Read Silimo Matius 20 Bible Online

Matius 20 - Silimo bible

Matius 20

¹At Yesus en pobuk disogo moʼgulentesi, “ʼBogorl pam Allah eragam enebasumu eba emin hegit e, disogo ʼgelaʼge. Ap ʼgwiang eiye aʼge mesik yabuk anggur yabuk tuagoluk ap heraenebil e, huberat yoʼgo libaga.

²Libagarik, ap yoʼgo enebesi aʼge ebano emin wene disogo moʼgulentesi, Agauwa mesigat paget togup holuk e, oʼgo uang agauwa mesigat paget togwiam wogontogwi hegitsogoat henebe loʼbok mesik mesik wokhentaik o, oluk moʼgulentesimu, is en e, Elirat o, oluk moʼgulegisema, at iabukmu peragenebesi.

³Peragonoboluk e, o mo wago eria pam laga ʼgal e, is ap logon mu aʼge pasar eba weat oruakma il entesi.

⁴Il entesirik e, Ap yu logwe. His e, an niabuk anggur yabuk eba eneminat ti lit o. Togupmu re, an en oʼgo hegitsogoat wokhentaik o, oluk moʼgulentesi.

⁵Asogo moʼgulentesimu is ano legesema re, ap ʼgwiang eiye aʼge ano naduk tegei ʼgelaʼgeat, pobuk asogoat erlige jam 12 ʼgelaʼge is nin pema yoʼgo enebasulat, hopmu akhit, jam 3 ʼgelaʼge is nin pema yoʼgo enebasulat, taga laga.

⁶Pobuk o hik iogoluk tagokhwe jam 5 libagarik e, is nin pema weat edik oruakma il entesirik e, His e, hubet hwerli enat we edik modok welegep yema nopaget oluk moʼgulentesimu re,

⁷is ap ebano en e, Yabuk logon tuagoluk yoʼgo nonobogwi erlak ai en welege o, oluk moʼgulegisa. Asogo moʼgulegisema, at ap iabuk eiye aʼge ano en e, Holuk e, his eneminat an niabukmu anggur yabuk eba ti lit o, oluk yoʼgo enebesi.

⁸Asogo yoʼgo enebesimu legesema, o arat hik egeimu re, ap iabuk eiye aʼge ano en, is ap ebano yabuk tugukhwe ʼgwelagentarok welaga aʼge en mesik disogo moʼgulesi, Ap yabuk togwi aʼge ebano worlentai lak o. Wagai holuk e, is pobuk ʼgwi legesa aʼge ai naduk oʼgo wogontoluk en, is naduk ʼgwi legesa aʼge ai oʼgo pobuk wogentagun o, oluk moʼgulesi.

⁹Asogo moʼgulesimu, is pobuk jam 5 pam ti legesa aʼge ebano naduk wegesema re, oʼgo uang yabuk agauwa mesigat paget togwiam wogontogwi ano hegitsogoat mesik mesik wogentesi.

¹⁰Ye, pobuk e, is naduk ti legesa aʼge ebano we, onogola en, Nis loksogo ʼgelaʼge ebam louksogo logon woknontouwa hwi a? enede opoluk wegesa aʼgeat de, oʼgo uang ano ebelesogoat mesik mesik is pema naduk wogentesi ʼgelaʼgeat wogentesi.

¹¹Asogo wogentasukhwe re, is ebano en uang wogulat e, enebabut sikhak-pukhaksogo tugulat e, ap ʼgain iabuk eiye aʼge ano disogo moʼgulegisa,

¹²Is pobuk wegesa aʼge yu re, we, satu jam ʼgelaʼge weiyat til legesa aʼgeat de, nis hubetsogo legerik, mo orlouk aʼbik hege aʼgeat de, nenemin hegitsogoat wogentigen ai nopaget, oluk moʼgulegisema re,

¹³ap iabuk eiye aʼge ano en, ap is aʼge mesik disogo moʼgulesi, Not o. An dagansogo wokhegis erlak o. Oʼgo uang mesigat wokhentaik egirikmu re, I o, oluk egepma re, egep hegitsogoat wokhegis o.

¹⁴Holuk e, horloluk lak o. An nede enat is pobuk togu legesa aʼge yu ogo, hat wokhegis ʼgelaʼgeat wogentaik o, oluk

¹⁵an nuʼgwarek naʼge oruak oluk u aʼge enat egi ai mia epegen a? An loksogo wogentegis ai en hat ʼbou tigen? oluk moʼgulesi.

¹⁶Asogo moʼgulesi, ai ʼgelaʼge re, is pobuk aʼge ai naduk ema o. Ye, naduk aʼge ai pobuk ema o,” oluk moʼgulentesi.

¹⁷At Yesus en asogo moʼgulontoluk, at ebe o Yerusalem ʼbiogoluk e, at osi iak wogu legesa aʼge enebe 12 ebano worlentesirik e, wogonoboluk onomuat ebelaʼgwe ʼbugulat e, disogo moʼgulentesi,

¹⁸“Nosi o. Nis yogodak e, o Yerusalem ʼbugu lege o. ʼBultik holuk e, an abat daklau wegi ano, ap en yoʼgo louwarik an nebe is ap Allah eiye aʼge onuelak ʼgaindek emin, is ap Allah iak pelal wogo eiye aʼge emin, eneʼgikmu nobouema re, is en e, ap muon en watnobuagoluk wene nebam pouwa o.

¹⁹Wene nebam pogulat e, is ap oʼborlma aʼge en eniak esegen yaknogulat, lagalʼbisok ʼgoʼbu watnobugulat, tugulat e, nebe e pam ediknoboluk noruagoluk wogontouwa o. Ye, arat watnobogwiam, agauwa ʼbiren werak weleiktik en, agauwa henaganak aʼge re, Allah en nelalugapnobua o,” oluk moʼgulentesi.

²⁰At Yesus en asogo moʼgulentesirik oruakma, at Zebedeus ugwe en emalik wogonoboluk Yesus eʼbek wagarik odogorlu pam huragarik hau weriselat e, “Nis mesik ʼgonu moʼgulhomogoluk heʼbek wege o,” oluk moʼgulegisema

²¹at Yesus en e, “Hat hede ʼgesogo epegentik en egen,” oluk moʼgulesimu re, hwe ano en e, “An nemalik ʼbiren ya re, aphwami ʼberlegat hat heragam enebagunmu eba heragam, at mesik heʼgik ʼbekhit akhit, ye, mesik heʼgik hware akhit, ʼgain welemagoluk, edigenebagun en moʼgulhegis o,” oluk moʼgulesi.

²²Asogo moʼgulesimu, at Yesus en e, “His ʼgonu moʼgulnigep ai re, wene ebe heneperlak welat moʼgulnigep o. An di obotut yu obotut taknobouwa ai re, his asogo elit takhonobo epegep?” oluk u ʼgelaʼge re, “An negeik neʼgak naik ai re, his elirat no epegep?” oluk moʼgulentesimu, is en e, “Elit noat o,” oluk moʼgulegisa.

²³Asogo moʼgulegisema, at Yesus en, “An di obotut yu obotut taknobouwa ai ʼgelaʼge, his asogoat takhonobouwa aʼgeat de, hat mesik an neʼgik ʼbekhit akhit, ye, mesik neʼgik hware akhit nemin ʼgain wolomul ai nak e, an en edikhonobo, mia o. We, an naik en pageat welemagoluk pulogo enebesi aʼgeat onobouwa o,” oluk moʼgulentesi.

²⁴Asogo moʼgulentasukhwe, is at osi pema akhit enebe 10 enesaʼgo hweligisarik e, onolot het is ap enebe ʼbiren ot ue eʼbirek eriano enebam pegesa.

²⁵Asogo onolot het enebam pegesema re, at Yesus en enebe ʼberlegat odoktuagoluk worlentesimu odoktigisema disogo moʼgulentesi, “Is aphwami oʼborlma aʼge onuelak pemerintah aʼge en eʼgin-peʼginsogo tagonobogulat, ye, is ap ʼgaindek ai en, wene harosogo moʼgulontogulat, togwi ai henaluk.

²⁶Aʼge re, his is togwi ai ʼgelaʼge, asogo tugulom modok mia o. An abat daklau wegi ano re, his aphwami an neragam aʼge welemagoluk wegi erlak o. At e, an en his heneragam aʼge welat his henebe herle hettak ʼgelaʼge welegep aʼge ai, henebe aʼbigat herle hebilhenebik en e, anat watnobuagoluk wegi ai o. Ai ʼgelaʼge, his ap sa en, An onue ʼgain eik o, epasu holuk e, honot emak. Ye, his ap sa en, An e, ʼgain eik, oluk, epasu holuk e, heneragam aʼge ʼgelaʼgeat emak o,” oluk moʼgulentesi.

²⁹Yesus emin asogo til legesarik e, o Yeriko en libagaimu re, aphwami modok aʼbik eʼberlik oluktak legesa.

³⁰Lagaihwe re, ap enebe ʼbiren enil hopnik aʼge ebela pam hweriogo oruakma, aphwami ebano en e, “Yesus wago yo,” oluk egesema enesaʼgo hweligisarik, eniak loksogoat ogulat e, Yesus disogo moʼgulegisa, “Daud en dogoʼgwe aʼge nonue a! Hedeapnenebemen a,” oluk moʼgulegisema re,

³¹is aphwami aʼbik ebano en e, “Heniak o,” oluk, wene yagentigisa. Asogo wene yagentigisa aʼgeat de, is ebano en eniak pobuk ebenagaikmu loksogoat disogo moʼgulugulat e, “Daud en dogoʼgwe aʼge nonue a! Hedeapnenebemen a,” oluk moʼgulegisa.

³²Moʼgulegisema, at Yesus ebe duksogo inagarik worlentasuam wegesema re, disogo moʼgulentesi, “An en noʼgosogo takhonobouwagoluk moʼgulnigep,” oluk hin wogentesimu,

³³is en ogulat e, “Nonue o. Nis nenil hopnik aʼge yu dektak nenebanogoluk moʼgulheige o,” moʼgulegisa.

³⁴Asogo moʼgulegisema re, at Yesus en edeabonoboluk e, eʼgik enil pam tenentesimu re, erianoat op egesarik, Yesus eʼberlik legesa.