Ye, at e, mu aʼge on yetharok wolomul a?” oluk moʼgulegisema,

⁴at Yesus en e, disogo moʼgulentesi, “His e, an disogo yusogo tisokhwe henil niogulat, wene osokhwe henesaʼgo holugulat, tigep aʼge ai, at Yohanes dokhumsogo moʼgulesi lit o.

⁵Enil hopnik aʼge dek otluk op agalat, enawe edenak aʼge op otluk ebela lagalat enebam hwenaʼgo ʼgelaʼge onogorlok aʼge oruakma obabenebisoam op agalat, enesaʼgo lerak aʼge enesaʼgo husogo holugulat, werak aʼge enelalugabenebiselat, is pema enaʼge erlak aʼge op wene moʼgulontogulat, tisokhwe henil niegep ano dokhumsogo moʼgulesi lit o.

⁶Moʼgulotluk e, ap sa en an tago aʼge ano ebirapsogo uknebasu erlak welema holuk e, ogola agai hasu lema o, oluk moʼgulesi lu o,” oluk peragenebesi.

⁷Asogo peragenebesimu, is Yohanes osi ebano legesema re, at Yesus en aphwami aʼbik ebano Yohanes obok disogo moʼgulentesi, “His e, o leimu aphwami erlakma eba noʼgwe on henil houwogoluk laga legep no. ʼBide eʼgela ʼbare eʼgela yasobu en pusogo lak-wak tisoma dim tuogoluk laga legep a?

⁸Ye, at e, noʼgwe houwogoluk legeptik. Ap mesik osum op aʼge ʼbuktakma houwogoluk legeptik a? Yethemit! Onosum op aʼge ʼbukhorlogwi ai re, ʼgaindek ononuk logo aʼge onowi pam welat holugat bukhorlogwi o.

⁹Holuk e, noʼgwe houwogoluk legeptik. Ye, at e, ap Allah iak moʼgulentasu aʼge mesik oruakma henil houwogoluk legeptik a? Demat, aiat o. An en moʼgulhentaik. Is ap Allah iak moʼgulontogu legesa aʼge logon welegesa aʼgeat de, is ai re, mia ʼgelaʼge. At Yohanes ai nak e, onuk oruak aʼge logoat o.

¹⁰At Allah en e, disogo egei, Nomlogo yo. Hat pobuk ebela lagun oʼgwe, heʼgebela yakhese lemagoluk, ap mesik yoʼgo poluk naduk perakpaik ani o, [20] oluk egeimu pelal wokho pegesa ai ebe re, at Yohanes pagerat egei o.

¹¹Holuk e, an niak demat moʼgulhetaik o. Aphwami ʼberlegat enialak en dagenebil wegesa aʼgeat de, ononuk e, erlak nak o. Aʼgeat de, at Yohanes ik olomu ʼbelabenebiso aʼge ai nak e, onuk oruak o. Asogo aʼgeat de, at Allah eragam enebasumu eba, at Yohanes ano onuk erlak ʼgelaʼge aʼgeat de, is aphwami logon ononuk erlak aʼge ai, ononuk oruak ʼgelaʼgeat o.

¹²At Yohanes ik olomu ʼbelabenebise laga ai hwerli en e, yogodak ya pam e, is enebabut wiak asial polongnutak aʼge en, nenaik Allah eragam enebasumu ebano enebit en mabenap pouwogoluk enannisogo walhogwi.

¹³At Yohanes ebe owan wom erlak oruakhwe, wene Allah en nenesaʼgo weregei wene ano pam emin, is Allah iak moʼgulontogu legesa aʼge ano pam emin, pobuk ema ano aʼge ʼbaksogo moʼgulontogu legesa ano

¹⁴henedemu pobisogo wagup holuk e, ap Elia ebe wema, oluk obok egesa ano re, ebe Yohanes at waga ai o.

¹⁵Henesaʼgo oruak holuk e, opsogoat hwelit o.

¹⁶Aphwami o yogodak oruak ya re, no pam elit haik. Yu pam elitsogo ik o. Is ai re, malik pasar oʼgo wogumu eba hweriogo welat, enarilak enemin wene pei lou wom ogulat e,

¹⁷Nis weni wathontouwogoluk edip lebige aʼgeat de, his en pangtak lagai erlak. Ye, loʼgu maruogoluk, loʼgu edip lebige ʼgal e, his en loʼgu marogwi erlak, oluk ogwi ano ʼgelaʼgeat togwi o.

¹⁸At Yohanes ano soʼboru emin, anggur eʼgen aʼbosu emin, no erlak ukpoluk welaga ano paget, is aphwami en e, At ai muʼgat ebabut wiak aʼge ogola ʼgwegeirik oruak o, oluk ogwi o.

¹⁹Aʼgeat de, an abat daklau wegi ano nak e, soʼboru emin, anggur eʼgen aʼbosu emin, nil wegerikmu re, aphwami en nobok ogulat, Soʼboru emin, anggur eʼgen aʼbosu emin, emde lagorak nasulat e, ap pemerintah paget uang ʼgonu oluk wogwi aʼge emin, ap wiak til noʼgwi aʼge emin, enemin hwediktak poluk denagai yu hemit! oluk ogwi ai re, Allah ede modok ʼgagalak tago ai en, op agoam enil holuk, Hegit o, oluk e, pobi tua o,” oluk moʼgulentesi.

²⁰Asogo moʼgulentesirik e, aphwami o seli loʼbok at en elalin tu puk aʼge tagoam enil hogu legesa aʼgeat de, enede eberak erlak welat, di wiak yu wiak togu legesa aʼge ukpo erlakma en welegesa aʼge ebano wene yagentasulat e, disogo moʼgulentesi,

²¹“His aphwami o Korazim aʼge emin, o Betsaida aʼge emin, eige. Nede e. Aphwami en elalin tu puk aʼge an his henemin welat taga legi ano, o Tirus Sidon eba tagallema re, is aphwami o eba aʼge enebabut heberlotluk e, ʼbelagwi poluk togwi ʼgelaʼge onosum wiak aʼge ʼbuktugulat, ul ʼgwiang enaʼgul pam pogulat, tugulat e, wiak togu legesa aʼge ai ukpoluk, enebabut pageat heberlelep aʼgeat de, his e, asogo tu henebit ai en e, wiagaphonobua ai o!

²²Aʼgeat de, an niak demat moʼgulhentaik. Pobuk o ologun pam Allah en wene henebam pasulat, noʼgorliselat, tua ai erlige re, is aphwami o Tirus Sidon eba wene enebam poluk selangsogo ʼgelaʼge waronobua aʼgeat de, his nak e, modok eʼginsogo ʼgelaʼge wathonobua o, oluk moʼgulhentegis o.

²³Ye, his aphwami o Kapernaum aʼge yu honogola en e, Allah en ʼbogorl pam legeik nonobouwarik logo nonobouwa o, oluk honuʼgwarek en erlikhorlogu legep a? Modok erlak o. We, aphwami warotluk lagaimu eba modok ʼbelakhonobua o. Is aphwami en elalin tu puk aʼge an en his henemin welat taga legi ano, o Sodom eba tagallema re, is eba enebe erlak agai erlak yogodak ya ogo modok hwedigat wellep o.

²⁴Pobuk Allah en wene enebam pasulat, noʼgorliselat tu ai erlige re, is aphwami o Sodom welegesa aʼge wene enebam poluk selangsogo ʼgelaʼge waronobua aʼgeat de, his nak e, modok eʼginsogo ʼgelaʼgeat, wathonobua o, oluk moʼgulhentegis o,” oluk moʼgulentesi.

²⁵Asogo moʼgulentesirik e, o ai erlige, at Yesus en Allah ebe moʼguleselat e, “Naik Allah o! ʼBogorl ʼgwiang eiye harat o! Wene ʼberlegat ai re, is aphwami enede ʼgagalak aʼge emin, di wene yu wene enaluk aʼge emin, enaluk agomano oluk hisogo poluk e, is enebabut malik ʼget dogo aʼge ʼgelaʼge nak e, ʼbaksogo moʼgulentigen ai re, hogola hagai epegentik en moʼgulentigen ai paget, hau wathebise legi o, naik,” oluk moʼgulesi.

²⁷Asogo moʼgulesirik, is aphwami ebano disogo moʼgulentesi, “An naik en di aʼge yu aʼge ʼberlegat eiye welemagoluk woknesi o. Ye, an Allah omlogo yu, aphwami ʼberlegat modok eneperlak aʼgeat de, naik Allah ematek nagat, aluk oruak o. Ai ʼgelaʼge re, an naik Allah ai, aphwami ʼberlegat modok eneperlak aʼgeat de, an omlogo nematek nak e, naluk welegi o. Ye, Allah omlogo an enat nogola opoluk en naik ebe aphwami pema enaluk emagoluk ʼbaksogo moʼgulentasu aʼge aiat enaluk agai o.

²⁸His henebam eʼgin-peʼginsogo set aʼbik togu legep aʼge ai, an en set henebam aʼge noʼgorlogo paikmu set hwalogup en, neʼbek manis o.

²⁹An nosum aʼge yagarak sum ebagal sakhorakma re, opsogo yagasogo wokhentaikmu serak hagup ai en e, henemarlo pam wik-wok, an nebabut enago welat eneragam ʼgelaʼge welago ano opsogo moʼgulhwerlil denaga lomup o. Asogo til denaga lorogup holuk, henede haʼbuk ua o,” oluk moʼgulentesi.