Read Silimo Matius 25 Bible Online

Matius 25 - Silimo bible

Matius 25

¹At Yesus en asogo moʼgulentesirik e, wene mesik disogo moʼgulentesi, “Nenaik Allah en eragam enebasumu eba emin hegit e, hwelani enebe 10 en lampu ʼgwialogo woluk ap mesik ugwe waigoluk wagoma ologotma legesa ai ʼgelaʼgeat o.

²Is enebe 10 aʼge re, nin pema huaben, enede oruak. Ye, nin pema huaben e, enede erlak aʼge welegesa.

³Is enede erlak aʼge ai lampu woluk legesa aʼgeat de, minyak erlak agoam naʼgul aʼge oluk ebaget mesik naʼgogo woluk lo erlak.

⁴Ye, is enede oruak aʼge eriano nak e, lampu emin, sogoluak mesik minyak neʼgak welago aʼge emin, woluk legesa.

⁵Aʼgeat de, at ugwe waiyogoluk tago aʼge ano wom erlakma en aregen tiso en e, is ebano enebe ʼberlek nogo enil agama eba nogogisa.

⁶Asogo nogogukhwe, hup ede ʼburl is aphwami en e, Ap ugwe wo aʼge ano ebe waga ai o. Ologotma manis o, oluk, eniak loksogo egesema,

⁷is hwelani ebano enelaluk egesarik e, lampu egerle ebelogo ʼgwialil legesa.

⁸Is enede erlak aʼge ebano en, is enede oruak aʼge ebano moʼgulontogulat e, Lampu nis enaʼge nekhi oso yo. Holuk e, minyak his enaʼge logon woknentemit o, oluk, ʼgonu moʼgulentigisema,

⁹is hwelani enede oruak aʼge ebano en e, Erlak o. Ado meʼgisogo his wokhontugulat, pema nis horlogulat, tulmu re, erlak ema o. Holuk e, oʼgo ʼbalugumu eba logon oʼgo ʼbali lit o, oluk moʼgulentigisema,

¹⁰oʼgo ʼbalhwerlil legesema re, at ap ugwe wo aʼge ano arat wagarik e, is hwelani enede oruak aʼge degelogo pagathorloluk welegesa aʼge ebano enemin seni sakho nouwogoluk wogonoboluk ogola ʼgwegeitik e, ʼgoduk laregei.

¹¹ʼGoduk lasogo ʼgoluk oruakma, is hwelani nin pema ebano wegesarik e, Nenaik, ʼgoduk hutnentemen o, oluk moʼgulegisema,

¹²at en e, His eba salak. Henebe an neperlak o, oluk, demat moʼgulhentegis o,” oluk moʼgulentesi.

¹³At Yesus en asogo moʼgulentesirik e, “Ai ʼgelaʼge, an weik eria hegit e, his en, O ai erlige jam eria hegit wema, oluk, heneperlak ai en e, henebabut heberlogo welat yetniarok welemis o,” oluk moʼgulentesi.

¹⁴At Yesus en asogo moʼgulentesirik e, mesik disogo moʼgulentesi, “ʼBogorl pam Allah en eragam enebasumu eba, emin hegit e, ap mesik o walegat momu laigoluk eselat, at eragam aʼge worlentesimu wegesema re, at enaʼge di aʼge yu aʼge is tenak welemagoluk eneʼgigem poluk laga ai ʼgelaʼgeat o.

¹⁵Is enebabut ʼbalogo enebe loʼbok wogonto hegitsogoat wogontil laga. Ap mesik 5 juta wogoum ʼgelaʼge uang lok emas aʼge 5 wogeselat, ye, ap mesik 2 juta ʼgelaʼge wogeselat, ye, ap mesik 1 juta ʼgelaʼge wogeselat, tegei. Asogo wogontoluk e, o momu walegat laga.

¹⁶Lagama re, ap uang emas 5 juta ʼgelaʼge wesi aʼge ano uang ai pam di aʼge yu aʼge oʼgo ʼbaliselat e, pobuk 5 juta mesik emin mangnosogo pesi.

¹⁷Ye, ap mesik 2 juta ʼgelaʼge wesi aʼge ano asogoat pobuk 2 juta mesik emin mangnosogo pesiat.

¹⁸Aʼgeat de, ap mesik 1 juta ʼgelaʼge wesi aʼge ano en nak e, woluk lagarik e, uang ue ʼgain aʼge ano en aʼge, ʼgwiang palholuk hisogo pei laga.

¹⁹Asogo ʼgwiangma selak poluk oruakma re, onue ʼgain ano welagarik e, pobuk wagarik, Uang wogentegis aʼge ebano, is en pobuk meren mangno tigisa, oluk, worlentesimu wegesema re,

²⁰ap uang lok emas aʼge 5 juta ʼgelaʼge wesi aʼge ano pobuk 5 juta at mangno tegei aʼge woluk wagarik e, Nue. Hat en 5 juta woknigen ano re, ʼgwelakhemen o. An en pobuk 5 juta logon emin ebam mangnosogo pegimu ani o, oluk moʼgulesimu,

²¹at ue ano en e, Not o! Op modok tigen o. Hat hebabut heʼberik ano en, hegitsogo modok taga legenma hegi o. Wei nagat wokhegis aʼgeat de, hede heʼbisogo tenak welegen ai en e, pobuk modok loksogo tenak wolorogun en, edikhoboluk wokheik o. An hue nogola nagai hasu legi ai ʼgelaʼge, neʼbiregat nenagai hul en, ʼgwi suk o, oluk moʼgulesi.

²²Asogo moʼgulesirik oruakma, pobuk ap uang emas aʼge 2 juta ʼgelaʼge wesi aʼge ano eʼbek wagarik e, Nue. Hat en 2 juta woknigen ano re, ʼgwelakhemen. An en pobuk 2 juta mesik eminat ebam mangnosogo pegimu ani o, oluk moʼgulesi.

²³Moʼgulesimu at ue ano en e, Not o! Op modok tigen o. Hat hebabut heʼberik ano en, hegitsogo tigenma hegi o. Wei nagat wokhegis aʼgeat de, hede heʼbisogo tenak welegen ai en, pobuk modok loksogoat tenak wolorogun en, edikhoboluk wokheik o. An hue nogola nagai hasu legi ai ʼgelaʼge, neʼbiregat nonogola nenagai hul en, ʼgwi suk o, oluk moʼgulesi.

²⁴Asogo moʼgulentesirik oruakma, ap mesik uang emas aʼge 1 juta ʼgelaʼge wesi aʼge ano eʼbek wagarik e, Nue. Hat e, hebabut modok wiakma oluk e, is pema en owi peligisa aʼgeat de, eʼgen heʼgik abusak ʼbalhwerlasulat, is muon en owi yerigisa aʼgeat de, eʼgen heʼbik abusagat hwerlasulat, taga legen ebano re, an hebabut nalugat o.

²⁵Asogo taga legen ai re, an nogorlok en e, uang hat en aʼge 1 juta ʼgelaʼge ano ʼgwiang palogo hisasi legi o. Woknigen aʼge ano ebe yu o! Hwerlemen o, oluk moʼgulesimu,

²⁶at ue ano en e, Hat hebabut modok wiak hosorli ogo wiak aʼge yu re! An en e, is muon pelogwi aʼge eʼgen ʼbalhwerlasulat, is pema yerogwi aʼge eʼgen hwerlasulat, tiso aʼge nebabut ai hat halugat ani o.

²⁷Asogo haluk welat holuk e, an no uang ai is aphwami muon uang tenak welat sabusogo, mesik emin ebam louksogo pogwi aʼge eneʼgigem pelenma re, an pobuk weiktik e, no uang ebe emin, ebam louksogo mangno togwi aʼge emin, hwerlaimagoluk wogonto aʼge tigen, oluk moʼgulesirik e,

²⁸at osi pema disogo moʼgulentesi, Is aphwami pema enaʼge oruak aʼge ai, pobuk logon eminat ebam louksogo wogontogwiam enaʼge aʼbigat ema o. Ye, is pema enaʼge erlak aʼge ai wei nak welema aʼge ano eneʼgikmu aʼge delogo horlouwa ai en e, ap ai asogo tegeimu ai re, uang 1 juta ʼgelaʼge ai eʼgikmu aʼge delogo ap agaikhe 10 juta ʼgelaʼge wesi aʼge ai wogomis o.

²⁹

³⁰Holuk e, at ebe an neragam welema erlak aʼge yu re, leget oʼborlma o modok hiktakma eniak ʼgerlit marogulat, loʼgu marogulat, tugumu eba lebikpemit o, oluk moʼgulentesi,” oluk Yesus en moʼgulentesi.

³¹At Yesus en asogo moʼgulentesirik e, wene mesik disogo moʼgulentesi, “An abat daklau wegi ano, aphwami en erliknobugukhwe, is malaikat Allah ʼbogorl pam en yoʼgo peragonobou wago aʼge ebano ʼberlegat nemin womultik e, an erliknobugukhwe ʼgain Nonuk Logo aʼge welagoma welat,

³²ap mesik uam eiye aʼge en, domba wam holuk momu degelogo pasulat, kambing wam holuk momu degelogo pasulat, degelenebiso ai ʼgelaʼge, is malaikat ai en aphwami enaʼgul onuk loʼbok an nil pam odoksogo onobou agaihwe, an en asogoat degelenebik o.

³³Degelenebiselat e, is aphwami domba wam ʼgelaʼge holuk e, neʼgik ʼbekhit akhit enebasulat, ye, kambing wam ʼgelaʼge holuk e, neʼgik hware akhit enebasulat, tik o.

³⁴Asogo degelogo onoboluk e, an nebe ʼgain Nonuk Logo atma re, is neʼgik ʼbekhit akhit enebaik aʼge ai, wene disogo moʼgulentaik o, An naik en obaphenebegeimu welegep. Holuk, manis o. An soʼboru nele oruakma his en woknogulat, ik nele oruakma his en nangnogulat, an ap ʼbok ʼgelaʼge oruakma his en woknobugulat, nosum ʼbuktak erlak oruakma his en ʼbuktak nobugulat, ou werak oruakma his en ʼgwelakniau wagalat, herle werak oruakma niau wagalat, tigep ano en e, an naik en ʼbogorl ʼgwiang owan walho erlak welat, his ʼgain hononuk logo aʼgeat welemagoluk, polikhenebesi aʼge yu hwerlau manis o, oluk moʼgulentasuam,

³⁵

³⁶

³⁷is Allah iak hologo togu lema aʼge ai en e, Eige, nue o! Nis en hat soʼboru nele oruakma wokhogulat, ik nele oruakma nanghogulat, tige ai re, metne erlige tige no.

³⁸Ye, hat ap ʼbok ʼgelaʼge oruakma wokhobugulat, hosum ʼbuktak erlak oruakma ʼbuktak hobugulat, tige ai, metne erlige tige no.

³⁹Ye, hat ou werak oruakma, hiai lagalat, herle werak oruakma, hiai lagalat, tige ai re, metne erlige tige no, oluk moʼgulnogwiam,

⁴⁰an ap ʼgain Nonuk Logo aʼgeatma re, is aphwami ebano disogo moʼgulentaik, His en an nosi ononuk erlak aʼge logon oruakma asogo tagonobogu legep ai, anat taknobogu legep o, oluk, demat moʼgulhentegis, oluk moʼgulentaik o.

⁴¹Ye, is neʼgik hware akhit enebaik aʼge ai disogo moʼgulentaik, An naik en his heman henebesi aʼge yu re! An soʼboru nele oruakma, his en woknom erlak, ik nele oruakma, his en nangnum erlak, ap ʼbok ʼgelaʼge oruakma his en woknobu erlak, sum ʼbuktak erlak oruakma his en mesik ʼbuktak nobo erlak, ou werak oruakma emin, neʼgik herle hettak oruakma emin, ʼgwelaknio erlak togu legep o. Holuk e, an naik en, at Iblis osi enebe aʼbik enemin, odouk orloukmu welemagoluk enebale heliʼgogo enebesimu eba lit o, oluk moʼgulentaik.

⁴²

⁴³

⁴⁴Asogo moʼgulentasuam, is en e, Eige! Nue! Hat soʼboru nele oruakma, ik nele oruakma, ap ʼbok ʼgelaʼge oruakma, hosum ʼbuktak erlak oruakma, ou werak oruakma, heʼgik herle hettak oruakma, o metne erlige en lethio erlakma en mo ogu lege no, oluk, moʼgulnogukhwe,

⁴⁵an en e, His en aphwami pema ononuk erlak aʼge yekherak onobogu legep ano re, anat yekherak nobogu legep o, oluk moʼgulontoluk e,

⁴⁶is aphwami ai di obotut yu obotut hogulomma eba modok welemagoluk peragenebaik o. Aʼgeat de, is Allah iak hologo togu lema aʼge ai enelaluk modok wolomma eba enebaik o,” oluk moʼgulentesi.