Read Silimo Matius 26 Bible Online

Matius 26 - Silimo bible

Matius 26

¹At Yesus en wene ai ʼberlegat arat moʼgulentesirik e, pobuk osi iak wogu legesa aʼge ebano disogo moʼgulentesi,

²“Agauwa ʼbiren wolomultik en, seni Paskah tul ai his henalugat ani o. Asogo tugukhwe, an abat daklau wegi ano, ap en yoʼgo louwema, is nin pema en e pam ediknoboluk watnobuagoluk eneʼgikmu nobouwa o,” oluk moʼgulentesi.

³Ai erlige re, is ap Allah eiye aʼge onuelak ʼgain aʼge emin, enarlue aʼge ebano emin, at ap Allah eiye aʼge onue ʼgain onuk Kayafas ano owi pam odoktigisarik e,

⁴Yesus il walsogo tenak poluk woruogoluk obok ʼbalogu legesa.

⁵Obok ʼbalugulat e, disogo egesa, “Seni logat sorugumu ai re, eniak loksogo tagaluano oluk e, tenak po erlak wolomultik en de, o we erlige ʼgelaʼge holuk en tenak pouwok o,” oluk obok ʼbaligisa.

⁶Asogo tigisarik oruakhwe, at Yesus o Betania ap Simon ou hwenaʼgo ʼgelaʼge onogorlok aʼbik aʼge pageat ebam aga aʼge ano owi pam eba ʼgwi lagarik oruakma,

⁷hwe mesik aʼbosu eʼben op aʼge oʼgo aʼbik aʼge oʼgo ʼbalogo sogoluak helep onuk pualam heleʼgik aʼge pam ogola naʼgogo woluk Yesus soʼboru nasumu eʼbek ʼgwi lagarik e, aʼgul pam ʼbelabegei.

⁸Asogo ʼbelabegeimu, at Yesus osi iak wogu legesa aʼge ebano enil hegesarik e, “Aʼbosu we ʼburlat almasogo ʼbelabegei yu, nopaget,” oluk, onolot het egesarik e, hwe ano wene yagugulat e,

⁹“Aʼbosu ai oʼgo modok aʼbik aʼge ʼbalogo re, is enaʼge erlak aʼge soʼburonto aʼge,” oluk egesa.

¹⁰Asogo egesema re, at Yesus en enebabut enagat pobi enebegeitik e, disogo moʼgulentesi, “Hwe yu en obat taknebesi aʼgeat de, nopaget wene yagogu legep.

¹¹Is aphwami enaʼge erlak aʼge ai his henemin modok wolorogup aʼgeat de, an nak e, his henemin modok wolomul erlak o.

¹²At hwe yu en aʼbosu herlilnebegei yu re, an pobuk watnobuema nebe wareikmu re, werak salnobuogoluk egilnobu ʼgelaʼge arat egilnobu waga o.

¹³Niak demat moʼgulhentaik. Hwe yu eberak welemagoluk, aphwami wene op wene ano, o di owi yu owi moʼgulentil noʼgulat e, Hwe ai disogo tegei o, oluk obok op ogu lema o,” oluk moʼgulentesi.

¹⁴At Yesus en wene asogo moʼgulentesimu re, at osi iak wogu legesa aʼge enebe 12 ebano aʼge, mesik onuk Yudas Iskariot ano, is ap Allah eiye aʼge onuelak ʼgain ʼgain ebano eneʼbek lagarik e,

¹⁵“An en Yesus ai wokhentaikmu re, his en oʼgo noʼgwe woknorogup no,” oluk moʼgulentesimu, is ap ebano en e, “Oʼgo uang perak aʼge 30 wokhomul o,” oluk moʼgulegisarik e, eneʼgik wenakho wogegisa.

¹⁶Oʼgo arat pegesema re, at Yudas Iskariot ano en e, “Yesus ebe panoasuak noʼgosogo oruakma eneʼgikmu paik e,” oluk obok ogola welat wenemennei eberise laga.

¹⁷Yudas asogo ogola eberisokhwe, is aphwami Yahudi aʼge eʼgen roti poruagoluk ogola ʼgwelabogwi aʼge ano ogola ʼgwelabu erlak, we werakho noʼgwi aʼge ano nouwogoluk naduk ʼgomuk noʼgwi ʼgelaʼge nouwogoluk tugulat, is Yesus osi iak wogu legesa aʼge ebano eʼbek wegesarik e, disogo moʼgulegisa, “Nue. Hat domba wam seni Paskah paget nagun en, nis di aʼge yu aʼge o ʼgeba degelogo pei lo hagai epegen,” oluk ebam hin wegesema,

¹⁸at Yesus en e, “O kota ano laguptik e, ap mesik eba oruak aʼge ano re, wene disogo moʼgulomup. At nonue wene moʼgulnentasu aʼge ano en e, An tik aʼge arat horok lau wagama re, an nosi niak wogwi aʼge enemin, at owi pam eba seni Paskah sakho nouwogoluk, moʼgulesi lit o, oluk moʼgulnentesimu moʼgulhosu wege o, oluk moʼgulomup,” oluk moʼgulentesimu re,

¹⁹is ebano, at en egei hegitsogoat legesarik e, di aʼge yu aʼge seni Paskah ano paget modok degelogo pegesa.

²⁰O arat hup agama re, at Yesus osi iak wogu legesa aʼge ebano enemin legesarik e, enebe 12 ebano enemin huregesarik,

²¹seni noʼgulat e, disogo moʼgulentesi, “His ap ya aʼge mesik en, an nebe watnobuagoluk e, yoʼgo louwa ani o, oluk, demat moʼgulhentegis o,” oluk moʼgulentesi.

²²Asogo moʼgulentesimu, is ebano enede modok wiak egesarik disogo moʼgulegisa, “Nue! An de egen a? An e, erlak,” oluk, enebe loʼbok en il legesa.

²³Asogo il legesema re, at Yesus en e, “Hat mesik an neʼbirek neneʼgik mesik erlige piring ogola ʼgwelebak poluk aʼbosu egilogo neʼge aʼge ai enat, watnobuagoluk yoʼgo louwa o.

²⁴An abat daklau wegi ano re, tik aʼge pelal wogo oruak hegitsogoat tik aʼgeat de, at ap nebe watnobuagoluk yoʼgo louwa aʼge ai nak e, eige. Modok wiagat ema o. At ap ai dagelep erlakma re, obat wellep o,” oluk moʼgulentesimu,

²⁵at Yudas, Yesus woruagoluk yoʼgo laga aʼge ano en e, “Holuk e, nue. An de a? An e, erlak,” egeimu at Yesus en e, “Harat aʼgeat de, ese legen o,” oluk moʼgulesi.

²⁶At Yesus en wene asogo moʼgulentesirik e, soʼboru noʼgulat e, soʼboru roti aʼge eʼgikmu wesirik e, Allah hau weregeitik e, ebe ʼgusogo is ebano soʼburentasulat e, disogo moʼgulentesi, “Yu an nebeat o. Waguptik e, menit o,” oluk moʼgulentesirik,

²⁷pobuk ik eʼbe anggur eʼgen aʼbosu neʼgak aʼge eʼgikmu wesirik, Allah hau wusogo seʼban egeitik, is ebano wogentasulat e, disogo moʼgulentesi, “Yu re, an nemebat o. Allah en wene wusogo wokhenebik egei ano, an nemep namogo watnobua ai pam aphwami esanat di wiak yu wiak togwi aʼge erlagapsogo ukpaik ai pam demat ema o. Holuk e, henebe ʼberlegat menit o.

²⁸

²⁹Wene mesik yu moʼgulhentaik. Anggur eʼgen aʼbosu yu noluk e, an pobuk mesik no erlak weleiktik en, hwerli naik en eragam onobouwa ai hwerli his henemin aʼbosu ʼget aʼge nul o, oluk, demat moʼgulhentegis o,” oluk moʼgulentesi.

³⁰Wene asogo moʼgulentesirik e, weni Allah oweni mesik werak poluk libegesarik e, dom Zaitun aʼgul pam ligegesa.

³¹Dom Zaitun pam ligegesarik e, at Yesus en e, “At Allah en, At ap domba wam pekharok welago aʼge ai ebe an en werikmu re, domba mesikmu orlobosogo oruak aʼge ai, hweiye ʼbogolua ani o, [46] oluk egeimu, pelal wokho pegesema oruak ai en e, yogodak hup ya, his ʼberlegat an uknoboluk hweiye ʼbogologup ani o.

³²Aʼgeat de, an watnobuema pobuk Allah en nelalugapnebisoam e, an naduk o Galilea ligegeiktik honlogotma weleik o,” oluk moʼgulentesimu,

³³at Petrus en e, “Is ʼberlegat ukhoboluk ʼbogologwi holuk e, an nak e, ukhoboluk modok lebeik erlak o,” oluk moʼgulesimu,

³⁴at Yesus en e, “Yogo hup sue ayam iak modok u erlak oruakhwe, hat en e, Yesus ai an neperlak, oluk, heʼgik henaganam elabe togun ani o, oluk, demat moʼgulhegis,” oluk moʼgulesimu,

³⁵at Petrus en e, “Erlak o. An neʼbiregat watnonobuema re, obat o. An en, Hat neperlak o, oluk, elabe hebik erlak o,” oluk osoam e, is Yesus osi iak wogu legesa aʼge ebano pema akhit ʼberlek en e, asogoat il legesa.

³⁶Asogo egesarik e, at Yesus ebe emin, osi iak wogu legesa aʼge ebano emin, enemin Getsemani e owi yogoma legesarik osi disogo moʼgulentesi, “An horok ya laiktik seʼban osokhwe re, his yema hweriogo welemis o,” oluk moʼgulentesi.

³⁷Asogo moʼgulontoluk e, Petrus emin, Zebedeus eiyagai enebe ʼbiren eriano emin, wogonoboluk lagarik e, ede obotut agalat, hwenik agalat, tegeimu re, disogo moʼgulentesi,

³⁸“An nede modok hwenik agarik warom ʼgelaʼge taknebasu o. Holuk his ya welat e, neminat nenebabut heberlogo wolomok o,” oluk moʼgulontoluk e,

³⁹at ematekma ʼgelaʼge horoksogo lagarik orogole sogup ʼbou egeitik e, Allah yoʼgo pasulat disogo moʼgulesi, “Naik o! An wiagapnobua ai delnobogun holuk e, delnebip o,” oluk u ʼgelaʼge, “Ik neʼgak nouwagoluk woknema ai, wokho elit holuk e, wokhomup o. Ye, erlak holuk e, an nede epegi aʼge ai erlak o. We, hat hede epegen aʼge aiat taknobomup o,” oluk seʼban egei.

⁴⁰Seʼban asogo oluk osi ebano eneʼbek waga ʼgal e, is modok nogo lebektakma en e, at Petrus ebam disogo moʼgulesi, “His e, hup ya satu jam mesik erlige paget an nemin nenebabut heberlogo wolom e, mia hwi a.

⁴¹Wiak tuagoluk henede ʼgagalil wemano oluk, henebabut heberlogo welat e, seʼban ogu lemis o. Henede en elirat tu oluk opogu legep aʼgeat de, henebe en asogo tu re, mia o,” oluk moʼgulentesirik e,

⁴²seʼban naduk egei ano ʼgelaʼgeat, pobuk togolik lagarik e, disogo egei, “Naik o! An wiagapnobua yu re, delnobu mia holuk e, hat hede epegen hegitsogoat emak o,” oluk, seʼban egei.

⁴³Seʼban oluk pobuk waga ʼgal e, is osi ebano nogo enil agama nogogumu entau wagarik,

⁴⁴seʼban naduk ʼbirenam egeitik, pobuk mesik emin igoluk lagarik e, naduk egei ʼgelaʼgeat egei.

⁴⁵Arat oluk osi eneʼbek wagarik e, disogo moʼgulentesi, “His set hwalogo nogogwi modok wolorogup a? Ap mesik en ap wiak togwi aʼge en an abat daklau wegi ano watnobuagoluk eneʼgikmu nobouwa ano arat nebaiyogoluk wago yu yethemit o!

⁴⁶Holuk e, lul en his inemis o. Ap an watnobuagoluk yoʼgo laga aʼge ano re, arat horoksogo waga etle o,” oluk moʼgulentesi.

⁴⁷Yesus en, “Horogat waga etle o,” oluk osokhwe erianoat, at Yudas, ebe Yesus osi enebe 12 ebano aʼge yoʼgo lagama, is ap Allah eiye aʼge onuelak ʼgaindek ebano emin, enarluedek ebano emin en, is ap enebe esan logolak aʼge yoʼgo onoboluk peragonobou wegesema, ʼgarok emin, ʼgoʼbu emin, woluk enebe modok pulholuk enemin wegesa.

⁴⁸At Yudas Yesus woruagoluk yoʼgo laga aʼge ano en, wene disogo weragenebesirik en wegesa, “Ebe pobi togup en e, an naduk laiktik hau emde motok weriso holuk e, his en e, I, ebe aiat hegi, oluk, tenak pei lu o,” oluk arat wene weragenebesimu no oluk e, enalugat oruakma,

⁴⁹at naduk Yesus eʼbek wagarik e. “Nue e,” oluk, hau emde motok werisoma re,

⁵⁰at Yesus en, “Not yu! Hat nopaget wegen,” oluk moʼgulesimu, is ap ebano Yesus eragam wegesarik e, ebe modok tenak pegesa.

⁵¹Tenak pogwiam e, ap mesik Yesus emin welegesa aʼge ano en ʼgarok owi ogola yagarak welaga aʼge, auwak oʼgwe en lit-lat wesirik e, ap Allah eiye onue ʼgain aʼge eragam aʼge mesik werigoluk lelhesi ʼgal e, esaʼgo nak sebasogo ʼbo pesi.

⁵²Asogo ʼbo pesimu, at Yesus en e, “Is ap ʼgarok pam waronobogwi holuk e, oʼgo ʼgarok pamat waronobogwi o. Holuk e, heʼgarok ai hauwak oʼgwe togolik ʼgwelabin o.

⁵³Yogodak an nebe erlele woknobuagoluk e, naik ʼgonu moʼgulummu, at en is malaikat Allah ʼbogorl pam en yoʼgo peragonobou ago aʼge ebano enebe esan 12 weiyat aʼgeat de, esan modok aʼbik yoʼgo onoboma, pulholuk delnebil wom mia epegen a?

⁵⁴Elirat delnebil wom aʼgeat de, delnebelipmu re, Allah enat, Asogo ema, oluk egeimu pelal wokho oruak ano re, noʼgosogo eʼbirek hegit elep epegen. Erlak o. Hegit emagoluk asogo yoʼgo po erlak ukpegi ai o,” oluk, moʼgulesirik e,

⁵⁵is ap aʼbik wegesa aʼge ebano disogo moʼgulentesi, “Ap yogorlia wogumu tenagonobou wagai ai ʼgelaʼge, his en asogoat an tennobuogoluk, ʼgarok emin, ʼgoʼbu emin, modok woluk wegep yema re! An ninerlige-nanerlige Allah owi werikmu hweriogo welat wene moʼgulentasukhwe, his en an disogo tennobu erlak welegeptigat de,

⁵⁶is ap Allah iak moʼgulontogu legesa aʼge en pelal wegesa ano emin hegit emagoluk taknebegep o,” oluk, moʼgulentesimu re, is ap at osi iak wogu legesa aʼge ebano, at ebe ukpoluk hweiye modok ʼbogoligisa.

⁵⁷Hweiye asogo ʼbogoligisema re, at Yesus ebe tenak pegesarik e, ap Allah eiye aʼge onue ʼgain Kayafas eʼbek woluk legesa. Legesema re, eba is ap Allah iak pelal wogo eiye aʼge emin, enarluedek emin, odoktak oruakma legesa.

⁵⁸Yesus asogo woluk lagaihwe, at Petrus ano pobuk eneʼberlik daduk lasu lagarik e, ap ʼgain Kayafas ano owi dipmu ʼgwi lagarik, “Yesus paget noʼgosogo tua,” oluk il yerontoluk e, at Kayafas osi Allah owi werik tenak welagai aʼge logon eneʼgerlakma huraga.

⁵⁹Hweriogo oruakhwe, is ap Allah eiye aʼge onuelak ʼgaindek emin, wene Allah paget edip ʼbeloʼgogwi aʼge ʼberlek emin, at Yesus woruogoluk, disogo egesa, “Aphwami en at wiak tagoma enil hegesa aʼge uagoluk heraenebit o,” oluk, eniak esei enat wene ebam pouwagoluk heraenebigisa aʼge re,

⁶⁰enebe esanat eniak eseiyat wene ebam pouwogoluk wegesa aʼgeat de, erlak agama, pobuk ap enebe ʼbiren aʼge wegesarik e,

⁶¹“At yu enat, Allah owi ai moluksogo hwikholuk e, ebalema, pobuk agauwa ʼbiren pam werise leiktik en, henaganak aʼge ologun ʼbelakpoluk werik o, oluk egei aʼge,” egesema re,

⁶²at ap Allah eiye aʼge onue ʼgain ano inagarik e, “Is ap yema wene aʼbik moʼgulhogwi yema, hat en oʼgo mesik moʼgulentagun erlak a? Oʼgo moʼgulentagunmu re,” oluk moʼgulesi aʼgeat de,

⁶³at Yesus iak erlak mo egeimu re, at ap ʼgain Allah eiye aʼge ano en e, “Allah omlogo Kristus perakpouma egesa ano, ebe hat holuk e, moʼgulnentagun en, at Allah elaluk modok welago aʼge onuk hoʼbuk ʼbalogo moʼgulhegis o,” oluk moʼgulesimu,

⁶⁴at Yesus en e, “Hat en egen aiat o. Aʼge re, wene yu an en his ʼberlegat moʼgulhentaik o. Hwerli yogodak en e, an abat daklau wegi ano, at Allah anni aʼbik di aʼge yu aʼge tu aʼge nakma re, neʼbirek eragam eʼgik ʼbekhit akhit ʼgainat weleiktik e, pobuk ʼbogorl pam eba en o hena ogola ʼbu agoma henil niagup ani o, oluk moʼgulhentegis,” oluk moʼgulesimu,

⁶⁵is ap Allah eiye onue ʼgain ano osum derlepsogo hwikhasulat e, disogo moʼgulentesi, “At ogola en Allah mi-miarak poluk onuk wiagap pesi ai hegep a? Aphwami en at wiak tagoma enil hegesa aʼge wene seʼgeksogo uagoluk nopaget yerentarok wolomul. At en Allah ogola mi-miarak pasulat onuk wiagap tago ai arat henesaʼgo hweligep o.

⁶⁶Holuk e, his noʼgosogo opogu legep,” oluk moʼgulentesimu, is en e, “Ebe modogat woruok o,” oluk moʼgulegisa.

⁶⁷Asogo moʼgulegisarik e, was ebam topuktak pogulat, ʼgoʼbu worugulat, eneʼgik en damuk-demaksogo worugulat, tugulat e,

⁶⁸“Kristus! Sa en wathebegei no. Moʼgulnentemen da,” oluk, moʼgulogu legesa.

⁶⁹Asogo moʼgulosokhwe, at Petrus ano o hoʼgorlakma hweriogo oruakma, hwele mesik eneragam aʼge eʼbek wagarik e, disogo moʼgulesi, “Hat ogo re, Yesus Galilea aʼge ai emin noʼgu legep aʼge epegi,” oluk moʼgulesimu,

⁷⁰at Petrus en aphwami aʼbik enilemat, disogo moʼgulesi, “Hat egen ai an neperlak o,” oluk,

⁷¹ebela lok emde ʼbelak lebagai oʼgwe liplau weigoluk tisoma re, at hwele agaikhen en e, eneragam aʼge mesik muat il yetholuk aphwami aʼbik ebano disogo moʼgulentesi, “Ap yu Yesus Nazaret aʼge ano emin nese laga aʼgeat de,” oluk moʼgulentesimu,

⁷²at Petrus en naduk egei ʼgelaʼgeat pobuk Allah onuk hoʼbuk ʼbaliselat e, “Ap ai an neperlak o,” oluk, moʼgulentesirik,

⁷³erianoat oruakma, is aphwami aʼbik ebano Petrus eʼbek wegesarik e, disogo moʼgulegisa, “Hat hebe demat is aʼgeat o. Hiak enak aʼge pobi togu lege o,” oluk moʼgulegisema,

⁷⁴at Petrus en e, “Ap ai ebe an neperlak o, naik Allah uak! Niak esei egi holuk e, at en watnobuak o,” oluk, hoʼbuk ʼbalisokhwe erianoat sue ayam iak egei.

⁷⁵Sue ayam iak egeimu, at Petrus en e, “I. Yesus en an moʼgulneselat, Sue ayam iak u erlak oruakhwe, hat en e, Yesus an neperlak o, oluk hat heʼgik henaganam elabe togun ani o, oluk moʼgulnesi ano ebe arat elabe tegis yu hegi,” oluk, ede eberak poluk libagarik e, loʼgu modok edemu duk-duksogo maregei.