Read Silimo Matius 12 Bible Online

Matius 12 - Silimo bible

Matius 12

¹O eria hegit e, is aphwami Yahudi aʼge agauwa sabit aʼge pam Allah paget weat oruakhwe, at Yesus osi iak wogu legesa aʼge ebano enemin gandum yogoʼgwe lagalat, osi soʼboru nele en, gandum eʼgen ebano ʼbalogo nil nil legesa.

²ʼBalogo nil-nil lagaimu re, is ap Farisi aʼge ebano en enil entigisarik e, Yesus disogo moʼgulegisa, “Yethemit! Agauwa sabit aʼge pam Allah paget weat welat e, Asogo togup, oluk wene ʼbelak oruak aʼgeat de, hat hosi gandum eʼgen ʼbalogo nil wegesa yema re!” oluk moʼgulegisema re,

³at Yesus en, “At Daud osi eʼberlik legesa aʼge emin soʼboru nele en enede ʼborok hasu lagama, at en tegei aʼge Allah iak pam pelal wogo aʼge ano his en onuk moʼgulik erlak welegeptik? Onuk moʼgulogu legebat o.

⁴At Daud Allah owi werikmu ʼgwegeitik e, soʼboru roti aʼge Allah paget pogwi aʼge ano is ap Allah eiye aʼge onomu nak noʼgulom o. Aʼgeat de, at Daud ebe emin, is ap at eʼberlik legesa aʼge emin, enemin, is no puk aʼge wegesarik neʼgesa oluk pelal wogo aʼge ano his onuk moʼgulik erlak welegeptik?

⁵Ye, agauwa sabit aʼge pam Allah paget weat welat di bele yu bele tu erlakma en weat wolom aʼgeat de, is ap Allah eiye aʼge nak, Allah owi werikmu ʼgoluk, is tu aʼgeat tugumu re, wene enebam pogwi erlak, oluk Allah iak pelal wogo oruak ano onuk moʼgulik erlak welegeptik?

⁶Holuk e, an en wene yu moʼgulhentaik. Allah owi werik ai mia ʼgelaʼge. Aʼgeat de, an yema welegi nak e, modok logoat o.

⁷Allah iak pelal wogo ano pam, wene disogo ʼbelak oruak, An henaik Allah nogola re, aphwami en wam watnogwi ai re, nebit o. We, is aphwami pema enebe enedeabonobogulom aiat nagai o, [21] oluk egei aʼge ai, his en pobi telipmu re, is yema wiak togwi erlak aʼge yu re, wene enebam pelep erlak o.

⁸Agauwa sabit aʼge pam Allah paget weat welege ai eiye re, an abat daklau wegi nebe anat o,” oluk moʼgulentesi.

⁹At Yesus o eba en lagarik e, o is aphwami Yahudi aʼge seʼban ogumu ebano ʼgoluk, ap mesik eʼgik il pema ʼgorlo aʼge oruakma il ʼgwelakhesi ʼgal, is ap pema ebano en wene Yesus ebam pouwogoluk emdema wogulat e, disogo moʼgulegisa, “Seʼban ogwi erlige Allah paget weat welat ou helingonobumu re, elit no?” oluk moʼgulegisema re,

¹⁰

¹¹at Yesus en e, “His Allah paget weat welagai erligeat de, ap his aʼge mesik uam domba wam mesik nak welago aʼge ano, ebe ʼgeling ʼbumo re, lisogo porluom erlak no? Lisogo porluomat o.

¹²Aʼge re, domba ai aʼge mia ʼgelaʼge o. Aphwami enebe ai oʼgo logat o. Holuk e, Allah paget weat welagai erlige welat, obabonobumu, elirat o,” oluk moʼgulentesi.

¹³Asogo moʼgulentesirik e, ap ano disogo moʼgulesi, “Heʼgik ʼbelinghemen,” oluk moʼgulesimu, eʼgik ano ʼbelinghesi ʼgal e, eʼgik pema ano emin hegit agarik obat aga.

¹⁴Asogo tegeimu re, is ap Farisi aʼge ebano odipmu lebegesarik e, “Yesus worul o,” oluk weim obok egesa.

¹⁵Weim obok asogo ogumu, at Yesus en enebabut enak aʼge pobi enebegeitik e, o eba en lasumu aphwami enebe aʼbik at eʼberlik legesa. Legesema re, ou obotut wiak aʼge ʼberlegat obabenebegeitik e,

¹⁶“An en obaphenebegismu re, nobok aphwami pema moʼgulentai lagup o,” oluk enesaʼgo wusogo moʼgulentesi.

¹⁷Asogo tegei ai re, at Yesaya Allah iak moʼgulentasu laga aʼge ano en disogo egei hegitsogoat emagoluk tegei ai o.

¹⁸Ye, at Allah en e, “Yethemit! At ai re, an neragam aʼge welemagoluk nuʼgwarek en polik poluk mikhwerlegi. Ye, nede hwedik aʼge nebam lobuktak e, at aiat o. An Narogun at wogeikmu ebam louk u ema re, an en aphwami wene enebam pasulat, noʼgorliselat, hegitsogoat tik ai paget, at en is aphwami oʼborl oʼgwe aʼge wene ʼbaksogo moʼgulentasu lema o.

¹⁹At en aphwami enemin wene eʼgirlogo ʼbuk ogulat, iak nga eselat, aphwami ebela lok oʼgwe lagaimu iak holuagoluk loksogo moʼgulentasulat, taga lema erlak o.

²⁰O ologun pam at en aphwami enebam wene pasulat, noʼgorlogo ukpasulat, hegitsogo nak tagalat, at anni ema ai owan oruakhwe, pide uak sisatak aʼge, at en porlolua erlak o. Ye, esaga magale ligago erlak hobu nak ligago holuk e, at en nekhi tua erlagat o.

²¹Ye, is aphwami oʼborlma aʼge enat onuk oluk, At en obapnonobua o, oluk ua,” [22] oluk egei aʼge oruak ai hegitsogoat emagoluk tegei ai o.

²²Asogo tegei ano pam en, pobuk ap mesik muʼgat ebabut wiak aʼge ogola ʼgwi lagama re, il hopnik pasulat, iak wong eselat, tegei aʼge Yesus eʼbek woluk wegesema re, at en obaptegeimu il hopnik aʼge dek eselat, iak wongtak aʼge ano hut agalat, tegei.

²³Asogo tegeimu re, is aphwami eragam odoksogo welegesa aʼge ebano en e, “Eige! Daud omlogo wema oluk ogu legesa ano ebe yu hwi a?” egesa.

²⁴Asogo ogumu, is ap Farisi aʼge ebano enesaʼgo hweligisarik e, disogo egesa, “Ap yu muʼgat ebabut wiak aʼge onue ʼgain onuk Beelzebul anoat, at ebam louktak oruakma no oluk e, muʼgat at osi ʼgelaʼge enebabut wiak aʼge aphwami onogola ʼgwigisarik oruakma henokho lebikpasu o,” oluk ogwiam e,

²⁵at Yesus en is enede epegesa aʼge enagat pobirak onoboluk e, disogo moʼgulentesi, “Ap ʼgaindek ononuk logo aʼge onosi eneragam tenentarok welagai oʼgwe aʼge loʼbok, is-is enemin hwerlirak poluk, enemin il ʼbelak welema holuk e, mia ema o. Ye, aphwami onowi seli loʼbok mesikmu aʼge emin, ap enebe loʼbok eneiyagai emin, enemin hwerlirak poluk enemin il ʼbelak welema holuk, wiak emayat o.

²⁶Ai ʼgelaʼge, at Iblis uʼgwarek osi muʼgat enebabut wiak aʼge enemin hwerlirak poluk, pema en pema mukho lebigenebelipmu re, at osi tenentarok welagai aʼge noʼgosogo anni elep. Miayat o.

²⁷An en Beelzebul ai anni pam, at osi enebabut wiak aʼge aphwami onogola ʼgwigisarik oruakma henokho lebikpasu legi holuk e, his honosi en muʼgat enebabut wiak aʼge is logon onogola ʼgwigisarik oruakma henokho lebikpogwi ai, sa anni pam henokho lebikpogwi epegep. Honosi en asogo togwi ai pam, is en e, Wene at Yesus ebaget egep ai re, dagansogo egep o, oluk wene henebam po ʼgelaʼge togwi o.

²⁸Aʼgeat de, an en naik Arogun anni pam muʼgat enebabut wiak aʼge ai aphwami onogola ʼgwigisarik oruakma henokho lebikpasu legi holuk e, Allah en eragam honobouwa ano arat heneʼbek horok lau waga o.

²⁹Ap mesik anni aʼbik aʼge eʼgik herle wusogo po erlakma en e, at en aʼge di aʼge yu aʼge eneʼgik abusak elirat wa ʼgwi lo epegep? Mia o. We, eʼgik herle wusogo poluk nak de, elirat wa ʼgwi lo yo.

³⁰Ye, ap sa en an nakhit lau wago erlak holuk e, at ai an neʼbirek weim hwerlirak aʼgeat o. Ye, ap sa en an neʼbirek aphwami odogonobogu lege erlak aʼge holuk e, at ap ai enat ʼbullogo lebigenebasu o,” oluk moʼgulentesi.

³¹Asogo moʼgulentesirik e, wene mesik disogo moʼgulentesi, “Wene asogo egep ai en, an wene yu moʼgulhentaik. Aphwami en di wiak yu wiak togwi aʼge emin, onogola en is agaikhen mi-miarak onobogulat eniak pam en onobok ʼbalogwi aʼge emin, at Allah en elirat erlagapsogo ukpo aʼgeat de, Allah Arogun ai nak onogola en mi-miarak pogulat obok ʼbalogwi holuk e, elirat erlagapsogo ukpouwa modok erlak o.

³²Ap sa en an abat daklau wegi ano ogola en mi-miarak nebasulat nobok wiak ʼbaliso holuk e, wiak tua aʼge ai Allah en elirat erlagapsogo ukpouwa aʼgeat de, Allah Arogun ai ogola en mi-miarak pasulat obok wiak ʼbaliso holuk e, wiak tua aʼge ai, Allah en yogodak emin, o ologun pam arat lauma eria pam emin, erlagapsogo ukpouwa modok erlak o,” oluk moʼgulentesi.

³³Asogo moʼgulentesirik mesik disogo moʼgulentesi, “E eʼgen op aʼge edip op aʼge enat egesiso yo. Ye, e eʼgen wiak aʼge ai re, edip wiak aʼge enat egesiso yo. Asogo egesiso ai pam e, e eʼgen yu op aʼge eʼgen egesiselat, yu wiak aʼge eʼgen egesiselat, pobi togu legep o.

³⁴His henebe ʼgosu en dogoʼgwe aʼge yema re! Aphwami en di wene yu wene enemdema en ogwi ai re, onogola ʼbeterak welat ʼgagalogo orlu agoam ogwi ai re, his e, henebabut wiagat welat wene op aʼge ogulom no? Erlak o.

³⁵Aphwami enebabut op aʼge re, onogola op aʼge ʼbeterak welat, ʼgagalogo orlu agoam e, wene op aʼgeat lebikpou wagai o. Aʼge re, aphwami enebabut wiak aʼge, onogola wiak aʼge ʼbetesogo welat, ʼgagalogo orlu agoam e, wene wiak aʼgeat lebikpou wagai o.

³⁶Holuk e, an wene yu moʼgulhentaik. Pobuk Allah en enemdema wokho wene enebam pasulat, noʼgorliselat, tua ai erlige re, aphwami eniak we yogunat ogwi aʼge ai paget wene enebam pouwayat o.

³⁷His honuʼgwarek heniak ogu legep aʼge hegitsogoat Allah en wene henebam pasulat, noʼgorliselat, tuayat o,” oluk moʼgulentesi.

³⁸Asogo egeimu re, is ap Allah iak pelal wogo eiye aʼge logon emin, is ap Farisi aʼge logon emin, enemin en Yesus disogo moʼgulegisa, “Nue. Nis pobi hobul en, hat elalin aʼge mesik tisokhwe nenil ho nenagai en moʼgulheige,” oluk moʼgulegisema re,

³⁹at Yesus en, “His aphwami o yogodak ya welegep aʼge yema re, henebabut wiak nak til denagalat Allah emin loʼboksogo wolom puk yema re! Asogo welat, his en e, Nis en pobi hobul en, hat en elalin aʼge mesik tin o, oluk moʼgulnogu legep aʼgeat de, an en elalin mu aʼge mesik tik erlak o. We, at Yunus Allah iak moʼgulentasu laga aʼge en aphwami logon pobi tuagoluk elalinat tegei ai ʼgelaʼge nak an en pobuk agaikhen tagoma henil niagup o.

⁴⁰At Yunus ai hiane ogum ogola oruakhwe, o hup agalat, dakha eselat, tagokhwe agauwa henagan welaga ai ʼgelaʼge re, an abat daklau wegi ano re, ʼgwiang ogola o hup agalat, dakha eselat, osokhwe, agauwa henaganat weleik o.

⁴¹At Yunus ai en is aphwami o Niniwe aʼge eba Allah iak moʼgulentai lagama re, enebabut heberlotluk, di wiak yu wiak togu legesa aʼge ukpegesa o. Aʼge re, at Yunus ai re, onuk erlak ʼgelaʼge o. We, an yema welegi yu nak de, logoatma re, o ologun pam Allah en aphwami wene enebam pasulat, noʼgorliselat, tua ai erlige re, aphwami o Niniwe aʼge eba enebe inotluk, his aphwami o yogodak ya welegep aʼge yu disogo moʼgulhentaik o, His wiak heneʼgerli o, oluk moʼgulhontouwa o.

⁴²Ai ʼgelaʼge, at hwe ʼgain aʼge owi o ik obut hegit o ʼbogorl edipmu walek eba enat ap Salomo ai ede ʼgagalak welat taga laga aʼge ai esaʼgo hweligoluk waga. Aʼge re, at Salomo ai re, mia ʼgelaʼge. Aʼgeat de, an yema welegi yu nak e, modok logo ai en e, pobuk o ologun pam Allah en aphwami wene enebam pasulat, noʼgorliselat, tua ai erlige, at hwe ʼgain ai ebe inotluk e, his o yogodak welegep aʼge yu disogo moʼgulhontouwa, His wiak, heneʼgerli, oluk moʼgulhontouwa o,” oluk moʼgulentesi.

⁴³Asogo moʼgulentesirik e, mesik disogo moʼgulentesi, “Muʼgat ebabut wiak aʼge ai aphwami onogola en libagalat e, An nowi ʼgeba weleriogoluk ʼbok laik i, oluk set hwalogo wolomma ebale heratil, lei modok asu wiak oʼgwe ik modok erlakma ebayat noso noso re, hwiariso modok erlak o.

⁴⁴Modok erlak en, at en e, disogo oso, An nowi naduk welegimu ano laiktik togolik ʼgwi laik o, oluk wago. Wagalat ʼgwiso ʼgal e, o ano enebe erlak, poluk aʼgeat de, ollong hosogo degelak oruakma hau wagalat e,

⁴⁵pobuk togolik liplai lasulat e, muʼgat pema enebabut at ebabut ʼgelaʼge puk. At e, enebabut modok wiak aʼge enebe nin sabiren, yoʼgo enebesirik e, wogonoboluk o ano ʼgu agalat, ap ano ogola ʼgoluk welagai yo. Asogo ʼgoluk oruakma re, ap ano naduk e, ebabut op ʼgelaʼge welago aʼgeat de, pobuk ebabut modok wiak ago yo. Ai ʼgelaʼge re, his aphwami o yogodak ya henebabut modok wiak togu legep aʼge yu ogo, asogoat togup ani o,” oluk moʼgulentesi.

⁴⁶At Yesus aphwami aʼbik enemin welat wene moʼgulentasu oruakma re, at ia emin, osi emin, wene moʼgulomogoluk eʼbek wegesarik e, odipmu welegesa.

⁴⁷Oruakma re, ap mesik en e, “Yesus! Hat hia emin, hosi emin, wene moʼgulhomogoluk herahebil wegesarik odipmu oruak o,” oluk moʼgulesimu re,

⁴⁸at Yesus en e, “An nialak nosilak ai re, salak no,” oluk moʼgulesirik e,

⁴⁹is ap osi iak wogu legesa aʼge ebano eʼgik dum enebam ʼbilholuk e, “An nia nosi re, is yuat o.

⁵⁰Ap sa en an naik ʼbogorl pam aʼge ede epasu aʼge hegitsogo tiso holuk, at ai an not, nerei, nia oruak o,” oluk moʼgulesi.