Read Silimo Matius 23 Bible Online

Matius 23 - Silimo bible

Matius 23

¹At Yesus en asogo moʼgulentesirik e, pobuk aphwami aʼbik odoktak welegesa aʼge ebano emin, at iak wogu legesa aʼge emin, enemin disogo moʼgulentesi,

²“Is ap Allah iak pelal wogo eiye aʼge emin, is ap Farisi aʼge emin, enemin en e, at Musa en wene Allah en nenesaʼgo weregei wene ano moʼgulentasu laga ai ʼgelaʼge, ebalema re, is en moʼgulhontogwi ai en e,

³is en di aʼge yu aʼge tuagoluk moʼgulhontogwi holuk e, aiat tenak welat togu lemis o. Aʼgeat de, is togwi erlak welat, is en e, His nak tit o, oluk moʼgulhontogwi ai re, is togwi ai ʼgelaʼge enebabut wokho togu lorogup o.

⁴Sum aʼge eʼgin aʼge herle hetsogo onuʼgwarek eneʼgik tenho erlak welat aphwami agaikhen enemarlo pam wouwagoluk moʼgulontogwi ai ʼgelaʼge, is ai en onuʼgwarek tenhogwi erlak welat en de, is nin pema nak tuagoluk wene eʼgin aʼge enebam pogwi ai o.

⁵Is en di bele yu bele togwi ai ʼberlegat e, Aphwami en yetnentarok welemak, oluk, onogola opogulat togwi o. Is en e, Seʼban ese legi, oluk, Allah iak suesiʼga pam pelal wokho eneʼberli pam loʼbok togwi aʼge ano, is en loksogo loʼbok tugulat, sum oʼborlma aʼge mu aʼgeat ʼbuktak aʼge ano, is en sum ogorluk yatsogo ikho ʼbuktugulat,

⁶ye, aphwami seni lok sakho noʼgumu, is ap ʼgain huragaimu eba ʼgolokho huragalat, o aphwami Yahudi aʼge seʼban ogumu eba ʼburlmu ʼgolokho hutla ʼgugulat,

⁷aphwami en, Guru naik, oluk hau waronobogulat, pasar oʼgo wogumu eba aphwami en eniak sakhosogo moʼgulontogulat, togu lemagoluk eba lagalat, asogo tugukhwe wolom enagai en welagai o.

⁸Aʼgeat de, his henaik e, guru wene moʼgulhentasu aʼge mesigat nak oruak ai en, henarilak honorokhwi henemin hegit holuk, is pema en, Guru nue, oluk moʼgulhontogwi modok erlak o.

⁹Ye, henaik ʼgain ʼbogorl pam aʼge mesigat welago ai en e, ap ʼgwiangma aʼge mesik moʼguleselat e, Naik, oluk moʼgulom modok mia o.

¹⁰Ye, honue wene henesaʼgo weriso re, an Kristus nomuat holuk e, is aphwami pema en, ʼGain nue, oluk, his moʼgulhonto modok mia o.

¹¹Holuk e, his ya sa en mesik ʼgain oruak holuk, at ai re, heneragam aʼgeat emak o.

¹²Ap sa uʼgwarek en, An ʼgain o, oluk inema holuk e, Allah en ebe sebelogo eneragam pouwa o. Ye, at ap sa uʼgwarek en is pema eneragam ʼgelaʼge welema holuk e, Allah en ebe logo pouwa o,” oluk moʼgulentesi.

¹³Asogo moʼgulentesirik e, is Allah iak pelal wogo eiye aʼge emin, is ap Farisi aʼge emin, enemin disogo moʼgulentesi, “His ap Allah iak pelal wogo eiye aʼge yu emin, his Farisi aʼge yu emin, henagap pam nak op ʼgelaʼge welat henede ʼbiren aʼge yema re! His ai aphwami Allah eragam ʼguano oluk e, his enat ʼgoduk larogu legep yema re! His honuʼgwarek ʼgogwi erlak welat e, is pema ʼguogoluk tugumu, his en e, ʼGogup no yo, oluk wene ʼbalugu legep yema re! [

¹⁴His ap Allah iak pelal wogo eiye aʼge emin, his ap Farisi aʼge emin, henagap pam en nak op ʼgelaʼge henede ʼbiren yu re! Allah en wiagaphonobua o. His e, hwami sugwe aʼge onowi werik emin, enaʼge emin, sebelhorlogularat de, aphwami en, enesaʼgo holugulat, Is ai op, oluk opouwagoluk seʼban yat wiak litil laga legep ai asogo togwi erlak wellepma re, Allah en wene weiyat henebam poluk wellep. Aʼge re, asogo togu legep ai en, wene eʼgin aʼge henebam poluk wiagaphonobua o.]

¹⁵His ap Allah iak pelal wogo eiye aʼge yu emin, his ap Farisi aʼge yu emin, henagap pam nak e, op ʼgelaʼge welat henede ʼbiren yema re! His heniak wogu lemagoluk aphwami heraenebil, ik laut lok yeʼgelak etle akhit libagalat, o di owi yu owi lagalat, noʼgu legep aʼge ai, Allah en wene his henebam poluk odouk orloukmu eba honobouwa ai ʼgelaʼge, is his heniak hologwi aʼge ai Allah en wene asogoat ʼbirenamsogo enebam pouwagoluk togu legep ai en, wiagaphonobua o.

¹⁶Aphwami enil hopnik aʼge en is pema moʼgulontogulat, Ebela ʼgo yu louwok! oluk u ʼgelaʼge, his en e, Allah owi werik onuk hoʼbuk ʼbalogup holuk, ai re, se ʼgelaʼge o. Aʼgeat de, emas Allah owi werikmu oruak aʼge ai nak e, onuk hoʼbuk ʼbalumu re, demat sogwi aga lema erlak o, oluk moʼgulontogu legep ai dagansogo togu legep ai en, wiagaphonobua o!

¹⁷Henede modok erlak welat henil hopnik yema re! ʼGe aʼge logo epegep. Emas ai aʼge logo epegep a? Allah owi werik ai en, emas ai aʼge Allah ebaget pegesa aʼge, oluk, owi werik ai logo epegep a.

¹⁸His en e, wene mesik yu ogu legep, Allah owi werikmu di aʼge yu aʼge e delak pam Allah akhit pogumu eba, ebale onuk hoʼbuk ʼbalogwi holuk e, se ʼgelaʼge o. Aʼge re, Allah ebe akhit pogwi ai aʼge onuk hoʼbuk ʼbalogwi holuk nak e, sogwi aga lema erlak o, oluk moʼgulontogu legep ai dagansogoat ogu legep o!

¹⁹Ye, henil modok hopnik yema re! Di aʼge yu aʼge Allah akhit pogwi ai logo epegep a? Ye, at e, di aʼge yu aʼge e delak ai pam pogwi ai en, Allah en aʼgeat o, oluk, ogwi ai en, e ai logo ʼgelaʼge epegep a?

²⁰At ap sa en, e delak pam di aʼge yu aʼge Allah akhit pugumu eba onuk hoʼbuk ʼbaliso holuk e, e delak ebe ai emin, di aʼge yu aʼge ebam pogwi aʼge ai emin, laʼbuksogo onuk hoʼbuk ʼbaliso yo.

²¹Ye, at ap sa en Allah owi werik ai onuk hoʼbuk ʼbaliso holuk e, o werik ai emin, Allah ebe o werik eiye welago aʼge ai emin, eneminat onuk hoʼbuk ʼbaliso yo.

²²Ye, at ap sa en ʼbogorl onuk hoʼbuk ʼbaliso holuk e, Allah ʼgain welagoma ebale ai emin, at ebe emin, eneminat onuk hoʼbuk ʼbaliso yo. His dagansogo togu legep ai en Allah en wiagaphonobua o.

²³Ye, his ap Allah iak pelal wogo eiye aʼge emin, his ap Farisi aʼge emin, henagap pam nak op ʼgelaʼge welat henede ʼbiren yema re! Allah paget tugulom aʼge logo ʼgelaʼge re, aphwami akhen enebaget hegitsogo togwi ai emin, aphwami pema enede hwedik welagai ai emin, enebabut orlonutak welagai ai emin, oruakhweat de, asogo on e, togwi erlak welat en de, his en ʼbeʼga ʼgelaʼge emin, hedit ʼgelaʼge emin, serei eʼgela ʼgelaʼge emin, wenakho 10 pam lau wago holuk, mesik ʼgegilogo Allah akhit pogu legep ai po aʼgeat oruakhweat de, wene ebe abel pam aʼge ai op togu legep aʼgeat de, wene logo aʼge togwi erlak ukpogu legep ai nak e, dagansogo togu legep o!

²⁴Aphwami enil hopnik aʼge en e, is nin pema moʼgulontogulat e, Ebela ʼgo yu louwok, oluk u ʼgelaʼge, his en e, elaluk aʼge wei aʼge ik naʼgogo pogumu eba ogola ʼgoluk oruakma enagat holuk lebikpogu legep aʼgeat de, wam unta lok aʼge heniak opsogo sagalogwi erlak ebesik ʼbil hogu legep ai paget, Allah en wiagaphonobua o.

²⁵His ap Allah iak pelal wogo eiye aʼge yu emin, his ap Farisi aʼge emin, henagap pam nak op ʼgelaʼge welat henede ʼbiren on yema re! Henegeik eʼbe emin, hene piring emin, oʼborl oʼgwe nak e, opsogo emerogu legep aʼgeat de, ogolaʼgwe re, aphwami enaʼge yogorlia horlogu legep aʼge ai emin, An nak woknetlip e, oluk opogu legep ai emin, modok ʼbetesogo oruak ai nak e, dagansogo togu legep o!

²⁶His ap Farisi aʼge henil modok hopnik aʼge yema re! Henegeik eʼbe eba ogolaʼgwe naduk opsogo horit o. Asogo togup holuk e, oʼborl oʼgwe elirat hosogo louwa o. His dagansogo togu legep ai re, Allah en wiagaphonobua o.

²⁷His ap Allah iak pelal wogo eiye aʼge emin, his ap Farisi aʼge emin, henagap pam nak op ʼgelaʼge henede ʼbiren aʼge yema re! His e, henebe yu ʼgelaʼge. Aphwami waragai aʼge ʼgwiang ogola salonobogumu eba oʼborl oʼgwe nak e, modok op aʼbosu ʼgut aʼge werakhweat de, ogola en, aphwami onuak eʼben sing-sangsogo welago ai ʼgelaʼge welegep o.

²⁸Ai ʼgelaʼge, aphwami en his henagap oʼborl oʼgwe nak e, yethontogwiam obat opogwi aʼgeat de, henede ʼbiren welat, honogola re, di wiak yu wiak togu legep aʼge ai aʼge modok ʼbeterak welegep ai paget Allah en wiagaphonobua o!

²⁹His ap Allah iak pelal wogo eiye aʼge emin, his ap Farisi aʼge emin, henagap pam nak op ʼgelaʼge henede ʼbiren aʼge yema re! His en e, ap naduk Allah iak moʼgulontogu legesa aʼge enebe werak salenebigisema oʼborl pam o wusogo pogulat, is ap naduk enebabut hegitsogo togu legesa aʼge werak selagonoboluk aphwami pema onogola eberak welemagoluk heleʼga wogu legesema pobuk ebano wogulat, his en e,

³⁰Nis nenebe yu re, is nenaʼbu neneʼbalak naduk welegesa eria nenemin wolloma re, nis nenemin en e, is ap Allah iak moʼgulontogu legesa aʼge ai waronobolu erlak o, oluk,

³¹honuʼgwarek en ogu legep ai, Nis nenebe re, is ap pageat Allah iak moʼgulontogu legesa aʼge nis nenaʼbu neneʼbalak en warenebegisa ai en dogoʼgwe aʼge welege o, oluk u ʼgelaʼgeat ogu legep o.

³²Holuk e, henaʼbu heneʼbalak edipmu en togu legesa ai ʼgelaʼge, his ologunmu aʼge ogo asogoat togu lorogupmu re!

³³His ʼgosu en dogoʼgwe aʼge henebe ʼgosuat welegep yema re! Aphwami Allah en wene enebam poluk odouk orloukmu peragonoboma, his hweiye liborogup no? Mia o.

³⁴Holuk e, henesaʼgo opsogo hwelit o. An en ap Allah iak moʼgulontogwi aʼge emin, onogola ʼgagalak aʼge emin, Allah iak pelal wogo eiye aʼge emin, peragonobou weik aʼge ai, his en pema akhit e pam edigonoboluk waronobogulat, pema akhit o his seʼban ogu legep oʼgwe ʼgoluk ʼgoʼbu wik-wiaksogo waronobogulat, nin pema akhit mukho-makho o kota mesik en o kota agaikhen peragonobogulat, tagenebagup ani o.

³⁵Ye, ai holuk e, is ap enebabut hegitsogo togu legesa aʼge, mebapsogo warenebil wegesa ai, hwerli edip Habel ebabut hegitsogo taga laga aʼge ue en weregei ai pam en ʼbekhit, hwerli ologun pam, at Berekia omlogo Zakharia ai Allah owi werik hoʼgorlakma, Allah uam wusogo odouk narlogu legesema hoʼgorlakma, ʼburlmu werigep ai hwerli, is ʼberlegat enemep his henebam loʼbok heneʼgik pam oruak o.

³⁶Ye, his yogodak welegep aʼge yu re, wene yu ʼberlegat hisat henebam eʼgin welema o, oluk, demat moʼgulhentegis o,” oluk moʼgulentesi.

³⁷At Yesus en asogo moʼgulentesirik e, mesik disogo moʼgulentesi, “Eige! His aphwami o Yerusalem aʼge yu nede o! His enat ap Allah iak moʼgulontogwi aʼge enebe waronobogulat, ap Allah en yoʼgo onoboluk peragonobou wago aʼge helep en damuk-demaksogo waronobogulat, togu legep ai nede o! Sue ayam olu agapsaburl lekho odoksogo enebasu ai ʼgelaʼge, an en nin hwedik nan hwedik his o yema welegep aʼge ʼberlegat asogo odoksogo henebaigoluk epasu legi aʼgeat de, his en, Nenebit, ogu legep ai, nede o.

³⁸Ai en e, Allah en his henebe ukhonobouema, honowi werik aʼge ai polugat welema o.

³⁹Ye, hwerli yogodak ya hwerli en e, an nebe henil nio erlak woloroguptik e, pobuk his en e, Nenaik ʼgain Onuk Logo aʼge Allah en perakhobou wagama wegenma re, at en obaphobuak o, [43] oluk pobuk moʼgulnorogup ano hwerli henil niagup ani o,” oluk moʼgulentesi.