Read Silimo Matius 17 Bible Online

Matius 17 - Silimo bible

Matius 17

¹At Yesus en asogo moʼgulentesirik e, agauwa hebarligen nogoluk e, Petrus emin, Yakobus emin, ot Yohanes eʼbirek emin, enemategat wogonoboluk dom yat aʼge pam ligaga.

²Ligagarik oruakma, at ebe is enil pam, muat agalat e, orogole mo il ʼgelaʼge agalat, sum ʼbuktak aʼge ʼgut modok amulit aʼbik agalat, tegei.

³Asogo agama, at osi eriano en enil yethegesa ʼgal e, Musa emin, Elia emin, enam egesarik Yesus emin weneane ogumu entigisa.

⁴Asogo entigisarik e, at Petrus en Yesus disogo moʼgulesi, “Nue. Nis o yema obat welege hegi o. Hat en elit epegen holuk e, yema orabo henagan, hat hebaget mesik, Musa ebaget mesik, Elia ebaget mesik, uthentaik o,” oluk moʼgulesi.

⁵Asogo moʼgulesimu erianoat, o hena ʼgut aʼge sebelonobou wagarik e, Allah iak o hena ano ogola en disogo moʼgulentesi, “An nomlogo nede hwedik aʼge. At ebaget nogola nagai hasu legi o. Holuk, at iak hwelak wolomup o,” oluk moʼgulentesimu,

⁶Yesus osi enemin ligegesa aʼge ebano enesaʼgo hweligisarik, onogorlok en e, ondogorlu pam hweriogo welat onorogole ʼgwiangma sakhunsogo oruakma

⁷at Yesus eneʼbek wagarik e, enebe eʼgik tenagonoboluk e, “Honogorlok erlaksogo inemis o,” oluk moʼgulentesimu,

⁸enaʼgul lekholuk enil yethegesa ʼgal e, is pema re, erlak. We, at Yesus ematek nak oruakma hegesa.

⁹Asogo toluk e, dom pam ebano en ʼbu agalat, at Yesus en disogo moʼgulentesi, “An abat daklau wegi ano re, nebe watnobogwiam warotluk oruakma, Allah en nelalugapnobo erlak oruakhwe, an nebe takpasukhwe henil niegep aʼge ano aphwami pema modok moʼgulentagup o. We, pobuk Allah en nelalugapnebiso holuk en, moʼgulonto yo,” oluk enesaʼgo wetil wetil ʼbu aga.

¹⁰Enesaʼgo weregeimu, is osi ebano en e, disogo moʼgulegisa, “Holuk e, is ap Allah iak pelal wogo eiye aʼge ebano en e, Elia naduk wema o, oluk ogwi ai noʼgosogo en,” oluk hin wegesema,

¹¹at en e, disogo moʼgulentesi, “Elia naduk wemarik e, at en di tagalat, yu tagalat, degelil wema, ogwi ai, demat aʼgeat de,

¹²an wene demat moʼgulhentaik. At Elia ebe arat waga aʼgeat de, is aphwami en modok pobi tu erlak nelak pogulat e, asogo tu enagai en, at ebe wiagap pegesa ʼgelaʼgeat, an abat daklau wegi ano re, nebe asogo wiagapnobuayat o,” oluk moʼgulentesimu re,

¹³is osi ebano en e, disogo egesa, “Ai at Yohanes ik olomu ʼbelabenebise laga aʼge ano ebaget moʼgulnentesi o,” oluk pobi tigisa.

¹⁴Asogo toluk aphwami aʼbik ebano eneʼbek ʼbu egesema re, ap mesik Yesus eʼbek wagarik eragam odogorlu pam huragarik hau weriselat e, disogo moʼgulesi,

¹⁵“Nue. An nomlogo yu hedeap pemen o. Il purluk tagalat, ebe waragalat, elaluk agalat, tagalat e, nin erlige nan erlige odouk olomu ʼgwiselat, ik olomu lasulat, tiselat wiaksogo oruak ai en e,

¹⁶hat hosi hiak wogwi aʼge eneʼbek woluk wegi aʼgeat de, is en tu re, mia aga,” oluk moʼgulesi.

¹⁷Asogo moʼgulesimu, at Yesus en e, disogo moʼgulesi, “His aphwami o yogodak welegep aʼge yema re, henede nebam heʼberik erlak welat nal aga legep yema re! An his henemin agauwa merenam wolomul no. His disogo tugukhwe nepe mosogo agauwa meren weleik,” oluk moʼgulentesirik e, “Malik ai an neʼbek woluk manis o,” oluk moʼgulentesimu

¹⁸malik ano woluk wegesema muʼgat ebabut wiak aʼge ogola ʼgwegeirik oruakma Yesus en wene yagosoam e, henokho libagama erianoat op aga.

¹⁹Op agama re, is Yesus osi iak wogu legesa aʼge ebano eʼbek wegesarik emin enemategat welat e, disogo moʼgulegisa, “Nis en e, at muʼgat ebabut wiak aʼge ai henokho lebikpo mia ai no oluk,” oluk ebam hin wokhegesema,

²⁰at Yesus en e, “His henede pobisogo nebam heʼberik pogu legep erlak ai en o. ʼGebi eʼgen wei aʼge pelogwi ai ʼgelaʼge, henede an nebam wei nak heʼberik poluk e, dom ai moʼgulogulat, Eba en hegilogo momu eba lai lak o, oluk moʼgulorogup holuk e, eba en momu eba lai loat o. His en e, di aʼge yu aʼge tumu re, agaikhen mia om erlak op nak ema o, oluk demat moʼgulhentegis. [Aʼge re, muʼgat ebabut wiak aʼge yu ʼgelaʼge onogola ʼgwegeirik oruakma re, soʼboru no erlakma en seʼban umu en nak e, elit henokho libom o,”] oluk moʼgulentesi.

²²Pobuk e, at Yesus osi enemin o Galilea eba odoktigisarik welat e, disogo moʼgulentesi, “An abat daklau wegi ano re, ap en yoʼgo louwarik is muon eneʼgigem nobouema,

²³watnobua o. Watnobuema re, nebe werak agauwa ʼbiren weleiktik en, agauwa henaganak aʼge re, naik Allah en nelalugapnobua o,” oluk moʼgulentesimu re, onogola modok wiak etil legesa.

²⁴Asogo toluk, o Kapernaum wegesema re, is Allah owi werik aʼge paget uang ʼgonu oluk wogu legesa aʼge ebano en, at Petrus eʼbek wegesarik e, disogo moʼgulegisa, “Honue Allah iak moʼgulhentasu aʼge ai en Allah owi werik aʼge paget uang po ʼgogwi aʼge ano mesik pasu a? Erlak a,” oluk moʼgulegisema re,

²⁵at Petrus en e, “Pasuat o,” oluk moʼgulentesi. Moʼgulontoluk olema ʼgwi lagarik e, at en owan u erlak oruakhwe, at Yesus en naduk disogo moʼgulesi, “Simon. Hat e, ʼgesogo epegen. Is ap ʼgwiangma aʼge ononuk logo ai paget, aphwami salak en uang pogwi. Onuʼgwarek onosi en pogwi epegen a? Ye, at e, is muon en pogwi epegen a,” oluk moʼgulesimu re,

²⁶at Petrus en eselat e, “Is ap mu aʼge en pogwi o,” oluk moʼgulesimu, at Yesus en e, “Holuk e, is onuʼgwarek onosi ai en e, po puk epegi.

²⁷Aʼge re, is en enapseriap watnontouwano oluk, ik yeʼgelakma lorik hiane worogwi aʼge herle ano ik olomu ʼbelabugumu naduk naduk wagun aʼge ano heʼgikmu waguntik emde larak pasuam e, uang emde elema oruakma hagun o. Holuk e, aiat wik-wok hat hebaget emin, an nebaget emin, is ap ai wogontomup o,” oluk moʼgulesi.