Read Silimo Matius 19 Bible Online

Matius 19 - Silimo bible

Matius 19

¹At Yesus en wene ai arat moʼgulentesirik e, o Galilea ukpoluk e, o Yudea ik Yordan etle akhit ʼbi laga.

²ʼBi lasumu aphwami aʼbik eʼberlik ʼbi legesema re, at en o eba aʼge ou obabenebegei.

³Ou obabenebisokhwe re, is ap Farisi aʼge pema Yesus ebabut ʼbaluogoluk eʼbek wegesarik e, disogo moʼgulegisa, “Ap en e, hwami wogo aʼge ai, wene lok aʼge, wei aʼge, ebam pogulat e, Nebit o, oluk lologo ukpo elit a? Mia ya,” oluk moʼgulegisema,

⁴at Yesus en, “Allah en edipmu eba en walentasulat e, Ap walhasulat, hwe walhasulat, walentesi o, [29] oluk wene pelal wogo ano onuk moʼgulik erlak welegep no?

⁵Asogo walentesirik e, wene disogo moʼgulentesi, Ap en e, aik ia ukpoluk ugwe eʼbirek op welat e, enebe ʼbiren aʼgeat de, mesik nagat emarik welemak o, [30]

⁶oluk moʼgulentesi ai en e, enebe ʼbiren puk. Mesigat egesarik oruak o. At Allah enat asogo eʼbirek dipsogo enebesirikmu re, aphwami onuʼgwarek en, dedelu re, modok erlak o,” oluk moʼgulentesimu,

⁷is en e, “Holuk e, at Musa en, Ap agaikhe en hwami wogo aʼge ukpaigoluk holuk e, Hwe yu hebe nebit o. Ukhebegi o, oluk, pelal wokho eʼgikmu wogotluk e, ukpo elirat o, oluk egei ai noʼgosogo en egei,” oluk moʼgulegisa.

⁸Asogo moʼgulegisema, at Yesus en e, “Erlak o. Wene asogo moʼgulentesi ai re, his honogola modok ʼbuk welat moʼgulhentasuam henesaʼgo holu modok mia ai en, Honugwami wogo aʼge lologo ugonoboat o, oluk moʼgulentesi ai o. Asogo aʼgeat de, edip pam Allah en walentasulat e, asogo modok egei erlak o.

⁹Holuk e, wene mesik yu moʼgulhentaik o. Ap sa en ugwe wogo aʼge ap agaikhe en ʼbabi tenhasu erlak aʼgeat de, lologo ukpoluk hwe mu wasu holuk e, ʼbabiat tua o,” oluk asogo moʼgulentesimu,

¹⁰at Yesus iak wogu legesa aʼge ebano en, “Holuk e, ap en hwami wogonobu erlak, hwami en ap wogonobu erlak, wolom e, op hegi,” oluk moʼgulegisema,

¹¹at en e, “Asogo aʼgeat de, wene ik yu, aphwami ʼberlegat enebaget elit erlak o. We, is Allah en enebabut asogo til laga lemagoluk wogentesi aʼge nak e, pobi tua o.

¹²Ye, is ap pema re, enialak onogola en onouwarli erlak aʼge dagagalat e, hwami wogonobogwi erlak modok welagai o. Ye, is nin pema re, aphwami en onouwarli wogwiam e, onugwami wogonobogwi erlak welagai o. Ye, is nin pema re, Allah en eragam enebasumu eba, at ebaget togu lomogoluk enepenenat onugwami wogonobogwi erlak welagai o. Wene egi ai elirat wo holuk e, wemit o,” oluk moʼgulentesi.

¹³At Yesus en asogo moʼgulentesirik oruakma, is aphwami pema en eneiyagai at en eʼgik enaʼgul sebelogo seʼban onobouwagoluk eʼbek wogonoboluk wegesema re, at osi iak wogu legesa aʼge ebano en wene yagentigisa.

¹⁴Wene yagentigisa aʼgeat de, at Yesus en, “Aphwami malik wei aʼge yu ʼgelaʼge ema holuk en nak de, ʼbogorl pam Allah en eragam enebasumu eba eiye ema ai paget e, is malik wei aʼge eba an neʼbek wemak o. Wene ʼbalogup o,” oluk moʼgulentesi.

¹⁵Asogo moʼgulentesirik e, eʼgik enaʼgul sebelak onoboluk, eba en o momu laga.

¹⁶At Yesus asogo lagarik oruakma, ap mesik eʼbek wagarik e, disogo moʼgulesi, “Guru, nue o. An noburlal-hoburlal taknobuagoluk, an op aʼge on e, noʼgosogo tagalom epegen,” oluk moʼgulesimu,

¹⁷at Yesus en e, disogo moʼgulesi, “Hat op ʼge ʼgelaʼge tagalom paget oluk an moʼgulnigen ai, noʼgosogo en. Op tiso aʼge re, at mesigat nak oruak o. Hat enelaluk modok wolomulmu eba ʼgwilo hagai holuk e, wene Allah en nenesaʼgo weregei wene ai hesaʼgo hologuntik e, hegitsogo taga lemen o,” oluk moʼgulesimu,

¹⁸at ap ano en e, “Wene ai ebe ʼgesogo paget egen,” oluk, hin wokhesimu, at Yesus en e, “Wene ai Allah en disogo egei, Aphwami enebe waronobogup o. ʼBabi tenentagup o. Yogorlia wagup o. Henepenenat onobok ʼbalogup o. [31]

¹⁹Henaiklak henialak hau doʼgoksogo waronobogu lomup o. Henebe honuʼgwarek henede hwedik welegep ai ʼgelaʼge, is aphwami muon henemin welegep aʼge ai ogo, henede hwedik wolomup o, [32] oluk nenesaʼgo weregei wene ai paget egi o,” oluk, moʼgulesimu re,

²⁰at ap souwe aʼge ano en e, “Wene ʼberlek moʼgulnigen ai re, nesaʼgo hwelak welat hegitsogo taga legi aʼgeat o. Aʼge re, ʼge aʼge tu erlak welegi epegen,” oluk moʼgulesimu

²¹at Yesus en e, “Hat hebe modok op eigoluk holuk e, yema en laguntik e, haʼge di aʼge yu aʼge ebano ʼberlegat is muon enebam oʼgo ʼbali lu o. Oʼgo ʼbaloguntik e, oʼgo wokhema aʼge ai, is aphwami muon enerlagaik aʼge eba soʼbusogo wogontomup o. Asogo wogentagunmu re, hat ʼbogorl pam aʼge logat eiye orogun o. Holuk e, arat asogo soʼbusogo wogontoluk e, an neʼberlik denaga lorogun en e, manup o,” oluk moʼgulesi.

²²Asogo moʼgulesimu, at ap souwe aʼge ano esaʼgo hwelegeirik e, aʼge modok aʼbikmu no oluk, ede wiak agarik laga.

²³Lagama at Yesus en e, osi iak wogu legesa aʼge ebano disogo moʼgulentesi, “Aphwami enaʼge aʼbik ai ʼbogorl pam Allah en eragam enebasumu eba noʼgosogoat ʼgwilo ʼgelaʼgeat o, oluk demat moʼgulhentegis o,” oluk moʼgulentesi.

²⁴Asogo moʼgulentesirik e, at en e, “Wene ai aʼgeat pobuk lagaksogo moʼgulhentaik o. Wam unta ebe lok aʼgeat de, hin ele loʼgwe ʼgwelabumu re, elit sollongsogo ʼgwilo aʼgeat de, is aphwami enaʼge aʼbik aʼge ai Allah en eragam enebasumu eba ʼgwilo modok mia o,” oluk moʼgulentesi.

²⁵Asogo moʼgulentesimu re, at osi iak wogu legesa aʼge ebano enesaʼgo hweligisarik e, onogorlok aʼbik egesarik disogo moʼgulegisa, “Holuk e, Allah en aphwami salak ʼgelaʼge nak e, elit delonobua hwe,” oluk moʼgulegisema,

²⁶at Yesus en is enebam il pesirik e, disogo moʼgulentesi, “Aphwami en mesik tu puk aʼgeat de, at Allah en di aʼge yu aʼge tu nak e, elit o,” oluk moʼgulentesi,

²⁷At Yesus en asogo moʼgulentesimu, at Petrus en e, “Aʼge re, nis hat heʼberlik noʼgu lomogoluk di aʼge yu aʼge ʼberlegat ukpoluk wegerik hemin noʼgu lege aʼge yu nak e, no woknontouwa,” oluk moʼgulesimu,

²⁸at Yesus en e, “An demat moʼgulhentaik. His an neʼberlik noʼgu legep aʼge yu re, di aʼge yu aʼge Allah en pobuk ʼget mu aʼgeat tuarikmu en, an abat daklau wegi ano pobuk weiktik, erliknobugukhwe, nebalema eba ʼgain oruakma, his neragam eba honoboluk 12 enebale delakma ʼgainat welat, aphwami Israel aʼge enaʼgul onuk 12 ebano his en wene enebam pogulat, noʼgorlogulat, togu lema o.

²⁹Holuk e, an nonuk lok emagoluk ap sa en owi werik emin, ot ue emin, orokhwi emin, aik ia emin, eiyagai emin, iabuk siok emin, ukpoluk wago holuk e, ebalema Allah en oʼgo ebe aʼge modok aʼbigat wogeselat, noburlal-hoburlal wogeselat, tua o.

³⁰Asogo aʼgeat de, is aphwami o yogodak ya ʼgain ononuk oruak aʼge aʼbigat, pobuk ononuk erlak ema o. Ye, is pema yogodak ononuk erlak oruak aʼge pobuk ononuk oruak ema o,” oluk moʼgulentesi.