Read Silimo Matius 27 Bible Online

Matius 27 - Silimo bible

Matius 27

¹Asogo tigisarik oruakma, hubet siaksogo is ap Allah eiye aʼge onuelak ʼgaindek aʼge ebano emin, enarluedek ebano emin, ʼberlegat en e, Yesus woruogoluk obok ʼbaligisarik e,

²eʼgik herle wusogoat Pilatus ebe gubernur ʼgain oruakma woluk wegesarik e, wogegisa.

³Yesus asogo wene ebam poluk demat woruogoluk tugukhwe, at Yudas en woruagoluk yoʼgo laga aʼge ano il yerontoluk e, ede en e, “An wiak tegis o,” oluk ede heberlegei. Ede heberlegeirik e, oʼgo uang perak aʼge 30 wogegisa aʼge ano pobuk uak wokho wogentaigoluk, is ap Allah eiye aʼge onuelak ʼgaindek ebano emin, enarluedek ebano emin, oruakma wagarik wogentasulat e, disogo moʼgulentesi,

⁴“Eige! Ap ai wiak tu erlakmayat de, woruagoluk yoʼgo wegi ai o. Holuk e, wiagat tegismu hegi o,” oluk moʼgulentesimu, is ebano en e, “Wene ai nis nenebam agama en de egen? Erlak o. Ai hat homuat o,” oluk moʼgulegisema re,

⁵at Yudas en uang perak aʼge 30 wogegisa ano Allah owi werikmu ebano hwikholuk e, uʼgwarek en oʼgorlop herle erlilogo ebe ʼbeʼgi waraga.

⁶Asogo tegeimu, is ap Allah eiye aʼge ʼgaindek ebano en uang perak aʼge 30 ano wegesarik e, “Uang yu ap emep oʼgo ʼbaligisarikmu re, Allah paget uang pogumu eba po modok mia o,” oluk egesarik e,

⁷aphwami ap ʼbok aʼge waragaiam ʼgwiang salonobogulomma, ap mesik ʼgwiang domul sogoluak aʼge heleʼgiso aʼge oʼgwiangma re, at ebam oʼgo ʼbaligisa.

⁸Asogo tigisa ai en e, ʼgwiang ai onuk ap emep ʼbegeimu oluk tualigisarikmu re, hwerli ai en ʼbekhit yogodak ogo ogwiat.

⁹Ai tigisa ai re, ap Yeremia Allah iak moʼgulentasu laga aʼge ano en eselat e, “Nenaik ʼgain Onuk Logo aʼge en moʼgulnesi hegitsogoat, is aphwami Israel aʼge en, Ap ano ebe oʼgo yu o, oluk egesarik e, uang perak aʼge 30 wik-wok e, ap sogoluak ʼgwiang domul aʼge heleʼgiso aʼge ano oʼgwiang oʼgo wogegisa,” [47] oluk pelal wokho pesi ano ebe ai erligeat, hegit aga.

¹⁰

¹¹At Yesus ap Pilatus gubernur ʼgain aʼge ano eʼbek woluk wegesema orogolema inlai lagama re, at en hin ebam wasulat e, disogo moʼgulesi, “Aphwami Yahudi aʼge onue ʼgain onuk logo aʼge ano harat a?” oluk moʼgulesimu, at Yesus en e, “Hat egen aiat o,” oluk moʼgulesi aʼgeat de,

¹²is ap Allah eiye aʼge onuelak ʼgaindek ebano emin, enarluedek ebano emin, enemin en, wene Yesus ebam aʼbik pegesa aʼge re, at en e, pobuk wene mesik oʼgo moʼgulonto erlakma en mo egei.

¹³Oʼgo u erlak mo egeimu, at ʼgain Pilatus en e, “Di wene yu wene aʼbik hebam pogwi yema hesaʼgo hwelise legen erlak?” oluk moʼgulesi aʼgeat de,

¹⁴oʼgo mesik lagaksogo u erlagat mo egeimu re, at ʼgain gubernur ano en e, “Nogorlok o!” oluk erliktegei.

¹⁵Is aphwami Yahudi aʼge seni Paskah lok sakho noʼgulat, is en e, “Aphwami eneʼgik herle werak aʼge ai at ai ʼgelaʼge, hebilogo woknentemen o,” oluk ʼgonu ogwiam e, at gubernur en hebilogo wogentasu laga.

¹⁶Asogo wogentasu lagarikmu no oluk e, ai erlige re, ap mesik onuk Yesus Barabas, Wiak tiso aʼge, oluk obok modok sagarak pobu legesa aʼge eʼgik herle werak ebano oruakma,

¹⁷aphwami aʼbik odoktugukhwe, at ʼgain Pilatus ano il holuk e, “Is yema re, Yesus ebam ʼbousogo enat woluk wegesa ani o,” oluk, pobi tegeitigat de, disogo moʼgulentesi, “His henede en e, ap onuk sa hebilogo woknontouwagoluk opogu legep. Yesus Barabas a? Ye, at e, Yesus onuk mesik Kristus ogwi aʼge ano a,” oluk, moʼgulentesirik e,

¹⁸

¹⁹wene edip ʼbeloʼgogumu eriano hweriogo oruakma, at ʼgain Pilatus ugwe en ap mesik wene wusogo perakpou waga. Perakpou wagalat e, disogo egei, “An hup nogosoma ap ai ebagerat nabi wiaksogo hegi o. Holuk e, at ebabut op aʼge ai hat hemin wene ebam pagup o,” oluk egeimu moʼgulosu wegesa aʼgeat de,

²⁰is ap Allah eiye aʼge onuelak ʼgaindek ebano emin, enarluedek ebano emin, enemin enat, aphwami esan ebano enede ʼgagalugulat e, “Barabas ai eʼgik herle hebilnontugulat e, Yesus ai nak e, werip o, oluk moʼgulomup,” oluk moʼgulentigisema re,

²¹at gubernur ano en, “Ap enebe ʼbiren ya re, at ap sa ʼgelaʼge herle hebilnontouwagoluk ogu legep,” oluk moʼgulentesimu is en e, “Barabas ai herle hebilnentemen o,” oluk moʼgulegisa.

²²Asogo moʼgulegisema, at Pilatus en e, “Holuk e, Yesus onuk mesik Kristus yu re, noʼgosogo tik,” oluk moʼgulentesimu, is ebano en e, “E pam edikpoluk werip o,” oluk moʼgulegisa.

²³Asogo moʼgulegisema, at en e, “At no wiak tegeimu en,” oluk moʼgulentesimu re, is en eniak ningsogoat, “E pam edikpoluk werip o,” oluk moʼgulegisa.

²⁴Asogo moʼgulegisema, at Pilatus en e, “Is aphwami yema enat, Worulat, oluk eniak ningsogoat ogulat ologunmu wiak omon paget, an niak ʼburlat almasogo ese legi hegi,” oluk, ik neʼgak aʼge mesik wesirik e, aphwami ebano enil oruakhwe eʼgik petne horagalat e, disogo moʼgulentesi, “Ap yu emep e, an nebam ema erlak o. Hisat henebam ema o,” oluk, moʼgulentesimu,

²⁵is ebano is eniak ningsogo ogulat e, “At emep ai re, nis nenemalik neneminat nenebam welemak o!” oluk moʼgulegisema re,

²⁶at Barabas ano eʼgik herle hebilogo wogentasulat e, at Yesus nak e, ʼgoʼbu lagalʼbisok wusogo re, e pam edikpoluk woruagoluk wogentesi.

²⁷Pilatus en Yesus ebe wogentesimu re, at osi tentara aʼge ebano en wene edip ʼbeloʼgogumu woluk ʼgwigisarik e, at ebe ʼburl eriano poluk, enarilak esan mesik emin logologu legesa aʼge enebe ʼberlegat eragam waliʼgogo odoktigisarik e,

²⁸at osum noʼgorlogo poluk e, sum orogole wibeʼgen werak ʼgelaʼge mesik ʼbuktak pogulat,

²⁹ap ʼgaindek aʼge eneʼgare-ʼgare ʼbuktogwi aʼge ai ʼgelaʼge, orlok wiak aʼge hwanesogo aʼgul pam ʼbuktak pogulat, ʼbon ʼgoʼbu ʼbalogo eʼgik ʼbekhit akhit wogogulat, tugulat e, enebe ondogorlu pam huregesarik, eida aʼbik obogu legesa, “Eige! Aphwami Yahudi aʼge onue ʼgain onuk logo aʼge ano harat hegi o,” oluk eniak esegen yagugulat e,

³⁰was ebam topuksogo pei lagalat, ʼbon ʼgoʼbu ano delogo re, aʼgul ʼgoloksogo worugulat, tigisa.

³¹Asogo til legesarik e, sum orogole wibeʼgen werak aʼge ano noʼgorlogo at uʼgwarek osum aʼge ʼbuktak pogulat, tigisarik e, e pam edikpoluk woruogoluk woluk liplau wegesa.

³²Yesus ebe woruogoluk woluk, o selimu en arat liplau wegesarik, wagaimu, ap mesik onuk Simon, owi o Kirene aʼge emin sarlok tigisarik e, eniak ningsogoat disogo moʼgulegisa, “Yesus e pam edikpoluk worua aʼge e yu hat wemen o,” oluk moʼgulegisa.

³³Asogo moʼgulegisema, wesimu re, dom aʼgul onuk nis neniak pam Enaʼguluak ʼBelak duk pam u ʼgelaʼge, is eniak pam Golgota duk pam eba wegesa.

³⁴Wegesarik e, anggur eʼgen aʼbosu emin, wam omotukhwe ʼgelaʼge esik wiak aʼge aʼbosu emin, emin neʼgerlak-heʼgerlak takpoluk, at nouwagoluk wogegisema, nekhesi ʼgal e, no ebit agama, ukpesi.

³⁵Asogo tigisarik e, at ebe e pam edikpoluk osum noʼgorlak ebano, “Salak ʼgelaʼge horlouwa,” oluk helebeʼgen hwikhai lagalat hwikhau wagalat, tigisarik e, helebeʼgen enebam aga aʼge holuk sum ano soʼbusogo hwerlegesa.

³⁶Arat soʼbusogo hwerlegesarik e, Yesus eragam eriano ʼgagalak welegesa.

³⁷Welat e, “Ap yu re, wene edip yu pam pegerik en werige o,” oluk u ʼgelaʼge, “YESUS APHWAMI YAHUDI AʼGE ONUE ʼGAIN ONUK LOGO AʼGE EBE YUAT O,” oluk pelal wokho e pam aʼgul hegitsogo dopnorak pegesa.

³⁸Yesus ebe asogo e pam ʼburl edikpegesarik e, is ap enebe ʼbiren aphwami enaʼge yogorlia wogu legesa aʼge mesik eʼgik ʼbekhit akhit, mesik eʼgik hware akhit, edigonoboluk eminat warenebegisa.

³⁹Asogo edigenebegesema oruakhwe, aphwami ebela ai oʼgwe lak-wak ogulat at Yesus ano disogo moʼgulegisa,

⁴⁰“Eige! Hat en, disogo egen epegi, Allah owi werik aʼge yu moluksogo poluk e, agauwa ʼbirenam werise leiktik agauwa henaganak aʼge en arat ologun ʼbalogo werik o, oluk egen ano re, hebe Allah omlogo holuk e, huʼgwarek en hebe e ai pam en hagap delogo ʼbi suk da!” oluk enaʼgul ʼgwani hogulat eniak esegen yagogu legesa.

⁴¹Asogo tugukhwe re, is ap Allah eiye aʼge onuelak ʼgaindek ebano emin, Allah iak pelal wogo eiye aʼge ebano emin, enarluedek ebano emin, enemin eniak esegen yagogulat e,

⁴²“At en e, is aphwami muon elirat delenebise laga aʼgeat de, uʼgwarek en nak e, delhorlo mia hegi. E ai pam en delogo ʼbu ago holuk e, nenil holuk, at ai nis aphwami Israel aʼge nonue ʼgain onuk logo aʼge demat o, oluk, pobi tul en oluk, ʼbumak da!

⁴³Ede Allah ebam heʼberik welat, An Allah omlogo yo, oluk ese laga ano re, at Allah enat delik epesi holuk e, doluak e,” oluk egesa.

⁴⁴Ye, is ap yogorlia wogwi en warenebegisa aʼge eriano en ogo Yesus eniak esegen asogoat yagegisa.

⁴⁵Asogo moʼgulogwi oruakma re, o erlige ʼburl jam 12 pam o hik egeitik e, o eba ʼberlegat hwerli jam 3 hiktak welaga.

⁴⁶Hiktak oruakhwe, jam 3 arat lai lagama re, at Yesus en aik Allah disogo moʼgulesi. Nis neniak pam e, “Naik Allah! Naik Allah! An nopaget uknebegen,” oluk u ʼgelaʼge, “Eli, Eli, lama sabakhtani,” [48] oluk iak ʼberaksogoat moʼgulesi.

⁴⁷Asogo moʼgulosoam, is aphwami nin pema eba welegesa aʼge enesaʼgo hweligisarik e, “Ap yu Elia worlhasu,” oluk egesema

⁴⁸ap is aʼge mesik pungtak lagarik e, hwali sabus ʼgelaʼge pam anggur eʼgen aʼbosu esik wiak aʼge udalogo nouwagoluk e paiyo pam dongsogo wogesimu re,

⁴⁹is nin pema en e, “A! At Elia en deluma ya? I a. Nenil wolomok,” oluk egesa.

⁵⁰Asogo egesema, at Yesus pobuk iak mesik erlige loksogo egeitik e, arat lebeksogo waraga.

⁵¹Waragoam e, Allah owi werikmu sum kain aʼge o ogorlirak dit akhit oʼgwe ʼbelak welaga aʼge erabu en ʼburl heisogoat ʼbak ʼbak ʼbu agalat, mouk erlanghasulat, helep ʼbageselat, tegeimu re,

⁵²aphwami werak aʼge ʼgwiangma salonobogwi aʼge ebano omuat ʼgoduk huretil lasulat e, Allah eiyagai waregesa aʼge enebe esanat salenebigisaʼgwe en enelaluk egesarik inetil legesa.

⁵³At Yesus ebe elaluk agama re, is enelaluk egesa aʼge ai, o kota Yerusalem Allah uʼgwarek owi ogwi ano ʼgwigisema re, aphwami enebe aʼbik enat enil entigisa.

⁵⁴Ye, ap tentara aʼge onue ʼgain aʼge emin, osi pema akhit Yesus eragam ʼgagalak welegesa aʼge ebano emin, mouk erlanghasulat, di bele yu bele tagalat, tegei ano enil hegesarik onogorlok aʼbik egesarik e, “Ap yu re, Allah omlogo demat o,” oluk egesa.

⁵⁵Asogo tugukhwe, is hwami Yesus lethogu legesa aʼge ebano o Galilea en ʼbi legesarik Yesus ebe e pam edikpegesema enil walekma en yetharok welegesa.

⁵⁶Is hwami eria re, mesik Maria owi Magdala aʼge. Ye, mesik e, hwe Maria Yakobus o, Yusuf o, enia ano. Ye, mesik e, Zebedeus eiyagai enia ano o, hwami muon logon eneminat welegesa.

⁵⁷O arat hup agama re, ap eʼgik oruak aʼge owi Arimatea aʼge onuk Yusuf, at Yesus eragam ʼgoluk iak wasu laga aʼge en,

⁵⁸Pilatus eʼbek lagarik, Yesus werak ʼgonu moʼgulesimu re, at Pilatus ano osi en wogemagoluk moʼgulentesi.

⁵⁹Ye, arat wogegisema re, sum kain ʼget lenan aʼge pam eʼgirlogo re,

⁶⁰at Yusuf owik uʼgwarek en ʼgerat heleʼgegeimu ai pei lagarik e, helep ʼgoduk ebak lok aʼge erlebilogo pou wagarik dopnosogo lerak poluk laga.

⁶¹Aʼge re, at hwe Maria owi Magdala aʼge ano o, hwe Maria agaikhen ano o, hweriogo welat Yesus werak pegesema enil welegesa.

⁶²Is aphwami Yahudi aʼge loruk oʼgwe agauwa sabiren Allah paget weat wolomogoluk e, yogodak ʼgelaʼge di aʼge yu aʼge nomologo poluk, is ap Allah eiye aʼge onuelak ʼgaindek ebano emin, is ap Farisi aʼge emin, enebe odoksogo Pilatus eʼbek legesarik e,

⁶³“Nonue. Aphwami lalenebil nese laga aʼge ano, elaluk welat moʼgulentasulat e, Agauwa ʼbiren werak weleiktik e, henaganak aʼge en e, nelaluk eik o, oluk egei ano en e,

⁶⁴at osi ebano en werak ano hisogo pei louwarik aphwami moʼgulontogulat, At Yesus ai waragama Allah en elalugaptegeimu, oluk ogu lemano. At naduk aphwami lalenebil denaga laga ano wei ʼgelaʼge. Aʼgeat de, pobuk asogo tumu re, loksogoat lalonobuano oluk e, agauwa henagan ya paget ʼgagalak welemagoluk e, ap logon yoʼgo enebemen o,” oluk moʼgulegisema,

⁶⁵at Pilatus en e, “Gagalak welema aʼge enebe ya. Holuk e, werak pegesema eba opsogo ʼgagalak welemagoluk, wogonoboluk lit o,” oluk moʼgulentesi.

⁶⁶Asogo moʼgulentesimu, is ebano wogonoboluk wegesarik e, aphwami en ʼgoduk horogumuno oluk, werak oruakma helep ʼgoduk dopnosogo larigisema ano ebam silo pogwi ai ʼgelaʼge aʼbosu werak poluk, is ap ʼgagalak wolom aʼge ebano ʼgagalak onoboluk legesa.