Read Silimo Matius 15 Bible Online

Matius 15 - Silimo bible

Matius 15

¹Asogo togwi oruakma, is ap Farisi aʼge ado pema emin, is ap Allah iak pelal wogo eiye aʼge ado pema emin, o Yerusalem en Yesus eʼbek wegesarik e, wene disogo moʼgulegisa,

²“Is ap hat hosi hiak wogwi aʼge yema en, nenaʼbu neneʼbalak togu legesa hegitsogo togwi erlak sagalogo ukpoluk eneʼgik petne emerogwi erlak welat en de, soʼboru noʼgwi ai nopaget,” oluk moʼgulegisa.

³Asogo moʼgulegisema, at Yesus en e, “Holuk e, his ogo re, Allah en e, Disogo tip, asogo tip, oluk nenesaʼgo weregei wene ano sagalogo ukpoluk, henaʼbu heneʼbalak en togu legesa aʼge hegitsogo nak togu legep ai nopaget.

⁴At Allah en eselat e, Henaiklak henialak hau doʼgoksogoat waronobogu lemis o, [25] oluk egeitik e, mesik disogo egei, Sa en aik ia obok wiak ʼbaliso holuk e, at ai ebe modok woru o, [26]

⁵oluk nenesaʼgo weregei aʼgeat de, his en e, disogo moʼgulontogu legep, Sa en ia de a, aik de a, moʼgulontogulat e, An en aʼge di aʼge yu aʼge hat wokhoum aʼgeat de, Allah akhit pegirikmu o, oluk moʼgulontogu lemagoluk moʼgulontogu legep ai o.

⁶Asogo moʼgulontogu legep ai en e, is asogo tugumu, is enaiklak enialak hau doʼgoksogo waronobogwi erlak ai o. Asogo ogu legep ai pam, his henaʼbu heneʼbalak togu legesa wene ano tenakho welat e, Allah iak sagalogo ukpogu legep ai o.

⁷His henagap pam nak op ʼgelaʼge welat henede ʼbiren yema re! At Yesaya en Allah iak moʼgulentasulat wene disogo egei ai, his henebaget hegitsogo egei ani o.

⁸Allah en e, Is aphwami yema re, we, enemde pam en nak, an erliknobugulat, enede an nebam eberogwi erlak welat e, momu ebesi lagai o.

⁹Wene aphwami eniak aʼgeat de, an en egi aʼge ʼgelaʼge moʼgulontogwi ai en e, we ʼburlat an erliknobogwi o, [27] oluk egeimu, Yesaya en pelal wokho pesimu oruak ano, his henebaget hegitsogoat egei yo,” oluk moʼgulentesi.

¹⁰Asogo moʼgulentesirik e, pobuk at Yesus en aphwami aʼbik ebano worlentesimu wegesema re, wene mesik disogo moʼgulentesi,

¹¹“An wene ik aʼge yu his pobi togup en henesaʼgo opsogo hwelit o. Di aʼge yu aʼge enemde loʼgwe ʼgwelabogwi ai en enebe wiagabenebiso erlak o. Aʼge re, enemde pam en wene ogwi ai pamat wiagabenebiso yo,” oluk moʼgulentesi.

¹²Asogo moʼgulentesimu at osi iak wogu legesa aʼge ebano eʼbek wegesarik e, disogo moʼgulegisa, “Wene moʼgulnentigen ano, is ap Farisi aʼge en enesaʼgo hweligisarik e, At wiagat egei yo, oluk enebit hepegesa ai re, pobi tigen a? Erlak a,” oluk moʼgulegisa.

¹³Asogo moʼgulegisema at Yesus en e, “Di aʼge yu aʼge an naik ʼbogorl pam aʼge en owi yoru erlak aʼge holuk e, modok henokhoat hwikhouwa o.

¹⁴Enil hopnik welat e, ebela eneʼgik tenakho wogonoboluk lagai ai re, ukpemit o. At agaikhen il hopnik aʼge en, at agaikhen asogoat il hopnik aʼge moʼguleselat e, Ebela ʼgo yu lul, oluk eʼgik tenakho woluk louwa holuk e, eʼbiregat ʼgalok wogoma eʼgerlik ʼbi lo yo,” oluk moʼgulentesi.

¹⁵Asogo moʼgulentesimu, at Petrus en e, disogo moʼgulesi, “Nue. Wene ebam elitsogo moʼgulnentigen ai re, ebe ʼbaksogo moʼgulnentemen o,” oluk moʼgulesi.

¹⁶Asogo moʼgulesimu at Yesus en e, “His ogo re, is enemin hegirat wene ai owan pobi tu erlak welegep a?

¹⁷Di aʼge yu aʼge noʼgwiam, enemdema en ʼbekhit onogum pam ʼbiselat e, pobuk enemieat wesi lagai o, oluk his pobi togu legep erlak a?

¹⁸Aʼge re, wene enemde pam en libago ai re, enedemu en ʼgagalogo orlu ago ai enat enebe wiagabenebiso yo.

¹⁹Onogola en wene wiak aʼge eberugulat, aphwami waronobogulat, hwami ap onugwami aʼge ʼbabi tenontogulat, hwelani ʼbabi tenontogulat, yogorlia wogulat, enepenenat is agaikhe wene enebam pogulat, onobok wik-wiaksogo ʼbalugulat, togwi ai re, onogola enat ʼgagalogo orlu agoam libago yo.

²⁰Wene onogola en ʼgagalogo orlu ago ai en enebe wiagabenebiso ai o. Aʼge re, eneʼgik petne emerak erlak soʼboru noʼgwi ai en wiagabenebiso erlak o,” oluk moʼgulentesi.

²¹At Yesus en wene asogo moʼgulentesirik e, o eba ukpoluk o Tirus Sidon eba orlu aga.

²²Orlu agama re, hwe mesik o Kanaan eba owirak aʼge Yesus eʼbek wagarik e, iak loksogoat disogo moʼgulesi, “Daud en dogoʼgwe aʼge nue. An nagalogo muʼgat ebabut wiak aʼge ogola ʼgwegeirik wiagat oruak o. Holuk e, hedeapnebemen o,” oluk moʼgulesi aʼgeat de,

²³at Yesus en e, oʼgo modok moʼgulom erlak mo egeimu re, is ap at iak wogu legesa aʼge ebano wegesarik e, “Hwe yu neneʼberlik wagalat iak eli aʼbik yu, ʼbok louwagoluk perakpemit,” oluk moʼgulegisa.

²⁴Asogo moʼgulegisema re, at Yesus en e, disogo moʼgulentesi, “Allah en, Is aphwami Israel aʼge enebe wam domba wam nalago ai ʼgelaʼge oruak ai en, is nak entai lak oluk peraknobou waga o,” oluk moʼgulentesi.

²⁵Asogo moʼgulentesimu oruakhwe, at hwe ano Yesus eʼbek wagarik e, odogorlu pam hweriogo welat hau weriselat e, disogo moʼgulesi, “Eige! Nue. Letniemen da,” oluk iak erlagaik ʼgusogo moʼgulesimu,

²⁶at Yesus en e, “Malik onsoʼboru aʼge wik-wok, mene nouwagoluk emdema hwikhai loma re, mia o,” oluk moʼgulesi.

²⁷Asogo moʼgulesimu, at hwe ano en e, “I, nue. Demat egen aʼgeat de, at mene eiye aʼge ai soʼboru e delak pam nasumu, eʼgen ʼgwiangma ʼbelabisoam e, mene ai enat nasu o,” oluk moʼgulesi.

²⁸Asogo moʼgulesimu, at Yesus en eselat, “Hwe yu nerei yo. Hat en e, At en tua o, oluk hede nebam modok heʼberik pegen ai en e, hede eberigen ai ʼgelaʼgeat hegitsogo obaphebaik o,” oluk osokhwe erianoat agalogo ano op aga.

²⁹Yesus en asogo takpoluk, o eba en ʼbegeitik e, ik Galilea yeʼgelak ano esaʼgoʼgwe lasu lagarik e, duk pam ligagarik eba huraga.

³⁰Huragarik oruakma re, aphwami enebe aʼbik at eʼbek wagalat e, onoyuk soborak aʼge emin, enil hopnik aʼge emin, eneʼgik onoyuk edenak aʼge emin, eniak erlak aʼge emin, is pema enebam ou aʼge aʼbigat, wogonoboluk Yesus eʼbek wegesarik at eragam onobou wegesema re, at en modok obabenebegei.

³¹Asogo obabenebegeimu re, is aphwami ebano eniak erlak aʼge eniak ogulat, eneʼgik onoyuk edenak aʼge op agalat, onoyuk soborak aʼge op otluk ebela lagalat, enil hopnik aʼge dek otluk yerontugulat, tugumu entigisarik e, “Eige! Nis aphwami Israel aʼge nenaik Allah nonogorlok o,” oluk erliktigisa.

³²Asogo tigisema eʼberlik e, at Yesus en at iak wogu legesa aʼge ebano worlentesi. Worlentesimu wegesema re, at en e, “Nosilak logwe. Is aphwami aʼbik yema nenemin modok welat agauwa henaganat nogogerikmu re, onsoʼboru modok erlak agama noʼgwe no ʼgelaʼgeat oruak ai re, nede en nede heseliso yo. Soʼboru modok no erlakma ai re, ebela lagaihwe dawat hwerlil yawat hwerlil louwano oluk, an en peragonobo re, nebit ʼgelaʼge o,” oluk moʼgulentesimu re,

³³at osi iak wogu legesa aʼge ebano en e, disogo moʼgulegisa, “O leimu aphwami onowi werik modok erlakma yema aphwami aʼbik odoktak aʼge yema soʼboru roti aʼge onogumsogo nouwagoluk, ebe ʼgeba aʼge wogontul o,” oluk moʼgulegisa.

³⁴Asogo moʼgulegisema at Yesus en e, “His soʼboru roti worogo aʼge meren tenak welegep,” oluk hin wesimu, is en e, “We, ebe sabiren nak. Ye, hiane emalik aʼge, we, wei nak oruak o,” oluk moʼgulegisa.

³⁵Asogo moʼgulegisema, at en e, aphwami aʼbik odoktak welegesa aʼge ebano ʼgwiang oʼgwe huremagoluk moʼgulentesi.

³⁶Moʼgulentesirik e, soʼboru roti aʼge sabiren eriano emin, hiane eriano emin, eʼgigem wesirik, Allah hau wusogo re, soʼboru roti aʼge eriano ʼgusogo aphwami aʼbik ebano soʼburontouwagoluk, at osi iak wogu legesa aʼge ebano wogentesimu, soʼburentigisa.

³⁷Soʼburentigisema onogumsogo neʼgesarik, dedilogo pegesema re, mul sum sabiren emde lorophegeik yagasogo pegesa.

³⁸Is soʼboru neʼgesa ai re, hwami malik enemin wenagonobu erlak. We, is ap enarlue aʼge nak e, enebe 4.000 at wenagenebigisa.

³⁹Ye, soʼboru noluk e, at Yesus ano aphwami aʼbik odoktak ebano onowi loʼgwe loʼbok peragonoboluk e, at ebe ik so ogola ʼgwegeitik ik so wusogo re, o Magadan liplau waga.