Read Silimo Matius 18 Bible Online

Matius 18 - Silimo bible

Matius 18

¹Ai erlige re, at Yesus osi iak wogu legesa aʼge ebano eʼbek wegesarik e, disogo moʼgulegisa, “Allah ʼbogorl pam aʼge eragam enebasumu eba, ʼgain onuk logo aʼge re, sa welema o,” oluk hin wegesa.

²Asogo hin wegesema re, at en malik wei aʼge mesik worlhesimu eʼbek wagama re, is ebano eneʼgerlakma ʼburlmu edikpoluk welat e,

³disogo moʼgulentesi, “His aphwami yu re, henebabut heberlotluk malik wei aʼge yu enebabut ʼgelaʼge orogup erlak holuk e, ʼbogorl pam Allah en eragam enebasumu eba ʼgwi lagup modok erlak o, oluk demat moʼgulhentegis o.

⁴Ap sa en, An nebe mia aʼge, oluk ebabut malik wei aʼge yu ebabut ʼgelaʼge ede uʼgwarek en sebelak poluk welema holuk e, at ai ʼbogorl pam Allah eragam enebasumu eba ʼgain onuk logoat welema o.

⁵Ye, ap sa en malik wei aʼge yu ʼgelaʼge an nebaget wasu holuk e, an nebeat woknebiso yo,” oluk moʼgulentesi.

⁶Asogo moʼgulentesirik e, mesik disogo moʼgulentesi, “Ap sa en malik wei aʼge yu ʼgelaʼge mesik ede an nebam heʼberik oruakma ʼgoboksogo uknobouwagoluk ogola ʼgagalua ano pam an ʼgoboksogo uknobouwa holuk, at ogola ʼgagaliso aʼge ano helep lok aʼge oʼgorlop pam herle erlilogo re, ik laut omugwe ede ʼburl eba pelaʼgogo ʼbelakpoma ik olomu loma re, op o.

⁷Is aphwami ʼgwiangma aʼge yema, is pema en an ʼgoboksogo uknobouwagoluk onogola ʼgagalumu modok wiak ema ai en e, nede o. An ʼgoboksogo uknobouwagoluk onogola ʼgagalogu lema aʼgeat de, is onogola ʼgagalogwi aʼge ai Allah en modok wiagabonobua aʼgeat oruak o.

⁸Heneʼgik en de a? Honoyuk en de a, wiagaphonobu ʼgelaʼge ago holuk e, pema akhit ʼbalogo hwikholuk, pema akhit nak welat, enelaluk modok wolomma eba ʼgumu re, op o. Aʼgeat de, heneʼgik honoyuk ai pema pema oruakma re, odouk nekhi oso erlakma eba perakhonoboma re, wiak o. Holuk e, pema akhit ʼbalogo hwikhemit o.

⁹Ye, henil en wiagaphonobu ʼgelaʼge ago holuk e, pema akhit hwelilogo hwikholuk, henil pema akhit nak welat enelaluk modok wolomma eba ʼgwi lo re, op o. Henil pema pema oruakma re, odoukmu perakhonoboma re, wiak o. Holuk e, pema akhit hwelilogo hwikhemit o,” oluk moʼgulentesi.

¹⁰Asogo moʼgulentesirik e, mesik disogo moʼgulentesi, “Malaikat Allah ʼbogorl pam en yoʼgo ʼbelabonobou ago aʼge en malik wei aʼge yu ʼgelaʼge tenentarok welat naik ilem modok welagai ai en e, malik ai honogola en mi-miarak enebagup o. [

¹¹An abat daklau wegi ano re, aphwami nal agai aʼge ai herasogo delenebigoluk wegi o.]

¹²Henede ʼgesogo epegep. Ap mesik uam domba ebe 100 welaga aʼge re, 99 nak duk pam ligagalat ebano opsogo oruakhwe, mesigat nak ebela nelakpoluk nal lai lasu holuk pobuk herati lo erlak no? Herati loat o.

¹³Ye, ap ano uam hwiakhorloluk e, 99 welegesa aʼge ai enebaget e, ogola horok weisogoat agai ho aʼgeat de, mesik nak nal lai laga aʼge ano ebe hwiaregeitik en nak e, ogola agai modok aʼbik ho yo, oluk demat moʼgulhentegis o.

¹⁴Ai ʼgelaʼge re, henaik ʼbogorl pam aʼge ano en e, Malik wei aʼge ai ʼgelaʼge mesik nak nal lai lo re, modok ebit o, oluk epasu o,” oluk moʼgulentesi.

¹⁵At Yesus en asogo moʼgulentesirik e, mesik disogo moʼgulentesi. “Hat mesik herei hare en wiagaphebiso holuk e, hat at eʼbek laguntik henematek nak welat e, Asogo togun o, oluk ʼbaksogoat esaʼgo werip o. Asogo werisoam, esaʼgo hweliso holuk e, wene ano erlagapsogo poluk eʼbirek op om o.

¹⁶Aʼgeat de, esaʼgo hweliso erlak holuk e, disogo tu o. Allah iak pelal wokho pasulat e, Aphwami en is pema wene enebam pouwogoluk holuk e, aphwami pema enebe ʼbiren a? Henagan a, wiak togwiam enil hogwi aʼge en, Demat nenil hege o, oluk ogwi holuk demat opo yo, [28] oluk egeimu pelal wokho pegesa ai en e, aphwami enebe ʼbiren a? Henagan a, yoʼgo onoboluk henemin eʼbek lu o.

¹⁷Lagupmu re, is ano eniak enesaʼgo hologwi erlak holuk e, Allah eiyagai enebe odoksogo oruakma moʼgulontomup o. Moʼgulentagupmu re, is Allah eiyagai enebe ʼberlek ebano eniak esaʼgo hweliso erlagat holuk e, at ai henerei henarilak aʼgeat de, is uang pemerintah paget ʼgonu oluk wogwi aʼge ebano enebit aʼge ʼgelaʼge leget oʼborlma aʼge ʼgelaʼgeat aga o, oluk opomup o,” oluk moʼgulentesi.

¹⁸At Yesus en asogo moʼgulentesirik e, mesik disogo moʼgulentesi, “Wene mesik yu moʼgulhentaik o. His en e, ʼgwiangma yema aʼge paget, Asogo togup erlak, oluk wene ʼbalogup holuk e, Allah ʼbogorl pam aʼge en wene ʼbalegei ʼgelaʼgeat ua o. Ye, his en e, ʼgwiangma yema aʼge paget, Asogo tu re, op o, oluk ogup holuk e, ai Allah ʼbogorl pam aʼge en op egei ʼgelaʼgeat ua o.

¹⁹Ye, wene mesik yu moʼgulhentaik. His henebe ʼbiren a? Henagan a, an nonuk pam odoktogup holuk e, an nebe heneʼgerlakma eba weleik ai paget e, his henebe ʼbiren henagan en ʼgwiangma yema welat, henede mesigat otluk, his en, Mesik woknentemen, oluk, we, noʼgwe aʼge Allah ʼgonu moʼgulorogup aʼge ai, an naik ʼbogorl pam aʼge en heniak esaʼgo holuarik e, wokhontouwayat o,” oluk moʼgulentesi.

²¹At Yesus en asogo moʼgulentesimu re, at Petrus eʼbek wagarik e, disogo moʼgulesi, “Nue. An nare mesik en wiagapnebiso holuk e, wene ai eʼgen doru pukmu en e, agauwa merenam ʼgelaʼge pam erlagapsogo ukpo yo. Hwerli agauwa sabit pam en erlagapsogo ukpo elit a? Mia ya,” oluk moʼgulesimu,

²²at Yesus en e, “Agauwa sabit pam erlagapsogo ukpoma re, modok mia o. At e, aʼbigat aphwami enebe 70 eneʼgik 7 pam lau wago holuk en nak de, elirat erlagapsogo ukpogulom o.

²³Ai ʼgelaʼge re, Allah en eragam enebasumu eba emin hegit e, ap ʼgain onuk logo aʼge mesik, at en aʼge osi en tenakho welegesa aʼge worlentesi. An nak sabusogo nebegesarik a? Is pema enebam ʼbelak oruak a, oluk eʼgik wenarigoluk worlentesimu wegesema re,

²⁴at en aʼge ebano eʼgik wenarisokhwe re, osi ebano aʼge mesik uang lok juta modok aʼbik ebam ʼbelak welaga aʼge eʼbek woluk wegesa.

²⁵Woluk wagaiam il ʼgwelakhesirik e, at en oʼgo wogonso re, mia agama re, at ap ʼgain ano en osi pema disogo moʼgulentesi, Ap yu ebe emin, ugwe emin, eiyagai emin, aʼge di aʼge yu aʼge emin, modok perlengsogo oʼgo ʼbaloguptik e, oʼgo wagup aʼge ai an woknosu manup o, oluk moʼgulentesi.

²⁶Asogo moʼgulentasukhwe, at ot ano en odogorlu pam huragarik hau weriselat e, disogo moʼgulesi, Nue. Hedeapnoboguntik e, il mesigat nak wolomup o. Woloroguntik worogunmu re, modok wokheigat o, oluk moʼgulesimu re,

²⁷at ʼgain ano en e, at ot ano ede agarik e, Holuk e, an naʼge hat hebam ʼbelak oruak aʼge ebano weat horlomup o. An ukpegi ai o, oluk wene erlagapsogo ukpoluk perakpesi.

²⁸Asogo perakpesimu re, at ot ano odipmu libaga ʼgal e, at are ap ʼgain ano ot mesik, at libaga aʼge ano ouang 1.000 aʼge weiyat wogosi aʼge ebam ʼbelak oruakma eʼbirek sarlok tigisa. Sarlok tigisarik ebe tenak poluk e, oʼgorlop ʼbetesogo tenak welat, Naʼge hebam ʼbelak oruak ano oʼgo woknemin, oluk moʼgulesimu re,

²⁹at are ano eragam ʼgonu egeitik hau weriselat e, Nare o. Hedeapnoboluk il mesigat nak wolomup o. Oʼgo wokheigat o, oluk moʼgulesi aʼgeat de,

³⁰are ano en, Nebit o, oluk ap ai ebam ʼbelak aʼge ano oʼgo owan wogoum erlak oruakhwe, ap eneʼgik herle wusogo onobogwi aʼge en o eneʼgik herle wusogo onobogumu ʼgwelakpoluk welemagoluk, wogentesi.

³¹Asogo tisokhwe, ap ʼgwelakpesi aʼge ano arilak pema en enil hegesarik enede modok wiak egesarik e, is en pobuk yoʼgo ap ʼgain ano wene ʼberlegat moʼgulosu wegesa.

³²Moʼgulosu wegesema re, ap ʼgain ano en ap ai wemagoluk moʼgulesimu, wagama re, disogo moʼgulesi, Hat hebabut modok wiak yu re! An naʼge hat hebam ʼbelak welaga aʼgeat de, hat hiak herlagaik hiak moʼgulnigenma, Weat horlomup o, oluk moʼgulhegis ebano re.

³³Aʼgeat de, an hat nedeaphebegis ai ʼgelaʼge, hat asogoat hare ai hedeaptelinmu re, oluk moʼgulesirik,

³⁴olot het en e, ap ano ebam ʼbelak aʼge ʼberlek perlengsogo wogoum erlak oruakhwe, is ap eneʼgik herle wusogo onobogumu welagai aʼge ebano en ʼgoʼbu worugulat pekharok welemagoluk wogentesi.

³⁵Ai ʼgelaʼge, his henari honorokhwilak en wiagaphonobogwi aʼge ai henede enat erlagapsogo ukpogwi erlak holuk e, an naik ʼbogorl pam aʼge en asogoat takhonobouwa o,” oluk moʼgulentesi.