Read Silimo Matius 21 Bible Online

Matius 21 - Silimo bible

Matius 21

¹At Yesus aphwami emin legesa aʼge ebano enemin o kota Yerusalem ʼgwi louwogoluk horok lai legesarik e, dom Zaitun edipmu o seli Betfage hegit lai legesarik e, Yesus en is at iak wogu legesa aʼge ebano pema enebe ʼbiren naduk peragenebesi.

²Peragenebasulat e, “O seli honorogolema etle lit o. Arat laguptik holuk e, owan ʼgwi lagalat henil yethagup ʼgal e, wam keledai emalik eʼbirek ʼgoʼbi erlelik oruakma henil hagup ani o. Ye, arat henil haguptik e, ʼgoʼbi erlelik ai hebilogo re, neʼbek woluk manup o.

³Asogo herle hebelogumu, is aphwami eba aʼge mesik en e, Nopaget ʼgoʼbi hebelogu legep, oluk wene ʼbaliso holuk e, disogo moʼgulontomup o, Nonue ʼgain Onuk Logo aʼge ano en wam keledai yu aʼge erlak en e, woluk louwogoluk ʼgoʼbi hebelogu lege o, oluk moʼgulosoam, at en e, togolik perleneat perakpou weik ani o,” oluk, wene wusogo peragenebesi.

⁴Asogo peragenebesi ai re, at ap Allah iak moʼgulentasu laga aʼge mesik en e,

⁵“Aphwami o Sion aʼge moʼgulentasulat e, Honue ʼgain Onuk Logo aʼge heneʼbek wago yo. At ebabut enago welat, wam keledai aʼge oʼborl pam huragarik wagalat, keledai emalik aʼge oʼborl pam huragarik wagalat, wago yo, oluk moʼgulentemen o,” [33] oluk egei ano emin hegit emagoluk, at Yesus en wene wusogo peragenebesi o.

⁶Peragenebesimu re, is ano legesarik, at Yesus en moʼgulentesi hegitsogoat togulat,

⁷wam keledai ano emalik emin woluk wegesarik e, onosum oʼborlma ʼbuktak aʼge noʼgorlogo keledai ebano onoʼborl pam delak pegesema re, at Yesus ebe sum delak aʼge pam huraga.

⁸Asogo huragarik lasumu re, is aphwami aʼbik ebano enebe esanat onosum oʼborlma ʼbuktak aʼge noʼgorlogo ebelaʼgwe delak pil lagalat, is pema re, e eʼgik edipmu aʼge deksogo ebelaʼgwe delak pil lagalat, tigisa.

⁹Asogo pil lagalat e, at Yesus ebe ʼburl poluk e, is nin pema naduk lagalat, is nin pema eʼberlik lagalat, til lagalat e, eniak loksogoat disogo il il legesa, “Daud en dogoʼgwe aʼge, nonue wa! Wa! Wa!” oluk u ʼgelaʼge, “Hosana! Nenaik ʼgain Allah Onuk Logo aʼge en perakhobou wagama wegen yu, at enat obaphobuak o. Allah onuk logo ʼbogorl pam welago aʼge naik wa!” [34] u ʼgelaʼge, “Hosana!” oluk amitmit supsogo il il, o Yerusalem ʼgwi legesa.

¹⁰ʼGwi legesema, is aphwami eba aʼge ʼberlegat erlik togulat, “Eige! Ap yu sa epegep,” oluk egesema re,

¹¹is aphwami esan ebano en ogulat e, “Yu Yesus Allah iak moʼgulentasu aʼge, owi o Galilea doʼgo kota Nazaret aʼge ano waga yu o,” oluk, moʼgulentigisa.

¹²Asogo egesema, at Yesus Allah owi werikmu ʼgwi lagarik e, is aphwami Allah owi werikmu ʼgoluk welat, di aʼge yu aʼge oʼgo wogulat, oʼgo ʼbalugulat, togu legesa aʼge perlengsogo mukho-makho odipmu lebigenebasulat, is pema uang e delak pam poluk agam-pagam hogu legesa aʼge emin, is pema e delak pam enebe hweriogo welat sue ʼberl ʼgelaʼge oʼgo wogu legesa aʼge emin, e delak aʼge ai abel eden-pedensogo hwikhai lasulat, til lagarik e,

¹³disogo moʼgulentesi, “Pelal wogo aʼge pam at Allah en eselat, An nowi werik aʼge yu paget aphwami en ogulat e, O seʼban ogu lomma o, oluk ogu lema o, [35] oluk egeimu pelal wogo oruak o. Aʼgeat de, his en e, is ap aphwami enaʼge eneʼgik abusak delogo horlogwi aʼge onowi ʼgelaʼge wusogo onobogu legep yema re!” oluk wene yagentesi.

¹⁴Asogo moʼgulentesirik e, aphwami enil hopnik aʼge emin, onoyuk soborak aʼge emin, Yesus eʼbek Allah owi werikmu eba wegesema re, at en obabenebegei.

¹⁵Asogo obabenebegeimu re, is ap Allah eiye aʼge onuelak ʼgain ebano emin, is Allah iak pelal wogo eiye aʼge ebano emin, enemin en e, Yesus en elalin tu puk aʼge tagoma enil hogulat, ye, malik wei aʼge en, “Nue wa!” oluk u ʼgelaʼge, “Hosana! Daud en dogoʼgwe aʼge nue wa,” oluk Allah owi werikmu eniak loksogo Yesus orogole wogumu enesaʼgo holugulat, tigisarik onolot het en

¹⁶Yesus disogo moʼgulegisa, “Is malik wei aʼge ogwi ai hesaʼgo hwelise legen a?” oluk, moʼgulegisema, at en e, “I o. Hwelise legi o. Ye, wene disogo oluk pelal wogo oruak aʼge ano his en onuk moʼgulik erlak welegep no? Is en Allah erliktugulat e, Hat hebe opsogo erlikhobogu lemagoluk, malik ʼget dogo aʼge emin, agamu owan noʼgwi aʼge emin, modok moʼgulentigenma hegi o, [36] oluk egesema, pelal wogo ai his en onuk moʼgulik erlak welegep no?” oluk moʼgulentesirik,

¹⁷is aphwami ebano ugonoboluk, o kota eba en liplau wagarik e, nogo o Betania u waga.

¹⁸Nogo oluk hubet siaksogo re, at Yesus o kota ano togolik ʼgwiselat e, ebela pam en soʼboru nele aga.

¹⁹Soʼboru nele agama re, e ara edip mesik ebela esaʼgo akhit oruakma il yetholuk edipmu lagarik il pobi hesi ʼgal e, eʼgen mesik u erlakma en, we, eʼgela nak muli oruak en e, disogo moʼgulesi, “Hat e yu, hwerli yogodak en ʼbekhit pobuk heʼgen modok modok ikhagun no,” oluk heman pasukhwe erianoat, e ara ano modok ʼbuk aga.

²⁰Asogo tisokhwe, at osi iak wogu legesa aʼge ebano enil hegesarik e, “Eige!” oluk ogulat e, “E ara yu mesik erligeat ʼbuk aga yu ʼgesogo,” oluk egesema,

²¹at Yesus en e, “An wene demat moʼgulhentaik o. An en e ara yu tegis ʼgelaʼge, his en asogo tu aʼge re, ai nak tu puk. Honogola wenemennei yat horok eberak erlak, we henede Allah pam heʼberik poluk, his en e, Dom yu yema en henokho ik laut omugwe lokma eba ʼgolokho lak o, oluk moʼgulorogup holuk e, asogoat louwa o.

²²Ye, his di aʼge yu aʼge Allah ʼgonu moʼgulogulat henede at ebam heʼberik pagup holuk e, wokhontouwayat o,” oluk moʼgulentesi.

²³At Yesus en wene asogo moʼgulontoluk e, at ebe Allah owi werikmu ʼgwegeirik welat wene moʼgulentasumu is ap Allah eiye aʼge onuelak ʼgaindek emin, is ap enarlue aʼge emin, Yesus eʼbek wegesarik e, disogo moʼgulegisa, “Hat e, noʼgwe aʼge eiye egentik di tagalat, yu tagalat, tise legen o. Ye, ap sa en eiye welemagoluk, edikhebesimu taga legen,” oluk moʼgulegisema,

²⁴at Yesus en e, “An ogo hin mesik wokhentaigat o. Hin wasumu, his en seʼgeksogo moʼgulnorogup holuk e, an en ogo re, ai aʼge eiye egirik taga legi o, oluk, niak ʼbaksogo moʼgulhentaigat o.

²⁵Aʼge re, at Yohanes en aphwami ik olomu ʼbelabenebise laga ano re, Allah ʼbogorl pam aʼge en moʼgulesimu ʼbelabenebise laga no a? Ye, at e, aphwami ʼgwiangma aʼge en moʼgulegisema ʼbelabenebise laga ya. Moʼgulnemis da!” oluk moʼgulentesimu re, is-is nak ogulat e, disogo egesa, “ʼBogorl pam aʼge en moʼgulesimu ʼbelabenebise laga, oluk moʼgulummu re, at en e, Holuk e, his en Yohanes iak demat oluk pobirak erlak welegep ai nopaget, oluk, moʼgulnontouwano.

²⁶Ye, Aphwami en moʼgulegisema ʼbelabenebise laga, oluk moʼgulummu re, is aphwami yema ʼberlek en, Yohanes ai Allah iagat moʼgulnentasu laga, oluk ogumu ai re, nis nonogorlok,” oluk egesarik,

²⁷pobuk Yesus moʼgulogulat e, “Wene ai nis neneperlak o,” oluk moʼgulegisema re, at Yesus en e, disogo moʼgulentesi, “Holuk e, an en ogo re, Ai aʼge eiye egirik taga legi, oluk, his moʼgulhentaik erlagat o,” oluk moʼgulentesi.

²⁸At Yesus en asogo moʼgulentasu lagarik pobuk disogo moʼgulentesi, “Wene ik yu re, his noʼgosogo opogu legep aʼge ik. Ap mesik eiyagai enebe ʼbiren welegesa. Oruakma, omlogo naduk dogo aʼge ai eʼbek lagarik e, disogo moʼgulesi, Nomlogo. Yogodak hat e, anggur yabukmu ano yabuk wesi lak, oluk moʼgulesi.

²⁹Moʼgulesimu, at omlogo ano en e, Nebit o, naik o, egei aʼgeat de, pobuk ogola eberegeirik e, yabuk ebe ano wesi laga.

³⁰Wesi lagama, at aik ano omlogo pobuk aʼge ano eʼbek lagarik e, asogo moʼgulesi aʼgeat de, at omlogo ano en e, I o, naik, egei aʼgeat de, yabuk ebe wesi lo erlakma en, mo egei.

³¹Holuk e, his honogola en e, is ap enebe ʼbiren eriano sa ʼgelaʼge en enaik ogola epesi aʼge hegitsogo tegei epegep,” oluk moʼgulentesimu, is en e, “Ai omlogo naduk aʼge ai en tegei,” oluk moʼgulegisema, at Yesus en e, “Holuk e, an en wene mesik demat moʼgulhentaik. His owan oruakhwe, is ap uang pemerintah paget ʼgonu oluk odoktogwi aʼge emin, hwami danian nil noʼgwi aʼge emin, is ebano naduk Allah eragam enebasumu eba ʼgwi louwa o.

³²At Yohanes ano Allah ede epasu aʼge hegitsogo ti louwagoluk moʼgulentau waga aʼgeat de, his henede en e, At iak ai demat oluk, pobi tu erlak welegep. Aʼge re, is ap pemerintah paget uang ʼgonu oluk odoktogwi aʼge ano emin, hwami danian nil noʼgwi aʼge ano emin, enemin en, At iak ai demat oso, oluk, pobi togwi. Is en asogo togwiam henil entigep aʼgeat de, his nak e, asogo togu legep erlak welegep yema re!” oluk moʼgulentesi.

³³At Yesus en wene asogo ebam elitsogo arat moʼgulentesirik e, “Pobuk wene mesik yu ebam elitsogo moʼgulhentaik o. Ap mesik oʼgwiang eiye aʼge en iabukmu anggur owi yakhwerlesirik e, leget wasulat, eʼgen ʼberelogo aʼbosu naʼgogulomma ʼgwiang patle deliselat, yerentarok wolomma e ʼberla tagalat, tegeitik e, ap logon ʼgwelakharok welemagoluk, onoboluk e, o momu eba laga.

³⁴Lagarik oruakhwe, eʼgen egesiso aʼge ano ʼbalogwi eriano hegit lau wagama, ap yabuk eiye aʼge ano eragam aʼge logon en, is ap ʼgwelakharok welemagoluk enebesi aʼge ebano en anggur eʼgen mesik wogemagoluk, eneʼbek perakonobou waga.

³⁵Aʼge re, is ap ʼgwelakharok welegesa aʼge ebano en, ap oʼgwiang eiye aʼge eragam aʼge en eʼgen waumagoluk peragonobou waga aʼge ebano enebe tenagonoboluk e, mesik ʼgoʼbu worugulat, mesik ebe ʼbeʼgi modogat worugulat, mesik ebe modok helep en worugulat, tigisa.

³⁶Asogo tigisema re, at ap oʼgwiang eiye aʼge ano en e, naduk e, enebe wonogo ʼgelaʼge peragonobou wagarik, pobuk nak e, enebe modok aʼbik peragonobou waga aʼgeat de, naduk tigisa ʼgelaʼgeat tagenebegesa.

³⁷Asogo tigisema re, at ap ʼgain ano en e, disogo egei, Holuk e, yogodak an nuʼgwarek nomlogo yu nak e, eniak hau doʼgoksogo wusogo wouwa o, oluk epesirik, omlogo anoat perakpou waga.

³⁸Perakpou wagama wagoam e, is ap yabuk eiye welegesa aʼge ebano en, enil yethegesarik e, is-is nak ogulat e, Ap ai aik ebalema yabuk eiye ema aʼge ano ebe waga etle o. Holuk e, yabuk yu nisat eiye omogoluk ebe woruok o, oluk,

³⁹ebe tenak poluk yabukmu leget oʼborlma lebikpegesarik e, ebe modok werigisa.

⁴⁰Asogo tigisa ai en, pobuk ap oʼgwiang eiye aʼge ano wemarik, is ap ʼgwelakharok welegesa aʼge ano noʼgosogo tagonobouwa epegep,” oluk moʼgulentesimu,

⁴¹is en e, “Ap oʼgwiang eiye aʼge ai wemarik e, is enebabut wiak aʼge eba modok perlengsogo waronobuarik, yabuk anggur yabuk ai ʼgwelakharok welat, eʼgen arat hurle agoam ʼbalogo wogosi laga lemagoluk e, ap mu aʼge logon yoʼgo onoboat o,” oluk moʼgulegisa.

⁴²Asogo moʼgulegisema, at Yesus en e, “His e, Allah iak disogo pelal wokho pegesema onuk moʼgulik erlak welegep no? Is en e, Is ap tukang o helep pam owi worogwi aʼge en e, o ebe worugulat e, Helep yu wiak o, oluk ukpegesa aʼge ai o waʼgi ʼgelaʼgeat dalagama o. Asogo aga ai, nenaik ʼgain Allah Onuk Logo aʼge enat tegei o, oluk, nenil hegerik e, Eige! oluk erliktogu lege, [37] oluk pelal wokho pegesa aʼge ai onuk moʼgulogu legep erlak no? Onuk moʼgulogu legebat o.

⁴³His e, Allah en eragam honobo aʼge ʼgelaʼgeat welegep aʼgeat de, eragam honobouwa erlak o. We, his henebalema re, e eʼgen op aʼge egesu ʼgelaʼgeat, is aphwami enaʼgul onuk mu aʼge en, Allah ede epasu aʼge hegitsogo togu lema aʼge holuk onobouwa o. [

⁴⁴Ap sa en ebe ʼbule helep ai pam ʼbu ago holuk, ebe modok seʼgerl-seʼgarlsogo ʼbo pouwa o. Ye, helep ai en ap sa ebam sebelu ago holuk e, ebe modok al ʼbesilogo worua o,”]

⁴⁵oluk moʼgulentesimu, is ap Allah eiye onuelak ʼgaindek aʼge emin, is ap Farisi aʼge emin, enemin en e, “Wene ebam elitsogo egei ai, nis nenebagerat moʼgulnentesi ani o,” oluk, pobi tigisarik,

⁴⁶Yesus ebe tenak pouwogoluk tigisa aʼgeat de, aphwami enebe esan en, “At Yesus ai Allah iak moʼgulnentasu aʼge o,” oluk ogumu oluk e, onogorlok en, ukpegesa.